ބްލޮގަރު ޔާމީން ރަޝީދު މަރާލި މައްސަލާގައި ކުށް ސާބިތުވެ އުމުރަށް ޖަލަށްލި ދެ މީހުންނާއި ކުށް ސާބިތުނުވެ ސަލާމަތްވި ދެ މީހުންގެ މައްސަލަ ހައި ކޯޓުގައި އިސްތިއުނާފް ކުރިތާ ދެ އަހަރު ފަހުން ހައި ކޯޓުން މިއަދު ޝަރީއަތް ފަށައިފި އެވެ.
އޭޕްރީލް 23، 2017 ގައި ވަޅިން ހަމަލާދީ ޔާމީން ރަޝީދު މަރައިލި ކަމުގެ ދައުވާ ޖުމްލަ ހަ މީހެއްގެ މައްޗަށް އުފުލި އެވެ. އޭގެ ތެރެއިން ޔާމީން މެރުމުގެ ކުށް ސާބިތުވީ މ. އަންނާރުމާގޭ، އިސްމާއީލް ހައިޝަމް ރަޝީދު އަދި މ. އިރާސްމިކުގޭ، އަހުމަދު ޒިހާން އިސްމާއީލްގެ މައްޗަށެވެ.
ދެން ދައުވާ ލިބުނު މ. ތާއިފް، އިސްމާއީލް ރަޝީދާއި މ. ކޮޅުފުށީ އީސްޓް، ހުސައިން ޒިޔާދާއި މ. ކުދެހިގޭ، ހަސަން ޝިފާޒާއި ގދ. ގައްދޫ، ސިންދުބާދުގޭ، މުހައްމަދު ދިފްރާންގެ މައްޗަށް ކުރި ދައުވާތައް ސާބިތެއް ނުވެ އެވެ.
މި މީހުންގެ ތެރެއިން ހައި ކޯޓުގައި ދައުލަތުން އިސްތިއުނާފް ކުރީ އިސްމާއީލް ރަޝީދާއި މުހައްމަދު ދިފްރާންގެ މައްސަލަ އެވެ. ހައިޝަމާއި ޒިހާންގެ ހުކުމް އިސްތިއުނާފުކުރީ އެ ފަރާތުންނެވެ. ހައި ކޯޓުގައި މިއަދު ޝަރީއަތް ފެށީ ދެ އިސްތިއުނާފުގެ ބައި ވެސް އެއް ޝަރީއަތެއްގައި ކުރިއަށް ގެންދާ ގޮތަށެވެ.
ހައިޝަމާއި ޒިހާންގެ ވަކީލުން މައިގަނޑު ގޮތެއްގައި ފާހަގަ ކުރީ ހެކިބަސް ދިން ބައެއް ސިއްރު ހެކިވެރިންގެ ހެކިބަސް އަނބުރާ ގެންދިއުމަށް އެދިފައި ވަނިކޮށް އެ ކަމަށް ރިއާޔަތް ނުކޮށް އެ ދެ މީހުންގެ މައްޗަށް ކުށް ސާބިތުވާ ކަމަށް ކަނޑައެޅީ ގާނޫނީ އުސޫލުތަކާ ހިލާފަށް ކަމަށެވެ.
ވަކީލުން ފާހަގަ ކުރި ގޮތުގައި ހެކިބަސް ދިން ހެކިވެރިންގެ ހެކިބަހުގައި ފުށުއެރުންތަކެއް ހުއްޓެވެ. ތަހުގީގަށް ދިން ބަޔާނާއި ޝަރީއަތަށް ދިން ހެކިބަހުގައި ތަފާތުތަކެއް ހުރި ކަމަށް ބުންޏެވެ. އަނބުރާ ގެންގޮސްފައިވާ ހެކިބަހަކަށް ވެފައި އަދި ފުށުއެރުންތަކެއް ހުރި ހެކިބަހަކުން ގަސްތު މަރެއް ސާބިތު ނުކުރެވޭނެ ކަން އިސްލާމީ ޝަރީއަތުގައި ވެސް އޮންނަ ކަމަށް ވަކީލުން ބުންޏެވެ.
ޝަރީއަތަށް ކަނޑައެޅިފައިވާ ވަގުތު ހަމަވުމުން ރަޝީދާއި ދިފްރާންގެ ބައެއް މިއަދު ކުރިއަކަށް ނުގެންދެ އެވެ.
އެ މައްސަލަ ހައި ކޯޓުން ބައްލަވަނީ ތިން ފަނޑިޔާރުންގެ ބެންޗަކުންނެވެ. އެއީ ފަނޑިޔާރު ހަސަން ޝަފީއު، ފަނޑިޔާރު ފާތިމަތު ފަރުހީޒާގެ އިތުރުން ފަނޑިޔާރު އަބްދުލްމާނިއު ހުސައިނެވެ. ބެންޗުގެ ރިޔާސަތުގައި އިންނެވީ ފަނޑިޔާރު ޝަފީއު އެވެ.
ޔާމީން ރަޝީދު މަރައިލީ އޭނާގެ ރަހުމަތްތެރިޔާ އަދި ނޫސްވެރިޔާ ރިލްވާން އަބްދުﷲ ވަގަށް ނަގައި، ގެއްލުވާލާފައިވާ މައްސަލައިގައި އިންސާފު ހޯދުމަށް ވާހަކަ ދައްކަމުން ގެންދަނިކޮށް އޭޕްރީލް 23، 2017 ގަ އެވެ.
ޔާމީން މަރައިލީ، އޭނާ ވަރަށް ލަސްވަންދެން އޮފީހުގައި މަސައްކަތް ކުރުމަށްފަހު ގެއަށް ގޮސް، ލިފްޓުން އަރަން އުޅެނިކޮށް ގޭ ތެރޭގަ އެވެ. ޔާމީންގެ ހަށިގަނޑު ފެނުނީ އެ ގޭގައި ދިރިއުޅެމުންދިޔަ މީހަކަށެވެ. ޔާމީން ރަޝީދު މަރައިލީ، ދުރާލާ ރާވައި، އޭނާއަށް އެކި ދުވަހުގެ މަތިން ފާރަލުމަށްފަހު އެވެ.
ޔާމީން ރަޝީދު މަރާލި ކަމަށް ދަށު ކޯޓުގައި ކުށް ސާބިތުވި ދެ މީހުންގެ މައްޗަށް އިއްވީ އުމުރު ދުވަހުގެ ޖަލު ހުކުމަކާއި މަރުގެ ދިޔަ ނެގުމުގެ ހުކުމަކާއި ކައްފާރާގެ ގޮތުގައި ވިދިވިދިގެން ހިޖުރީ ދެ މަހު ރޯދަ ހިފުމަށެވެ. މި ގޮތަށް ހުކުމް އިއްވީ ޔާމީންގެ މަންމަ، މަރުގެ އަދަބުގެ ބަދަލުގައި މަރުގެ ދިޔަ ނަގަން އެދުމުންނެވެ.
