އެމްއެމްއޭގެ ގަވަރުނަރު އަލީ ހާޝިމް ވަކިކުރަން ރައްޔިތުންގެ މަޖިލީހުން ހިންގާ މައްސަލާގެ ބަހުސް ގެ ވަގުތަކީ އެއް ގަޑިއިރު ކަމަށް މަޖިލީހުގެ އާންމު ކޮމިޓީން ފާސްކޮށްފި އެވެ.
މި މައްސަލާގައި މާދަމާ ބަހުސް ކުރާނީ ހާޝިމް ވަކިކުރަން ލަފާދޭން ކަނޑައަޅައި މާލިއްޔަތު ކޮމިޓީން އެކުލަވައިލި ރިޕޯޓަށެވެ. މަޖިލީހުގައި މިހާރު އަމަލުކުރާ ގަވައިދުގައިވާ ގޮތުން ކޮމިޓީ ރިޕޯޓަކާމެދު ދެ ގަޑިއިރު ވަންދެން ވެސް ތަޅުމުގައި ބަހުސް ކުރެވޭނެ އެވެ.
އާންމު ކޮމިޓީން މިރޭ ބޭއްވި ބައްދަލުވުމުގައި ބަހުސްގެ ވަގުތު އެއްގަޑިއިރަށް ހަދަން ހުށަހެޅުއްވީ ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު އެވެ. ސަބަބެއް ކަމުގައި އޭނާ ވިދާޅުވީ މަޖިލީހުގެ ތަޅުމުގައި ހުރި މަސައްކަތްތަކާއި މި މައްސަލާގައި ގޮތެއް ނިންމުމުގެ މުހިންމުކަމެވެ.
އެ ހުށަހެޅުމަށް ތާއީދުކުރެއްވި އިސްދޫ ދާއިރާގެ މެންބަރު އިސްމާއިލް ޝަފީއު ވިދާޅުވީ ގަޑިއިރަކަށް ބަހުސް ކުރުކޮށްލަން ޖެހެނީ 'ވަގުތު ސަލާމަތް ކުރުމުގެ' ގޮތުން ކަމަށެވެ. މި ހުށަހެޅުން ފާސްވީ ބައްދަލުވުމުގައި ބައިވެރިވި ނުވަ މެންބަރުންގެ ތެރެއިން އަށް މެންބަރުންގެ ތާއީދާއެކު އެވެ. ވަކިކޮޅަކަށް ވޯޓު ނުދެއްވައި އެއް މެންބަރަކު އިންނެވި އެވެ.
މާލިއްޔަތު ކޮމިޓީގައި ހާޝިމް ގަވަރުނަރުކަމުން ވަކިކުރަން ހުށަހެޅުއްވީ މަޖިލީހުގެ ނައިބު ރައީސް އަހުމަދު ނާޒިމް އެވެ. އެ ހުށަހެޅުމަށް ތާއިދު ކުރެއްވީ ފުވައްމުލަކު އުތުރު ދާއިރާގެ މެންބަރު ހަމަދު އަބްދުالله އެވެ.
ނާޒިމް އެ މައްސަލަ ހުށަހަޅުއްވަމުން ވިދާޅުވީ ގަވަރުނަރު ވަކިކުރަން ލަފާ ދެނީ ގައުމުގެ އިގުތިސޯދު ހީނަރުވެ، އަލުން އަނބުރާ އިޔާދަކުރަން އުނދަގޫ ހިސާބަކަށް ދިޔައިރު، އެމްއެމްއޭއަށް މަނިޓަރީ ޕޮލިސީ އޭގެ އެންމެ އެކަށޭނެ ގޮތުގައި ހިންގަމުންދާ ތަން ފެންނަމުން ނުދާ ކަމަށެވެ.
މައްސަލާގައި ޖަވާބުދާރީވާން ކޮމިޓީއަށް ހާޒިރުވާން ހާޝިމަށް އެންގި ނަމަވެސް އާލާސްކަންފުޅެއްގެ ސަބަބުން ތިން ދުވަހެއްގެ މަތިން އޭނާއަށް މަޖިލީހަށް ހާޒިރުވެވޭގޮތް ނުވި އެވެ. މާލިއްޔަތު ކޮމިޓީން ހާޝިމް ވަކިކުރަން ލަފާދޭން ފެންނަ ކަމަށް ނިންމީ ކޮމިޓީއަށް ހާޒިރުވެ ޖަވާބުދާރީ ވުމުގެ ފުރުސަތު ނުދީ ލިޔުމުން ދިން ޖަވާބެއްގެ މައްޗަށް ބިނާކޮށެވެ.
ނަމަވެސް ލިޔުމުން ދިން ޖަވާބުގައި ހާޝިމް ވަނީ އޭނާގެ މަސްއޫލިއްތުތައް އަދާނުކުރައްވާ ކަމަށް ކުރާ ތުހުމުތުތައް އިންކާރުކުރައްވާފަ އެވެ. އޭނާ ވިދާޅުވީ، އިގުތިސޯދީ ކާރިސާއެއް އައުމުގެ ކުރިން އެ ފަދަ ހާލަތަކުން ގައުމު ސަލާމަތްކުރަން ބޭނުންވާ މައުލޫމާތާއި އިރުޝާދު ދީ، އަޅަން ޖެހޭ ފިޔަވަޅުތައް އެޅުމުގެ މުހިންމު ކަން އޭނާ އާއި އެމްއެމްއޭއިން ސަރުކާރާ ހިއްސާކޮށްފައިވާނެ ކަމަށެވެ.
