މުއްދަތު ހަމަވެފައި ހުރި ބިންތައް ރައްޔިތުންނަށް ދޫ ނުކޮށް ތޮއްޑޫ ކައުންސިލުން ހިފަހައްޓައިގެން އުޅޭތާ ހަތަރު މަސްވެފައިވާތީ އެ ރަށު އާންމުން ކަންބޮޑުވުން ފާޅުކޮށްފި އެވެ.
އެކަމާ ގުޅިގެން "އަދަދު" ނޫހާ ވާހަކަ ދައްކަމުން އެ ރަށު ދަނޑުވެރިއަކު ބުނީ ކައުންސިލުން ދަނޑުވެރިންނަށް ދޭން ޖެހޭ ބިންތައް ނުދީ ހިފަހައްޓާފައިވާ ކަމަށާއި އެކަމާއި ބެހޭގޮތުން ވާހަކަ ދެއްކުމަށް ކައުންސިލް އިދާރާއަށް ދިއުމުން ވެސް ކައުންސިލްގެ ރައީސް ރައްޔިތުންނާއި ބައްދަލު ނުކޮށް ފިއްލަވާ ކަމަށެވެ.
"އަހަރަމެން ދިރިއުޅެން ކުރާ މަސައްކަތަކީ މީ، އެގޮތަށް ބިން ނުދީ ހިފަހައްޓާފައި ހުންނަތާ މިހާރު 4 މަސް ވަނީ މި، އަހަރުން މިކަމާ ބެހޭ ގޮތުން ވާހަކަ ދެއްކުމަށް ކައުންސިލް އިދާރާއަށް ދާ ކޮންމެ ދުވަހަކުވެސް ރައީސް ފިލަނީ، މިއަދު ވެސް އަހަރުންް ދިޔާމަ އެހެން ހެދީ" އޭނާ ބުންޏެވެ.
ދަނޑުބިންތައް ދޫ ނުކުރުމުގެ ސަބަބުން މިދިޔަ މަހުވެސް ވަނީ އެ ރަށުގައި މުޒާހަރާ ވެސް ކޮށްފައެވެ. އަަދި މި މުޒާހަރާގެ ތެރެއިން ވަނީ ފުލުހަކަށް އަނިޔާ ވެފައެވެ.
އޭގެ އިތުރުން އޭނާ ފާހަގަކުރީ އިއްޔެ ކައުންސިލް އިދާރާއަށް ދަނޑުވެރިން ދިޔައީ އެމީހުންނަށް ދޭން ޖެހޭ ބިން ނުދީ އެތަނުގެ ތަންތަން ނީލަމުގައި ވިއްކާލަން ކައުންސިލުން ނިންމާފައި ވާތީ އެކަމާއި ދެކޮޅަށް ކަމަށްށެވެ.
"އިއްޔެ ކައުންސިލަށް ދިޔައީ އެ ދަނޑުތަކުގައި ހުރި އެއްޗެހި ނީލަމުގައި ވިއްކާލަން އިއުލާނެއް ޖެހުމުން. އެ ދަނޑުތަކުގެ އައްސޭރިފަށުގައި ހުންނަ ރުއްގަސްތަކާއި އެހެނިހެން ގަސްތަކަކީ އެ ދަނޑު ލިބޭ މީހާ ބޭނުން ކުރުމަށް އޮންނަ އެއްޗެހި. އެކަމަކު ކައުންސިލުން އުޅުނީ އެ އެއްޗެހިތައް ނީލަމުގައި ވިއްކާލަން ވެގެން. އެހެންވެގެން އަހަރުން ނުކުތީ އެކަންތައް ހުއްޓުވަން," އޭނާ ބުންޏެވެ.
ރައްޔިތުން އެއްވެ ނީލަމުގައި ވިއްކާލަން ޖަހާފައި ހުރި އެއްޗެހި ވިއްކާލުމާއި ދެކޮޅަށް އަޑު އުފުލުމުން ވަނީ އެ ކަން ކުރިއަށް ގެންގޮސްފައި ނުވެ އެވެ.
މިކަމާއި ގުޅޭގޮތުން ދެން ހުރި ކަންބޮޑުވުންތައް ފާހަގަކުރަމުން އެ ރަށު މީހަކު ބުނީ ކައުންސިލުން ބިންތައް ދޫކުރަން ބޭނުންވަނީ އެންމެ ދިގު މުއްދަތަކަށް 15 އަހަރު ދުވަހަށް ކަމަށެވެ.
ނަމަވެސް, އެއީ ދަނޑުވެރިން ބޭނުންވާ ގޮތް ނޫން ކަމަށްށާއި ދަނޑުވެރިން ބޭނުން ވަނީ މިހާރު ވެސް ދޫކުރާ ގޮތަށް 3 އަހަރުގެ މުއްދަތަކަށް ދޫކުރުމަށެވެ. އަދި މީގެ އިތުރުން އޭނާ ފާހަގަކުރީ އެ ދަނޑުތަކުގެ ތެރެއިން މަގެއް ކެނޑުމަށް ކައުންސިލުން ބޭނުންވާ ކަމަށެވެ. ނަމަވެސް, އެ ކަންކަން އެގޮތަށް ކުރުމުން އެ ދަނޑުތަކުން ބޮޑު ބައެއް ގެއްލޭނެ ކަމަށް އޭނާ ބުންޏެވެ.
މި މައްސަލައިގައި ލޯކަލް ގަވާންމެންޓް އޮތޯރިޓީ(އެލްޖީއޭ) އިން ވެސް ވަނީ އެރަށަށް ގޮއްސައެވެ. ނަމަވެސް ނިންމަން ޖެހޭ ބައެއް މުހިންމު ކަންތައްތައް ނުނިމި ހުރުމުގެ ސަބަބުން މި މައްސަލަ ކޮޅެއްގައި ނުޖެއްސޭ ކަމަށް އެރަށުން މި ނޫހަށް މައުލޫމާތު ދިން މީހާ ބުންޏެވެ.
މިކަމާއި ގުޅޭގޮތުން ކައުންސިލްގެ ބަހެއް ހޯދުމަށް އެ ރަށު ކައުންސިލްގެ ނައިބު ރައީސްއަށް ގުޅުމުން ވިދާޅުވީ އެކަމާ ބެހޭގޮތުން ވާހަކަ ދައްކަން ބޭނުން ނުވާ ކަމަށެވެ.
ތޮއްޑޫއަކީ ރާއްޖޭގައި އެންމެ ފުޅާ ދާއިރާއެއްގައި ދަނޑުވެރިކަން ކުރަމުން އަންނަ އެއް ރަށެވެ. އަދި މިހާރު ލޯކަލް ޓޫރިޒަމަކީ ވެސް އެރަށުގެ އިގުތިސޯދުގެ ބޮޑު ބައެއް ހިއްސާކުރާ ސިނާއަތެކެވެ.
