އިންޓަނޭޝަނަލް ކްރިކެޓް ކައުންސިލް (އައިސީސީ) އިން ހިންގާ ލެވެލް 2 ޓިއުޓާ ކޯހެއް މާލޭގައި މިއަދު ފެށިއްޖެ އެވެ.
މިއީ މި ލެވަލްގެ ކޯހެއް ރާއްޖޭގައި ބޭއްވޭ ފުރަތަމަ ފަހަރެވެ. ކްރިކެޓް ބޯޑް އޮފް މޯލްޑިވްސް (ސީބީއެމް)އާ ގުޅިގެން، އޭޝިއާގެ ކްރިކެޓް ކޯޗުންނަށް ހިނގޭ މި ކޯހުގައި 14 ގައުމަކުން 20 އަށް ވުރެ ގިނަ ކޯޗުން ބައިވެރިވެ އެވެ. މީގެތެރޭގައި، އައިސީސީ ފުލް މެންބަރު ޤައުމު ތަކުގެ ކޯޗުންވެސް ހިމެނެ އެވެ. އައިސީސީ ފުލް މެމްބަރު ގައުމުތަކަކީ، ދުނިޔޭގެ ލެވަލްގެ އެންމެ މަތީ ފަންތީގެ ކްރިކެޓް ގައުމުތަކެވެ.
މި މަހުގެ 24 ން 30 އަށް ކުރިއަށް ގެންދާ މި ކޯހުގެ ފަހު ދެ ދުވަސް ހާއްސަ ކުރެވިފައިވަނީ، ހައި ޕާފޯމަންސް އަށް ޓީމުތައް ތައްޔާރުކުރުމާ ބެހޭ މައުލޫމާތު ދިނުމަށެވެ.
މި ކޯހުގެ ސެޝަންތައް ކުރިއަށް ދަނީ، މޯލްޑިވްސް ނެޝަނަލް އިންސްޓިޓިއުޓް އޮފް ސްޕޯޓްސްގެ (ހެންވޭރު ބޯޅަގޭގެ) ސެމިނާ ރޫމްގަ އެވެ.
އިންޓަނޭޝަނަލް ކްރިކެޓް ކައުންސިލް (އައިސީސީ) އިން ހިންގާ ލެވެލް 2 ޓިއުޓާ ކޯހުގެ ތެރެއިން،--- ފޮޓޯ: ކްރިކެޓް ބޯޑް އޮފް މޯލްޑިވްސް
އެ ގޮތުން، މި ކޯހުގެ ސެޝަންތައް ނަގައިދެނީ އައިސީސީ އޭޝިއާ ރީޖަންގެ ޑިވެލޮޕްމަންޓް ޓީމުގައި ހިމެނޭ މާސްޓަ އެޑިއުކޭޓަރުން ކަމަށްވާ ބަންގްލަދޭޝްގެ އަމީނުލް އިސްލާމް އާއި، ޕާކިސްތާންގެ އިޤްބާލް ސިކަންދަރު، އަދި ޕާކިސްތާން ގެ ކޯޗު ޓްރެއިނަރު ޝާހިދު އަސްލަމް އެވެ.
ކްރިކެޓް ބޯޑުގެ ރައީސް މުޙަންމަދު ފައިސަލް ވިދާޅުވީ، މިއީ ރާއްޖެގެ ކްރިކެޓް ތާރީޙުގައި ފާހަގަ ކޮށްލެވޭ ދުވަހެއް ކަމަށެވެ. އަދި މިއީ، އައިސީސީގެ މި ފެންވަރުގެ ކޯހެއް ރާއްޖޭގައި ބޭއްވޭ ފުރަތަމަ ފަހަރުކަން ފާހަގަކުރައްވާ ފައިސަލް ވިދާޅުވީ، މިއީ އައިސީސީ އާއި ރާއްޖޭގެ ކްރިކެޓް ބޯޑާ އޮތް ގާތް ގުޅުން ރަމްޒުކޮށްދޭ ކަމެއް ކަމަށެވެ.
"މި ފަދަ އިތުރު ކޯސްތައް އަދި ކްރިކެޓްގެ ހަރަކާތްތައް ރާއްޖޭގައި ބެއްވުމަށް ހުޅުވިގެންދާ ދޮރެއް ވެސް މެ. މީގެ އިތުރުން، ދިވެހި ކޯޗުންނަށް، ކޯޗިން ގެ ދާއިރާއިން ކުރިއަށް ދިއުމަށް ލިބިގެން ދިޔަ ފުރުސަތެއް." ފައިސަލް ވިދާޅުވި އެވެ.
އިވެންޓެއްގެ ތެރެއިން ކްރިކެޓް ބޯޑްގެ ރައީސް ފައިސަލް ވާހަކަ ދައްަކަވަނީ.--- ފޮޓޯ: އަދަދު
ފައިސަލް ވިދާޅުވީ، ކޯސް ހިންގުމުގައި ސްޕޯޓްސް މިނިސްޓްރީ އާއި މޯލްޑިވްސް ނެޝަނަލް އިންސްޓިޓިއުޓް އޮފް ސްޕޯޓްސް ގެ ވަރަށް ބޮޑު އެހީތެރިކަމެއް ލިބުނު ކަމަށެވެ. އަދި އެކަމަށްޓަކައި ސްޕޯޓްސް މިނިސްޓަރު އަބްދުﷲ ރާފިއު (ރާއްޕެ) އާއި، ސްޕޯޓްސް މިނިސްޓްރީގެ ސްޓޭޓް މިނިސްޓަރު އަބްދުއް ރައްޒާޤް އިބްރާހިމް އަށް ވަރަށް ބޮޑަށް ޝުކުރެއް ކްރިކެޓް ބޯޑުން ވަނީ އަދާކޮށްފަ އެވެ.
އައިސީސީ ޑިވެލޮޕްމަންޓް މެނޭޖަރު، (އޭޝިއާ) އަމީނުލް އިސްލާމް ވިދާޅުވީ، ރާއްޖޭގައި އައިސީސީ އިވެންޓެއް ބޭއްވޭތީ ވަރަށް އުފާކުރާ ކަމަށާއި ރާއްޖެ އައިސީސީ މެންބަރަކަށް ވީތާ މިހާރު 25 ހަކަށް އަހަރުވެފައިވާ ކަމަށެވެ. އެހެންނަމަވެސް، ރާއްޖޭގެ ފެސިލިޓީސް ހުރިގޮތުން އައިސިސީގެ މުބާރާތެއް ބޭއްވިފައި ނުވި ނަމަވެސް، މި ފެންވަރުގެ ކޯހެއް ރާއްޖޭގައި ބޭއްވުމަކީ ވަރަށް އުފާވާ އަދި ތާރީހީ ކަމެއް ކަމަށެވެ.
މީގެ އިތުރުން، އައިސީސީގެ އަމާޒަކީ މުބާރާތްތަކާ، މެޗުތައް ހޯސްޓް ނުކުރެވޭ ޤައުމުތަކުގައި މިފަދަ ކޯސްތަކާއި ސެމިނާތައް ބޭއްވުން ކަމަށް އަމީނުލް އިސްލާމް ވިދާޅުވި އެވެ.
