ސުޕްރީމް ކޯޓުގެ ކުރީގެ ފަނޑިޔާރު އަދި މިހާރު ހޯމް މިނިސްޓްރީގެ ސްޓޭޓް މިނިސްޓަރުގެ ވަޒީފާއެއް އަދާކުރައްވަމުން ގެންދަވާ އާދަމް މުހައްމަދު ހައި ކޯޓުގައި ވަކާލާތު ކުރި ގޮތާ މެދު ނުރުހުން ފާޅުކުރައްވައި، އެ ޝަރީއަތް ހިންގަވަން ހަވާލުވެ ހުންނެވި ތިން ފަނޑިޔާރުން ވާހަކަ ދައްކަވައިފި އެވެ.
އެއީ ލ. އަތޮޅު ފޮނަދޫ ކައުންސިލާއި އަމިއްލަ ފަރާތަކާ ދެމެދު ވެފައިވާ ކޮންޓްރެކްޓް އެއްބަސްވުމަކާ ގުޅިގެން އުފެދުނު ހިލާފެއްގެ މައްސަލަ އެވެ. ފޮނަދޫ މެޖިސްޓްރޭޓް ކޯޓުގެ ނިންމުން ހައި ކޯޓުގައި އިސްތިއުނާފުކޮށްފައިވާ މައްސަލާގައި އާދަމް މުހައްމަދު ތަމްސީލު ކުރެއްވީ ފޮނަދޫ ކައުންސިލެވެ.
ފޮނަދޫ ކައުންސިލްގެ ފަރާތުން ހުށަހަޅާ ގާނޫނީ ނުކުތާތައް އިއްވުމުގައި 40 މިނެޓަށް ވުރެ ގިނަ ވަގުތު ހޭދަވުމާއެކު، ބެންޗުގައި އިންނެވި ފަނޑިޔާރު މުހައްމަދު ނިޔާޒު ފުރަތަމަ ނުރުހުން ފާޅުކުރެއްވި އެވެ. އަދި ވީހާވެސް ބޮޑަކަށް ވަގުތު ސަލާމަތްވާނެ ގޮތަށް ނުކުތާތައް އިއްވުމަށް އިރުޝާދު ދެއްވި އެވެ.
އޭރު ކުރީގެ ފަނޑިޔާރު އާދަމް މުހައްމަދު ގެންދެވީ އޭނާގެ އަތުގައި އޮތް ލިޔުމެއް ބައްލަވައިގެން އޭގައިވާ ގޮތަށް ނުކުތާތައް އިއްވަވަމުންނެވެ.
"ހުށަހެޅިފައި ހުރި ނުކުތާތައް، އަކުރުން އަކުރަށް، ބޮޑު ސިންގާ ފޮތެއް ގޮތަށް އޮތް އެއްޗެއް، އަޅުގަނޑަކަށް ހިއެއް ނުވޭ ދެ ދުވަހުން މި ހުށަހަޅާ ނިންމޭނެ ހެނެއް، ތިޔަ ގޮތަކަށެއް، އެންމެ މައްސަލައެއް ނޫން ދޯ އަޅުގަނޑުމެން ވެސް ބަލަން އޮންނާނީ،" ފަނޑިޔާރު ނިޔާޒު ވިދާޅުވި އެވެ.
ފަނޑިޔާރު ނިޔާޒު ވިދާޅުވީ ގާނޫނީ މާއްދާ ވިދާޅުވެ އެއަށް ހަވާލާދެއްވައި ކުރު ގޮތަކަށް ދެންނެވުމުން ފުދޭނެ ކަމަށެވެ. ގާނޫނީ ނަސްލުތަކާއި އޭގެ ތަފުސީލުތައް މައްސަލަ ބައްލަވާ ފަނޑިޔާރުންނަށް ވެސް އެނގިވަޑައިގަންނަވާ ކަމަށް ފަނޑިޔާރު ނިޔާޒު ވިދާޅުވި އެވެ.
"ގާނޫނުން ހަވާލާ ދެއްވާން ބޭނުންވާ މާއްދާ ވިދާޅުވީމައި، އަޅުގަނޑަށް ހީވަނީ، ފަނޑިޔާރުންނަށް ވެސް ދެން އެނގޭނެ ހެން، އެ މާއްދާގައި އޮތް އެއްޗެއް، ތިޔަ ގޮތަށް އަކުރުން އަކުރަށް ގޮތަށް ވިދާޅުވާން ޖެހުނީމަ މިއަދު މި ގަޑި ޖެހުނީ،" ފަނޑިޔާރު ނިޔާޒު ވިދާޅުވި އެވެ.
