ބަންގްލަދޭޭޝްގައި މިހާރު ހިނގަމުންދާ ހަމަނުޖެހުންތަކާ ގުޅިގެން ، ކިޔެވުން މެދުކެނޑިފައި ވާތީ އެ ދިވެހި ދެ ދަރިވަރަކު އެނބުރި ރާއްޖެ އަންނަން އެދިފައިވާ ކަމަށް ފޮރިން މިނިސްޓްރީން ބުނެފި އެވެ.
ބަންގްލަދޭޝްގައި ކޮލެޖު ދަރިވަރުން ކުރަމުންދާ މުޒާހަރާތައް ވަރުގަދަވެ، 25 އަށްވުރެ ގިނަ މީހުން މިހާތަނަށް ވަނީ މަރުވެފަ އެވެ. އެ މުޒާހަރާ ކުރަމުންދަނީ 1971 ގެ ހަނގުރާމާގައި ބައިވެރިވި ބަންގްލަދޭޝް ސިފައިންގެ އާއިލާތަކަށް ސަރުކާރުގެ ވަޒީފާތަކުގެ 30 ޕަސެންޓު ދޭން ނިންމުމާ ގުޅިގެންނެވެ.
އެ މުޒާހަރާތަކާ ގުޅިގެން އެ ގައުމުގައި މިހާރު ދަނީ ކާފިއު ހިންގަމުންނެވެ.
މިކަމާ ގުޅިގެން ފޮރިން މިނިސްޓްރީން މިއަދު ދިން އަދާހަމާގައި ބުނީ، އެ ގައުމުގައި ހުންނަ ރާއްޖޭގައި ހައިކޮމިޝަނުން ދަނީ އެ އިދާރާގައި ރަޖިސްޓްރީވެފައިވާ 90 ދަރިވަރުންނާއި، އާއިލާތަކާއި އެކި ކަންކަމުގައި މިވަގުތު ބަންގްލަދޭޝްގައި ތިނި ދިވެހިންނަށް ގުޅާ ހާލު ބަލާ އެހީތެރިކަން ހޯދަމުން ކަމަށެވެ. ޖުމްލަކޮށް ހުރިހާ ދިވެހިންގެ ހާލު ރަނގަޅު ކަމަށްވެސް އެ މިނިސްޓްރީން ބުންޏެވެ.
ފޮރިން މިނިސްޓްރީން ބުނި ގޮތުގައި ބަންގްލަދޭޝްގައި ތިބި ދިވެހިންގެ ތެރެއިން އެނބުރި ރާއްޖެއަށް އަންނަން އެދުނު ދެ ދަރިވަރުންނަކީ އެ ގައުމުގެ މެޑިކަލް ސްކޫލުތަކުގައި ކިޔަވަމުން އައި ދެ ދަރިވަރެކެވެ. އެ ދެ ދަރިވަރުން އެނބުރި އަންނަން އެދުނީ ހަމަނުޖެހުންތަކާ ގުޅިގެން ބަންގްލަދޭޝްގެ އުތުރުގެ ސްކޫލުތައް ބަންދުކުރުމުންނެވެ.
"މި ދެ ދަރިވަރުން ބަހުގައި ބަންގްލަދޭޝް ބޯޑަރު ހުރަސްކުރުމުގައި ބަންގްލަދޭޝް ގައި ހުންނަ ދިވެހިރާއްޖޭގެ ހައިކޮމިޝަނާއި އިންޑިއާގައި ހުންނަ ދިވެހިރާއްޖޭގެ ހައިކޮމިޝަނުން ވަނީ އެހީތެރިކަން ފޯރުކޮށްދީފަ،" މިނިސްޓްރީން ދިން މި މައުލޫމާތުން ބެލެވެނީ އެ ދެ ދަރިވަރުން ބަންގްލަދޭޝް ބޯޑަރު ހުރަސްކޮށްފައިވާ ކަމަށެވެ.
މީގެކުރިން ނެރުނު ބަޔާނާ އެއްފަދައިން، ބަންގްލަދޭޝްގައި އިއުލާނުކޮށްފައިވާ ކާފިއުއަށް ބޯލަނބާ، ބޭރަށް ނުނިކުތުމަށާއި ހުރިހާ ކަމެއްގައިވެސް ހައިކޮމިޝަނުގެ އިރުޝާދާއި އެހީ ހޯދަން ފޮރިން މިނިސްޓްރީން ވަނީ އިރުޝާދުދީފަ އެވެ.
ބަންގްލަދޭޝް އަކީ ދިވެހި ގިނަ ދަރިވަރުންނެއް ސިއްހީ ދާއިރާއިން ތައުލީމު ހާސިލްކުރުމަށް ދިރިއުޅެމުންދާ ގައުމެކެވެ. އޭގެ އިތުރުން ވިޔަފާރި ކުރުމަށާއި ޗުއްޓީ ހޭދަކުރުމަށްވެސް ދިވެހިން އެ ގައުމަށް ދަތުރުކުރެ އެވެ.
އެއްވެސް އެހީތެރިކަމެއް ބޭނުންވާނަމަ، ބަންގްލަދޭޝްގައި ހުންނަ ދިވެހިރާއްޖޭގެ ހައިކޮމިޝަނާ ގުޅުމަށް ފޮރިން މިނިސްޓްރީން އެވެ. އެއީ 8801329748885+ ނުވަތަ 8801708120318+ ނަންބަރު ފޯނު އެވެ.
