ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ހިމެނޭ ގޮތަށް ރާއްޖޭގެ ކުޅިވަރުގައި ހުރި މައްސަލަތައް ހައްލުކުރަން ކުރެވޭ މަސައްކަތުގައި ސަރުކާރުގެ ވިސްނުމަކީ އިސްލާހު ކުރެވޭ ކުޅިވަރު ގާނޫނުގެ ތެރެއިން، ޖުމްލަ ހައްލަކަށް ކަމަށް ސްޕޯޓްސް މިނިސްޓަރު ރާފިއު (ރާއްޕެ) ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާ އަށް ހާޒިރުވެ، މެމްބަރުންގެ ސުވާލުތަަކަށް މިިނިސްޓަރު ރާފިއު ވަނީ ޖަވާބުދެއްވައިފަ އެވެ.
އެ ގޮތުން، އެފްއޭއެމް ބަނގުރޫޓްވެފައިވާ ހާލަތުގެ ވާހަކަ ހިއްސާކޮށް، ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު، އިބްރާހިމް ސުޖާއު، ސުވާލުކުރައްވަމުން ދަނިކޮށް، 40 ސިކުންތު ހަމަވުމާ އެކު، މަޖިލީހުގެ ރައީސް އަބްދުއްރަހީމް އަބްދުﷲ ވަނީ، ސުވާލު ކުރަން ދެއްވި މުއްދަތުގައި އެކަން ފުރިހަމަނުވާ ކަމަށް ވިދާޅުވެފަ އެވެ.
އޭގެ ފަހުން، އިނގުރައިދޫ ދާއިރާގެ މެމްބަރު އިބްރާހިމް ފަލާހު ވަނީ މެމްބަރު ސުޖާއުގެ ސުވާލު ފުރިހަމަކުރައްވައިފަ އެވެ.
އެ ސުވާލުގެ ޖަވާބަށް މިނިސްޓަރު ރާފިއު ވިދާޅުވީ، ފުޓްބޯޅަ އެއީ ރާއްޖޭގެ އެއް ވަނަ ކުޅިވަރު ކަމުގައި ވެފައި އޮތް އެ މަންޒަރު ދިވެހިންނަށް ދެއްކުމަަކީ އަޒުމު ކަމަށް ވިދާޅުވެފަ އެވެ.
"ފުޓްބޯޅަ ކުރިއަރުވަން ކުރެވެން ހުރި ހުރިހާ މަސައްކަތެއް މިހާރު ވެސް މި ދަނީ ކުރަމުން،" ރާފިއު ވިދާޅުވި އެވެ.
މިނިސްޓަރު ވިދާޅުވީ، ފުޓްބޯޅައިގެ އިތުރުން ޖުމްލަ އެކު ހުރިހާ ކުޅިވަރު އެސޯސިއޭޝަންގެ މައްސަލަތަކަށް ހައްލު ހޯދައިދޭން މަސައްކަތް ކުރަމުން އަންނަ ކަމަށެވެ.
"ގާނޫނަށް ގެންނަން ޖެހޭ ބަދަލުތަކާއި އެސޯސިއޭޝަންތަކުގެ ހިންގާ ގަވާއިދަށް ގެންނަން ޖެހޭ ބަދަލުތަކާއި އަދި އެ އެސޯސިއޭޝަންތައް އެފިލިއޭޓްވެފައިވާ މައި އިދާރާތަކުގެ ގަވާއިދުތަކަށް ސްޕޯޓްސް ކޮމިޝަންގެ ގަވާއިދުތަކައި ގާނޫނުތަކަށް ލާ މެހިގެން ފުށުނާރާ ގޮތަށް އެކަން ބައްޓަން ކުރުމަކީ މީގެ ޖުމްލަ ހައްލު ކަމުގައި އަޅުގަނޑު ދެކެނީ. އެކަން އަޅުގަނޑުމެން ކުރަމުން މިދަނީ، އިސްލާހު ކުރަން ހުށަހަޅާ ގާނޫނުގައި ވެސް އަޅުގަނޑުމެން ވާނީ، ކުޅިވަރު ރާއްޖޭގެ އެކި ކަންކޮޅުތަކަށް ފެތުރިގެންދާ ގޮތަށް އެމެންޑްމެންޓް ގެނެސްފައިވާނީ،" ރާފިއު ވިދާޅުވި އެވެ.
މިނިސްޓަރު ވިދާޅުވީ، އެފްއޭއެމް އާއި އެހެން އެސޯސިއޭޝަންތައް ވެސް، ރާއްޖޭގެ ގާނޫނާއި ގަވާއިދުގެ މަތިން އަދި ދިވެހި ރައްޔިތުން ބޭނުންވާ ގޮތަށް މާ ގިނަ ދުވަސްތަކެއް ނުވެ ފުރިހަމަ ވެގެންދާނެ ކަމަށެެެވެ.
ކުޅިވަރު ގާނޫނަށް ގެންނަ އިސްލާހުގެ މަސައްކަތް މިނިސްޓްރީން ނިންމާލާފައިވާ ކަމަށާއި އެއީ، ސްޕޯޓްސް އާބިޓްރޭޝަންގެ ކަންކަން ވެސް ހިމެނޭ ގޮަތަށް ކަމަށް މިނިސްޓަރު ވިދާޅުވި އެވެ. އަދި "މިއަދު ނޫނީ މާދަމާ" އެޓާނީ ޖެނެރަލް އޮފީހަށް ކުޅިވަރު ގާނޫނުގެ މި އިސްލާހު ފޮނުވެނޭ ކަމަށް ވެސް މިނިސްޓަރު ވަނީ ވިދާޅުވެފަ އެވެ.