ފަނޑިޔާރު ނިޔާޒުގެ ވާހަކަތަކާ ގުޅިގެން، ކުރީގެ ފަނޑިޔާރު އާދަމް މުހައްމަދު ޝަރީއަތުގައި ވިދާޅުވީ ކުޑަ މައްސަލައެއް ނަމަވެސް ގިނަ ލިޔެކިޔުންތަކެއް ހިމެނޭ މައްސަލައެއް ކަމަށެވެ. އަދި ޝަރީއަތަށް ހުށަހަޅަނީ ވެސް ދައްކަން ބޭނުންވާ ގާނޫނީ އެތައް ވާހަކައެއްގެ "ކުޑަކުޑަ ހުލާސާއެއް" ކަމަށް ވިދާޅުވި އެވެ.
"ގާނޫނު އަސާސީގެ 42 ވަނަ މާއްދާގައިވާ ގޮތުން، އެކަށީގެންވާ ވަގުތު ދެވިގެން، ރަނގަޅަށް އަޅުގަނޑުމެންނަށް މި ޑެލިވާ ކުރެވޭނީ ވެސް،" އާދަމް މުހައްމަދު ވިދާޅުވި އެވެ.
އާދަމް މުހައްމަދު ވާހަކަ މެދުކަނޑައިލެއްވުމަށް ފަހު ފަނޑިޔާރު ނިޔާޒު އަނެއްކާ ވެސް ވާހަކަ ދެއްކެވި އެވެ. ފަނޑިޔާރު ނިޔާޒު ވިދާޅުވީ މައްސަލައަށް ރަނގަޅަށް ތައްޔާރުވެގެން އަންނަ ނަމަ ދެވިފައިވާ ވަގުތުގެ ތެރޭގައި ފަރިތަކޮށް ގާނޫނީ ނުކުތާތައް ހުލާސާކޮށް ކިޔައިދެއްވޭނެ ކަމަށް ފަނޑިޔާރު ވިދާޅުވި އެވެ.
އެ ވާހަކައާ ގުޅިގެން އިތުރަށް ވާހަކަ ދައްކަވަން އާދަމް މުހައްމަދު ބޭނުންފުޅުވި ނަމަވެސް ފަނޑިޔާރުންގެ ބެންޗުން އެ ފުރުސަތެއް ނުދެއްވި އެވެ.
ބެންޗުގެ ރިޔާސަތުގައި އިންނެވި ފަނޑިޔާރު މުހައްމަދު ފައިސަލް ވިދާޅުވީ ގާނޫނީ ނުކުތާތަކުގެ ތަފުސީލުތައް ލިޔުމުން ހުށަހަޅާފައިވާ ކަމާއި އެ ލިޔުންތައް މަހުޟަރު ވެސް ކުރާނެ ކަމަށެވެ. އަދި ޝަރީއަތުން ގޮތެއް ނިންމެވުމުގައި ފަނޑިޔާރުން އެ ލިޔުމުގައިވާ ހުރިހާ ކަމަކަށް ރިއާޔަތް ކުރައްވާނެ ކަމަށެވެ.
އެއަށް ފަހުގައި ވެސް ފަނޑިޔާރުގެ އިރުޝާދާ ގުޅޭ ގޮތުން އާދަމް މުހައްމަދު ވާހަކަ ދައްކަވަން ފެއްޓެވުމުން ރިޔާސަތުން އެ ކަން ހުއްޓުވި އެވެ.
އަދި ބެންޗުގައި ދެން އިންނެވި ފަނޑިޔާރު ހަސަން ޝަފީއު ވަނީ ޝަރީއަތުން ދިން އިރުޝާދަކީ އަމަލުނުކުރެވޭނެ އިރުޝާދެއްތޯ އައްސަވައިފަ އެވެ. އެ އިރުޝާދަށް އަމަލުކުރެވޭނެ ކަމަށް އާދަމް މުހައްމަދު ވިދާޅުވުމުން، އިތުރު ފުރުސަތެއް އޭނާއަށް ނުދެއްވައި މިއަދުގެ އަޑުއެހުން ނިންމަވައިލެއްވި އެވެ.
