މާލެ ސިޓީ އަދި ކުޅުދުއްފުށި ސިޓީ ހިމެނޭހެން އިއްޔެ ބޭއްވި ލޯކަލް ކައުންސިލްތަކުގެ އިންތިހާބުގައި ވޯޓުލާން ނުކުތީ މަދު އަދަދެއްގެ ބައެއް ކަމަށާއި އެ އިންތިހާބުގެ ނަތީޖާއާމެދު މާޔޫސްވާންވީ ސަބަބެއް ނެތް ކަމަށް އިދިކޮޅު އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެ އެވެ.
އިއްޔެ ބޭއްވި ބައި އިލެކްޝަނުގައި ވޯޓު ނެގި ހުރިހާ ގޮނޑިއެއްވެސް ކާމިޔާބުކޮށްފައިވަނީ ވެރިކަންކުރާ ޕީއެންސީއިންނެވެ. އޭގެ ތެރޭގައި މާލެ ސިޓީ ކައުންސިލްގެ ތިން ގޮނޑިއަކާއި ކުޅުދުއްފުށީ ކައުންސިލްގެ ހުސްވެފައިވާ ގޮނޑިއަކާއި، އަދި ފ. ބިލެތްދޫ ކައުންސިލްގެ ހުސްވެފައިވާ ގޮނޑިއެއް ހިމެނެ އެވެ.
މި ނަތީޖާއާއެކު ވެރިކަންކުރާ ޕީއެންސީގެ ސަޕޯޓަރުން ދަނީ އިދިކޮޅަށް ހަޖޫ ޖަހަމުންނެވެ. ޕީއެންސީގެ އިތުރުން އެމްޑީޕީގެ ބައެއް މެންބަރުންވެސް ވަނީ ފައްޔާޒު އަދި ޕާޓީގެ ލީޑަޝިޕަށް ފާޑުކިޔާފަ އެވެ.
އެ ފާޑުކިޔުންތަކަށް ރައްދުދެއްވައި ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ، އިއްޔެގެ އިންތިހާބުގައި ވާދަކުރި ޕާޓީގެ ކެންޑިޑޭޓުން ކުރެއްވި ހިތްވަރާއި މަސައްކަތަށް ވަރަށް ބޮޑަށް ޝުކުރު ދަންނަވާ ކަމަށެވެ.
"މަދު އަދަދެއްގެ ބަޔަކު ވޯޓުލީ އިންތިހާބުގެ ނަތީޖާ ނުކުތް ގޮތަކާމެދު މާޔޫސްވާންވީ ސަބަބެއް ނެތް. ޕާޓީގެ ހިންގުން ހަރުދަނާކުރުމަށް މިހާރު މިކުރެވޭ މަސައްކަތްތަކުގެ ތެރެއިން އިރާދަކުރެއްވިއްޔާ މި ޕާޓީއަށް ކުރިއަށް އޮތީ ކާމިޔާބު ދުވަސްތަކެއް،" ފައްޔާޒު ލިޔުއްވާފައިވެ އެވެ.
އިއްޔެގެ އިންތިހާބުގައި މާލެ ސިޓީގެ ދާއިރާތަކުން ވޯޓުލާން ނުކުމެފައިވަނީ އާދަޔާ ހިލާފަށް މަދުންނެވެ. އެގޮތުން އެންމެ ގިނައިން ވޯޓުލާން މީހުން ނުކުތް މައްޗަންގޮޅި މެދު ދާއިރާގެ ވޯޓުލެވޭ އާބާދީއިން އިއްޔެގެ އިންތިހާބުގައި ވޯޓުލީ އެންމެ 22 އިންސައްތަ މީހުންނެވެ.
ކުޅުދުއްފުށިން 60 އިންސައްތަ މީހުން ވޯޓުލާން ނުކުތްއިރު، ބިލެތްދޫގެ 83 އިންސައްތަ މީހުން ވޯޓުލާފައިވެ އެވެ.
މި އިންތިހާބުތަކުން އެމްޑީޕީ ބަލިވިއިރު ފައްޔާޒު ހުންނެވީ، އެމްޑީޕީގެ އިދާރީ ހިންގުން ހަރުދަނާކުރުމަށް އެކުލަވަލާ މަގުޗާޓަށް ހިޔާލު ހޯދަން އެ ޕާޓީގެ ލީޑާޝިޕުން އަތޮޅުތެރެއަށް ކުރަމުންދާ ދަތުރުތަކުގެ ތެރެއިން އައްޑޫގަ އެވެ. އޭނާ މިހާރު ވަނީ އެ ދަތުރުގައި ހުވަދު އަތޮޅަށް ވަޑައިގެންފަ އެވެ.
