ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ ހަރަދުތަކާ ގުޅޭގޮތުން މައުލޫމާތު ހޯދަން، އައިމަން ލަތީފް (ޕިކޯ)، އެދުމުން، އެކަން ނުކޮށްފައިވާތީ، އިންފޮމޭޝަން ކޮމިޝަނަށް ހުށަހެޅި ޝަކުވާގެ މައްސަލަ ނިންމާލިއިރު، އެ މައުލޫމާތު 10 ދުވަސް ތެރޭގައި ދެވޭ މިންވަރަކަށް ފޯރުކޮށްދޭނެ ކަަމަށް ބީއޭއެމް އިން ބުނެފި އެވެ.
ސަރުކާރުން ބަޖެޓް ފޯރުކޮށްދޭ، މުއައްސަސާތަކުން މައުލޫމާތު ހޯދައި ލިބިގަތުމުގެ ގާނޫނުގެ ދަށުން މައުލޫމާތު ހޯދައި، އެ މައުލޫމާތު އާންމު ކުރާ އައިމަން މައުލޫމާތު ހޯދަން ހުށަހަޅައިފައިވަނީ މައިގަނޑު ހަތް ކަމެއްގެ މައްޗަށް އަލިއަޅުވާލައިފަ އެވެ. އެ ހަތް ކަންތަކުގެ ތެރެއިން، ކޮންމެ ކަމެއްގައި ވެސް ހަރަދު ހިނގާފައިވާ ކަންކަން، 2018 އިން ފެށިގެން 2023 އާ ހަމައަށެވެ.
އެ ކަންތައްތަކަކީ، ފާހަގަކޮށްފައިވާ މުއްދަތުގެ ތެރެއިން ބެޑްމިންޓަން އެސޯސިއޭޝަނަށް ލިބުނު އާމްދަނީ އާއި ކުރެވުނު ހަރަދު، އެ މުއްދަތުގެ ތެރޭގައި ބެޑްމިންޓަން އެސޯސިއޭޝަނުން ގަނެފައިވާ ތަކެއްޗާއި އެ އަށް ހަރަދުހިނގާފައިވާ ގޮތާއި ބިޑިން ކަންކަން ހިނގާފައިވާ ގޮތް، އެ މުއްދަތުގެ ތެރޭގައި ބިދޭސީ ސްޓާފުން/ކޯޗުން /އަމްޕަޔަރުން /ރެފްރީން/ޓެކްނިކަލް ސްޓާފުން ހަމަޖައްސާފައިވާ އުސޫލާއި ދީފައިވާ ކޮންޓްރެކްޓާއި ދޭ މުސާރަ އަދި އެކޮމަޑޭޝަން ފަދަ ހަރަދުތައް ކޮށްފައިވާ ގޮތް، ހިންގާ ކޮމިޓީ އަށް މީހުން އިންތިހާބު ކުރެވުނު ގޮތުގެ މައުލޫމާތު، ފާހަގަކޮށްފައިވާ މުއްދަތުގެ އަހަރީ އާންމު ޖަލްސާގެ ރިޕޯޓްތަކާއި އަހަރީ ރިޕޯޓްތަކެވެ.
އައިމަން، ތަކުރާރުކޮށް، އެދިގެން، ބެޑްމިންޓަން އެސޯސިއޭޝަނުން، ބައިކުޅަބަޔަށް ވުރެން ވެސް ކުޑަ މައުލޫމާތެއް ދީފައިވަނީ، 27 އޭޕްރީލްގަ އެވެ.
