ލަންޑަން (ޖުލައި 24) - ހުސްވެފައިވާ އިންގްލެންޑްގެ ކޯޗުގެ މަގާމަށް ފޭވަރިޓުންގެ ގޮތުގައި ބަލަން ޖެހޭނެ ދެ ކޯޗަކީ ކުރީގެ ދެ މިޑްފީލްޑަރު، ސްޓީވެން ޖެރާޑް އާއި ފްރޭންކް ލަމްޕާޑް ކަމަށް އިނގިރޭސި ކޯޗު ހެރީ ރެޑްނެޕް ބުނެފި އެވެ.
މި ފަހަރުގެ ޔޫރޯ ފުޓްބޯޅަ މުބާރާތުގެ ފައިނަލް މެޗުން ސްޕެއިން އަތުން އިންގްލެންޑް ބަލިވިއިރު، އިންގްލެންޑް މި ވަނީ ޖެހިޖެހިގެން ދެ ޔޫރޯގެ ފައިނަލުން ބަލިވެފަ އެވެ. މިއާ އެކު، އަށް އަހަރު އިންގްލެންޑް ކޯޗަށް ހުރި ގަރެތު ސައުތުގޭޓް ވަނީ އަމިއްލަ އަށް އިސްތިއުފާދީފަ އެވެ.
ސައުތުގޭޓް، އަމިއްލަ އަށް ޓީމުގެ ކޯޗުކަން ދޫކޮށްލިއިރު، ކޮންޓްރެކްޓް އޮތީ މި އަހަރުގެ ނިޔަލަށެވެ.
އާ ކޯޗެއް ހޯދުމުގެ މަަސައްކަތް އިންގްލެންޑުން ކުރަމުން އަންނައިރު، ގިނަ ނަންތަކެއް މީޑިއާގައި ދަނީ ދައުރުވަމުންނެވެ.
އިނގިރޭސި ގިނަ ކްލަބްތަކަކަށް ކޯޗުކޮށްދިން ރެޑްނެޕް ބުނީ، އޭނާ އަށް ފެންނަ ދެ ފަރާތެއްގެ ނަން ބުނެފިނަމަ ގިނަ ބަޔަކު އެ ކަމަށް އެއްބަސްވެސްނުވާނެ ކަމަށެވެ. އަދި އެ ދެ ކޯޗުންނަށް އިންގްލެންޑްގެ ވަޒީފާގެ އިންޓަވިއުއެއް ދޭން ވެސް ގިނަ ބަޔަކު ފަސްޖެހޭނެ ކަމަށެވެ.
"އަހަންނަށް ފެންނަ ފެނުމުގައި އިނގިރޭސި އެފްއޭ އިން ބަލަންވީ ޖެރާޑް ނޫނީ ލަމްޕާޑާ އިންގްލެންޑް ހަވާލުކުރަން. އެ އަށް ވުރެ ދުރަށް ބަލާނެ ވެސް ކަމެއް ނެެތް. އަހަންނަށް އެނގޭ ގިނަ ބަޔަކު މި ދެ މީހުން، ލޭބަލް ކޮށްފައި އޮތީ ފެއިލިއަރުންގެ ގޮތުގައި ކަން ކޯޗިން ކެރިއަރުގައި. އެކަމަކު، އަހަންނަށް ފެންނަ ފެނުމުގައި ކޯޗިންގައި ވެސް މި މީހުން ވަނީ ބޭނުންވާ ތަޖުރިބާގެ އަލީގައި ތަފާތު ކަންތައްތަކެއް ހާސިލްކޮށްފައި،" ރެޑްނެޕް ބުންޏެވެ.
އޭނާ ބުނީ ލަމްޕާޑް، ޗެލްސީއާ ހަވާލުވެ، އެ ކްލަބް ޓްރާންސްފާ ބޭން އެއްގައި އޮތްއިރު ރަނގަޅު މަސައްކަތްތަކެއް ކުރި ކަމަށެވެ. އަދި ޖެރާޑް ވަނީ ސްކޮޓްލެންޑްގެ ރޭންޖާސް އެ ގައުމުގެ ފުޓްބޯޅައިގައި ކުރިން އޮތް މަގާމަށް ގެންގޮސްދީފައި ކަމަށެވެ.
ޖެރާޑް މި ވަގުތު ހުރީ ސައުދީ ޕްރޯ ލީގުގެ، އަލް އިއްތިފާގުގެ ކޯޗަކަށެވެ. އަދި ލަމްޕާޑް ވަނީ އެވަޓަން އިން ވަކިކުރި ފަހުން، މީގެ އެއް އަހަރު ކުރިން، ވަގުތީ ކޯޗެއްގެ ގޮތުގަައި ޗެލްސީ އަށް އިރުޝާދުދީފަ އެވެ.
