ހުސްވެފައި އޮތް އިންޑިއާ ގައުމީ ފުޓްބޯޅަ ޓީމުގެ ކޯޗުގެ މަގާމަށް، އިންޑިއާގެ ސުޕަ ލީގުގެ ކްލަބް، އެފްސީ ގޯއާގެ ކޯޗު މަނޯލޯ މާކުއޭޒް ހަަމަޖައްސައިފި އެވެ.
ކުރިން އެސްޕަންޔޯލް ބީ ޓީމާއި ލަސް ޕަލްމާސް އަށް ކޯޗުކޮށްދިން މާކުއޭޒް، 55، އިންޑިއާގެ ކޯޗުކަމާ ހަވާލުވީ، ތިން އަހަރުގެ ކޮންޓްރެކްޓެއްގައި ކަމަށް މީޑިއާ ރިޕޯޓްތައް ބުނެ އެވެ. އެކަމަކު، ރަސްމީކޮށް އިންޑިއާ ފުޓްބޯޅަ ފެޑެރޭޝަން އިން މާކުއޭޒްގެ ކޮންޓްރެކްޓްގެ މުއްދަތެއް އިއުލާނެއް ނުކުރެ އެވެ.
މާކުއޭޒް މި އަހަރުގެ ނިޔަލަށް ގޯއާ އަށް ކޯޗުކޮށްދޭނެ އެވެ. އެއީ އިންޑިއާގެ ޓީމުގެ ކޯޗުގެ ޒިންމާ ވެސް އަދާކުރަމުންނެވެ. މިއީ މި ގޮތަށް އިންޑިއާ އަށް ކޯޗެއް ހަމަޖެއްސި ފުރަތަމަ ފަހަރެެވ. ފުލްޓައިމްކޮށް އިންޑިއާއާ، މާކުއޭޒް ހަވާލުވާނީ މި އަަހަރު ނިމުމުންނެވެ.
"އަހަރެން ވަރަށް ބޮޑަށް އުފާކުރަން އަހަންނަށް މި ފުރުސަތު ލިބުނީތީވެ، އަދި ގޯއާ ޓީމަށް ހާއްސަ ޝުކުރެއް ހައްގު، އެއީ އަހަރެން އެ ކްލަބްގެ ކޮންޓްރެކްޓެއްގައި ހުރެ ވެސް މި ވަރުގެ ބޮޑު ޒިންމާއަކާ ހަވާލުވާން ފުރުސަތު ދިނީތީވެ،" މާކުއޭޒް ބުންޏެެވެ.
މިދިޔަ ޖޫން މަހު، އިންޑިއާގެ ގައުމީ ފުޓްބޯޅަ ޓީމުގެ ކޯޗަކަށް ހުރި، ކްރޮއޭޝިއާގެ އީގޯ ސްޓިމަކް ވަނީ ވަކިކޮށްފަ އެވެ. އިންޑިއާގެ ކޯޗަކަށް 2019 ވަނަ އަަހަރުން ފެށިގެން މަސައްކަތްކުރަމުން އައި، ސްޓިމަކް، ކޮންޓްރެކްޓްގައި ބާކީ އަހަރެއް އޮއްވައި، ވަކިކުރީ ވޯލްޑް ކަޕް ކޮލިފައިންގައި ނަތީޖާތަށް ދަށްވުމުންނެވެ.
މާކުއޭޒާ އިންޑިއާ ކޯޗުކަން ހަވާލުކުރިއިރު، އެ މަގާމަށް ކުރިމަތިލާން ހުޅުވާލުމުން، 291 އެޕްލިކޭޝަން ލިބުނެވެ.
މާކުއޭޒް، އިންޑިއާގައި ކޯޗިން މަސައްކަތްކުރަން ފެށީ 2020 ވަނަ އަހަރު އެވެ. ހައިދަރުއާބާދު ޓީމަށް އިންޑިއަން ސުޕަ ލީގުގެ ޗެމްޕިއަންކަން ހޯދައިދިން، މާކުއޭޒް ވަނީ މިދިޔަ ދެ ސީޒަނުގައި އެ ޓީމަށް ލީގުގެ ދެ ވަނަ ހޯދައިދީފަ އެވެ.
އިންޑިއާ ގައުމީ ޓީމުގައި މި ވަގުތު ތިބި، މަޝްހޫރު ބައެއް ކުޅުންތެރިން ކުޅުމުގެ ކެރިއަރަށް އެންމެ ބޮޑު އެހީތެރިކަމެއް ފޯރުކޮށްދިން ކޯޗުންގެ ތެރޭގައި، މާކުއޭޒް ހިމެނެ އެވެ. އެ ގޮތުން، ކްލަބް ފުޓްބޯޅައިގައި މާކުއޭޒް ވަނީ، މުހައްމަދު ޔާސިރު، ލިސްޓަން ކޮލާސޯ، އާކާޝް މިޝްރާ، ޗިންގްލޭސަނަ ސިންގް، ނިކިލް ޕުޖާރީ އަދި ޖޭ ގުޕްތާއާ އެކު މަސައްކަތްކޮށްފަ އެވެ.