އެ ގޮތުން، ބެޑްމިންޓަން އެސޯސިއޭޝަނުން މައުލޫމާތު ދިނުމުގައި ވަނީ، ހަތް ކަމެއް ފާހަގަކޮށްފަ އެވެ. އެކަމަކު، އެ ހަތް ކަމުގައި ވެސް ތަކުރާރުވެފައި ހުރީ ސީދާ ސީދަލަށް މައުލޫމާތު ދޭން ބޭނުންނުވާ ކަމުގެ އިބާރާތްތަކެވެ. އެއީ، ހަމަ ގާތްގަނޑަކަށް އައިމަން މައުލޫމާތު ހޯދަން އެދުނު ހަތް ކަމަށް އަލި އަޅުވާލައިފައި، ބެޑްމިންޓަން އެސޯސިއޭޝަނުން ކަމަކަށް ކަމެއް ކުރާ އުސޫލުން ދީފައިވާ މައުލޫމާތު ކަމަށް ބެލެވުމުގެ ހުރިހާ ޖާގައެއް އެބައޮތެވެ. ބެޑްމިންޓަން އެސޯސިއޭޝަނުން އައިމަން އަށް ދިން މައުލޫމާތުގައި ފާހަގަކޮށްފައިވަނީ، އާމްދަނީ އާއި ހަރަދު ރިޕޯޓާ ގުޅޭ އަހަރީ ހިސާބު ތަކަކީ ބެޑްމިންޓަން އެސޯސިއޭޝަނުގެ ހިންގާ ގަވާއިދުގައިވާ ގޮތަށް އަހަރީ ޢާންމު ޖަލްސާގައި މެމްބަރުންނަށް ހުށަހަޅާ ފާސްކުރުމަށްފަހު ކުޅިވަރާބެހޭ ވުޒާރާ އަށް އަދި ކޮމިޝަނަ އޮފް ސްޕޯޓްސް އަށް ފޮނުވާފައިވާ ހިސާބެއް ކަމަށެވެ. އަދި ހިންގާ ޤަވާއިދުގައިވާ ގޮތަށް ކޮންމެ މެމްބަރަކު ވެސް ބެޑްމިންޓަން އެސޯސިއޭޝަންގެ އޮފީހަށް އައިސް އެދުމުން ހިސާބުތައް ބެލުމުގެ އިންތިޒާމު ހަމަޖައްސައިދެވޭނެ ކަމަށް އެ ޖަވާބުގައި ލިޔެފައިވެ އެވެ.
މީގެ އިތުރުން، ބެޑްމިންޓަން އެސޯސިއޭޝަނަކީ ގަންނަ ތަކެތި ސްޓޮކް ކޮށްފައި މުދާ ބަހައްޓާ އުސޫލުން ނުބަހައްޓާ ކަމަށާއި ވަކި އައިޓަމެއް ފާހަަގަކޮށްފިނަމަ މައުލޫމާތު ފޯރުކޮށްދެން މަސައްކަތް ކުރާނެ ކަމަށް ވެސް އައިމަން އަށް އެސޯސިއޭޝަނުން ލިޔުމުން ދިން ޖަވާބުގައި ބުނެފައިވެ އެވެ.
ލިޔެކިޔުމުން، މަދު މައުލޫމާތެއް އައިމަން އަށް ދިނުމަށް ފަހު، އެސޯސިއޭޝަންގެ ޖަވާބުގައި ބުނެފައިވަނީ، އެ އޮފީހަށް އައިސް އެދުމުން ދެން ހުރި ލިޔެކިޔުން ބެލުމުގެ އިންތިޒާމު ހަމަޖައްސައިދެވޭނެ ކަމަށެވެ.
އެހެންވެ، އައިމަން އެ މައްސަލަ އިންފޮމޭޝަން ކޮމިޝަން އަށް ހުށަހަޅައިގެން ކުރިއަށްދާން ނިންމީ އެވެ.
މިއަދު ބޭއްވި އިންފޮމޭޝަން ކޮމިޝަންގެ އަޑުއެހުމުގައި ވެސް ބެޑްމިންޓަން އެސޯސިއޭޝަންގެ ވާހަކަތައް ހުރީ ކުރިން ބޭއްވި ފުރަތަމަ އަޑުއެހުމާ ދާދި އެއްގޮތަކަށެވެ.
