އެމްޑީޕީގެ އިދާރީ ހިންގުން ހަރުދަނާކުރުމަށް އެކުލަވަލާ މަގުޗާޓަށް ހިޔާލު ހޯދަން އެ ޕާޓީގެ ލީޑާޝިޕުން އަތޮޅުތެރެއަށް ކުރަމުންދާ ދަތުރުތަކުގެ އެ ޕާޓީގެ ޗެއާޕާސަން ފައްޔާޒު އިސްމާއިލް ހުވަދު އަތޮޅަށް މިއަދު ވަޑައިގެންފި އެވެ.
ފައްޔާޒު ހުވަދު އަތޮޅަށް ވަޑައިގެންނެވީ އެންމެ ދެކުނުގައި އޮންނަ އައްޑޫ ސިޓީ އާއި ފުވައްމުލައް ސިޓީއަށް ވަޑައިގެން، އެ ސިޓީތަކުގެ އެމްޑީޕީ މެމްބަރުންނާ ބައްދަލުކުރައްވައި، މަގުޗާޓަށް އެ މީހުންގެ ހިޔާލު ހޯއްދެވުމަށް ފަހުގަ އެވެ.
އައްޑޫ އާއި ފުވައްމުލައް ދަތުރާ ގުޅޭ މައުލޫމާތު "އަދަދު" އަށް ދެއްވަމުން ފައްޔާޒު ވިދާޅުވީ، ދެ ސިޓީގައި ތިބި އެމްޑީޕީގެ ގިނަ އަދަދެއްގެ މެމްބަރުންނާ ބައްދަލުކޮށް، ހިޔާލު ބަދަލުކޮށްލެވުނު ކަމަށެވެ.
"އަޅުގަނޑުމެން އެމްޑީޕީގެ ކުރިމަގު ބައްޓަންކުރުމުގައި ހިންގުމުގެ ދާއިރާއާ، އަދި ޕާޓީއަކީ ޒަމާނީ މުއައްސަސާއެއް ގޮތުގައި ހިންގާ ޕާޓީއަކަށް ހެދުމަށް މިކުރެވޭ މަސައްކަތުގައި އަޅުގަނޑުމެންނަށް އައްޑޫ އަދި ފުވައްމުލަކުގެ އަޅުގަނޑުމެންގެ މެމްބަރުންނާ މިކަން މަޝްވަރާކޮށް އަދި ވަރަށް ބޮޑު ތަރުހީބެއް މިކަމަށް ވަނީ ލިބިފަ." އޭނާ ވިދާޅުވި އެވެ.
ދެ ސިޓީގައި ކުރެވުނު މަޝްވަރާތަކާ މެދު ހިތްހަމަޖެހިވަޑައިގެން ހުންނެވި ކަން ފާހަގަކުރައްވަމުން ފައްޔާޒު ވިދާޅުވީ އޭނާއަށް ފެނުނީ އެމްޑީޕީގެ އާ ދައުރެއްގެ މިސްރާބަށް އައްޑޫ އާއި ފުވައްމުލައް ފައްކާވެފައި އޮތް މަންޒަރު ކަމަށެވެ.
އެމްޑީޕީގެ މަގުޗާޓު އެކުލަވާލުމުގެ މަސައްކަތް އިއުލާން ކުރި ދުވަހު ފައްޔާޒު ވިދާޅުވީ މި މަސައްކަތް ފެށީ ފާއިތުވި އަހަރުތަކުގައި ރާއްޖޭގެ ސިޔާސީ މަޝްރަހަށް އައިސްފައިވާ ބަދަލުތަކާ އެއްވަރަށް ޕާޓީގެ ހިންގުމަށް ވެސް ބަދަލު ގެނައުމުގެ މަގުސަދުގައި ކަމަށެވެ.
އެގޮތުން އެ ޕާޓީގެ ގައުމީ މަޖިލީހާ މިކަން ހިއްސާކުރައްވަމުން އޭނާ ވަނީ، އެ މަގުޗާޓަކީ އެމްޑީޕީގެ ވިސްނުމާއި ފިކުރާއި ތަސައްވުރު ރަނގަޅަށް ބަޔާންކުރެވިފައިވާ، އޭގެ ތެރެއިން މުސްތަގުބަލުގައި ލީޑަރުން އުފައްދާނެ މަގުޗާޓަކަށް ހެދުމަށް އެ މަޖިލީހުގެ މެންބަރުންގެ ކިބައިން އެދިވަޑައިގެންފަ އެވެ.
މ މަގުޗާޓަކީ ކުރިއަށް އޮތް ދިހަ، ފަނަރަ ވަރަކަށް އަހަރަށް އެމްޑީޕީގެ ކުރިމަގު ބައްޓަން ކުރާނެ މަގުޗާޓު ކަމަށް ވެސް ފައްޔާޒު ވިދާޅުވެފައިވެ އެވެ.
ރަށްރަށަށް ގޮސް ހިޔާލު ހޯދުމުގެ މަސައްކަތުގައި ހަރަކާތްތެރި ވަނީ މި މަސައްކަތަށް ހާއްސަކޮށް އެ ޕާޓީން އެކުލަވާލާފައިވާ ޓެކްނިކަލް ޓީމަކުންނެވެ. މި ޓީމުން ކުރިއަށް އޮތް ދަުވަސްތަކުގައި ރާއްޖޭގެ އިތުރު ރަށްރަށަށް ގޮސް އެމްޑީޕީގެ މެމްބަރުންނާ ބައްދަލުކުރާނެ ކަމަށް އެ ޕާޓީން ބުނެފައިވެ އެވެ.
