އުރީދޫ މޯލްޑިވްސްއިން ރާއްޖޭގެ އެކި އޮފީސްތަކުގެ ޓީމްތަކަށް ހާއްސަކޮށްގެން ބާއްވާ އުރީދޫ ނޭޝަން އިންޓަ އޮފީސް މުބާރާތް އިއުލާނުކޮށްފި އެވެ.
އޯގަސްޓް 4، ގައި ފެށުމަށް ހަމަޖެހިފައިވާ އެ މުބާރާތުގައި މަގުބޫލު ތިން ގޭމް ކަމަށްވާ އީއޭއެފްސީ 24، މޮބައިލް ލެޖެންޑްސް: ބޭންގް ބޭންގް (އެމްއެލްބީބީ) އާއި ޕަބްޖީ މޮބައިލް ހިމެނެ އެވެ.
މުބާރާތްތަކުގައި ބައިވެރިވާން ބޭނުންވާ އެންމެން އޯގަސްޓް، 2 ގެ ކުރިން ރަޖިސްޓްރީ ކުރުމަށް އުރީދޫއިން އެދެ އެވެ.
އުރީދޫ މޯލްޑިވްސްއިން ބުނީ އެ މުބާރާތަކީ ރާއްޖޭގައި އުފެދިފައިވާ އީސްޕޯޓްސްގެ ކޮމިއުނިޓީއަށް ހިތްވަރުދީ ކުރިއެރުވުމަށް އުރީދޫއިން ކުރަމުންދާ މަސައްކަތުގެ ދަށުން ރޭވިފައިވާ މުބާރާތެއް ކަމަށެވެ.
"މުވައްޒަފުންގެ ގޭމިން ހުނަރު ދައްކާލައި، ޓީމްވޯކް އިތުރުކޮށް، އެކުވެރިކަން އުފެއްދުމަށް ރަނގަޅު މުބާރާތަކަށް މި މުބާރާތް ވެގެންދާނެ،" އުރީދޫއިން ބުނެ އެވެ.
މުބާރާތްތަކުގައި ކުޅޭ މެޗުތައް ލައިވްކޮށް ދެއްކުމަށް ވަނީ ހަމަޖެހިފަ އެވެ. ސަޕޯޓަރުންނާއި އެކުވެރިންނަށް އެމީހުންގެ ޓީމުތަކަށް ތާއީދުކުރުމަށް ދެވެ އެވެ. އަދި ރަޖިސްޓްރީވުމަށް ޝައުގުވެރިވާ ހުރިހާ ޓީމަކަށް 2 އޮގަސްޓް 2024 ގެ ކުރިން ރަޖިސްޓްރީ ކުރެވޭނެ އެވެ.
އެފްސީ24: ފުޓްބޯޅައަށް ޝައުގުވެރިވާ ފަރާތްތަކަށް އީއޭ ސްޕޯޓްސްގެ އެންމެ ފަހުގެ ފުޓްބޯޅަ ސިމިއުލޭޝަން ގޭމް އެފްސީ24 ގައި ހުނަރު ސާބިތުކޮށްދިނުމުގެ ފުރުސަތު ލިބިގެންދާނެ އެވެ. ރިއަލިސްޓިކް ގޭމްޕްލޭ އާއި ވާދަވެރި ފީޗާތަކާ އެކު ބައިވެރިންނަށް ވާޗުއަލް ފުޓްބޯޅައިގެ ހުނަރު ދައްކާލުމަށް މިއީ ފުރިހަމަ މުބާރާތެކެވެ. އެމުބާރާތުގެ ޖުމްލަ ޕްރައިޒް ޕޫލަކީ 20،000ރ. އެވެ.
މޮބައިލް ލެޖެންޑްސް: ބޭންގް ބޭންގް (އެމްއެލްބީބީ) ގެ މަޝްހޫރު މޮބައިލް މަލްޓިޕްލޭޔާ އޮންލައިން ބެޓްލް އެރީނާ (އެމްއޯބީއޭ) ގޭމް، އެމްއެލްބީބީގައި ޓީމްތަކުން ހަނގުރާމަތަކުގައި ބައިވެރިވާނެ އެވެ. ޓީމުތައް މޮޅުވުމަށް ވާދަކުރާއިރު ސްޓްރެޓެޖީ، ކޯޑިނޭޝަން އަދި ކުއިކް ރިފްލެކްސް މުހިންމުވާނެ އެވެ. އެ މުބާރާތުގެ ޖުމްލަ ޕްރައިޒް ޕޫލަކީ 10،000ރ. އެވެ.
ޕަބްޖީ މޮބައިލް: ބެޓްލް ރޯޔަލް އެރީނާއަކަށް ކުޅުންތެރިން ޕެރަޝޫޓް ކުރާއިރު، އެ ތަނުގައި ވާދަވެރިން ފަހަތަށް ޖައްސާލަން ޖެހެނީ ޗިކަން ޑިނާ ހޯދުމަށެވެ. ޕަބްޖީ މޮބައިލްގެ ހަލުވި އެކްޝަން އަދި ޓެކްޓިކަލް ގޭމްޕްލޭގެ ސަބަބުން ބައިވެރިން ވިސްނައިގެން ކުޅެގެން ނޫނީ މޮޅުވުމުގެ ފުރުސަތު ގެއްލިދާނެ އެވެ. އެ މުބާރާތުގެ ޖުމްލަ ޕްރައިޒް ޕޫލަކީ 20،000ރ. އެވެ.
އުރީދޫއިން އަންނަނީ ގޭމިން ކޮމިއުނިޓީއަށް އަމާޒުކޮށް ކޮންމެ އަހަރަކު ވެސް ގިނަ މުބާރާތްތައް ރާވައި ހިންގަމުންނެވެ. އަދި އެ ކުންފުނިން އަންނަނީ ގޭމިން ކޮމިއުނިޓީއަށް އެހީތެރިވުމަށް ގިނަ މަސައްކަތްތައް ކުރަމުންނެވެ.