ބެޑްމިންޓަން އެސޯސިއޭޝަންގެ ސާވާ މައްސަލަ ޖެހިފައި ހުރުމުން، ދެވެން ހުރީ 2023 ވަނަ އަހަރުގެ މައުލޫމާތުތައް ކަމަށް އެސޯސިއޭޝަނުން ވަނީ ބުނެފަ އެވެ. އެކަމަކު، ތަކުރާރުކޮށް، ހުރި މައުލޫމާތެއް އައިމަން އަށް ދިނުމަށް، ކޮމިޝަނުން އެދި، އެކަން ކުރެވޭނެ މުއްދަތެއް އެސޯސިއޭޝަނުން ކަނޑައަޅަން އެދުމުން، އެސޯސިއޭޝަނުން ބުނީ، ގާނޫނު ތަން ދޭ މިންވަރަކަށް އައިމަން އެދިފައިވާ މައުލޫމާތު ފޯރުކޮށްދެވެން ހުރި ވަރަކަށް 10 ދުވަސް ތެރޭ ކޮށްދޭނެ ކަމަށެވެ.
އެއާ އެކު އައިމަން ފާހަގަކުރި އެއް ކަމަކީ، މިހާތަނަށް ވެސް އެސޯސިއޭޝަންގެ އަމަލުތައް ހުރީ މައުލޫމާތުތައް ސީދާ ދިނުމުގެ ވިސްނުމާ އެއްގޮތަށް ނޫން ކަމަށެެެވެ.
ޑްމިންޓަން އެސޯސިއޭޝަންގެ އެންމެ ފަހުގެ އިންތިހާބީ ރައީސަކަށް ހުންނެވީ އެންމެ ފަހުން ތިން ދައުރުގައި ވެސް އެ މަގާމު ފުރި މޫސާ ނާޝިދު (މޫސަ) އެވެ.
މޫސަ އާއި އެސޯސިއޭޝަން ހިންގުމާ ގުޅޭ ކޮރަޕްޝަނުގެ މައްސަލައެއް ތަހުގީގު ކުރަމުން އަންނާތީ އެންޓި ކޮރަޕްޝަން ކޮމިޝަން (އޭސީސީ) އިން އިންތިހާބު ކަންކަން މަޑުޖައްސާލަން އެންގި އެވެ. އަނެއްކޮޅުން، ބެޑްމިންޓަން އެސޯސިއޭޝަންގެ ހިންގާ ގަވާއިދުގައި ހުރި ކަންކަން އިސްލާހުކުރުމަށް ފަހު ނޫނީ އިންތިހާބެއް ނުބާއްވަން ކޮމިޝަނާ އޮފް ސްޕޯޓްސް ވެސް އޮތީ އަންގައިފަ އެވެ.
ބެޑްމިންޓަން އެސޯސިއޭޝަންގެ އެންމެ ފަހުން އިންތިހާބުކުރި ހިންގާ ބޯޑު އިންތިހާބު ކުރީ 2021 ވަަނަ އަހަރުގެ ފެބްރުއަރީ 24 ގަ އެވެ. އެ ހިންގާ ބޯޑު ކޮމިޝަނާ އޮފް ސްޕޯޓްސްގައި ރަޖިސްޓްރީ ކުރީ، 2021، މާޗް 11 ގަ އެވެ. މުއްދަތު ހަމަވެފައި އޮތް ބޯޑަކުން، ބެޑްމިންޓަން އެސޯސިއޭޝަން ހިންގަމުން، އަދި އަމުދުން، ސަރުކާރުގެ އިދާރާތަކުގެ އަޑުއެހުންތަކުގައި ބައިވެރިވެ، ޖަވާބުދާރީވަމުން އަންނައިރު، މި ކަމާ ގިނަ ބަަޔަކު އަންނަނީ ކަންބޮޑުވުން ފާޅުކުރަމުންނެވެ.
