އެމެރިކާގެ ރިޔާސީ އިންތިހާބުގައި ވާދަކުރައްވާ އެ ގައުމުގެ ކުރީގެ ރައީސް ޑޮނަލްޑް ޓްރަމްޕަށް ބަޑި ޖަހައި ހަމަލާދިނީ ޕެންސިލްވޭނިއާއަށް ނިސްބަތްވާ ތޯމަސް މެތިއު ކްރޫކްސް، 20، އެވެ.
ބަޑި ޖެހި އިރު ޓްރަމްޕު ހުންނެވީ ޕޯޑިއަމުގައި ވާހަކަ ދައްކަވާށެވެ. ބަޑީގެ އަޑު އިވުމާއެކު ޓްރަމްޕު ޕޯޑިއަމް ކައިރިއަށް ތިރިވި އެވެ. އަދި ތެދުވެވަޑައިގެންނެވިއިރު ކަންފަތުން ލޭ އާދެ އެވެ. އެ ހަމަލާގައި އެއްވުމުގައި ބައިވެރިވި މީހަކު ވެސް މަރުވި އެވެ.
ހަމަލާދިންތާ ސިކުންތުކޮޅެއް ތެރޭގައި ސީކްރެޓް ސާވިސްއިން ކްރުކްސްއަށް ބަޑިން ހަމަލާދީ މަރާލި އެވެ. އަދި އެފްބީއައިން ދަނީ މިހާރު އެ ހާދިސާ ތަހުގީގު ކުރަމުންނެވެ.
އެފްބީއައިން ބުނީ ކްރޫކްސް ހަމަލާދިންއިރު އޭނާ އުޅުނީ އައިޑީ ހިފައިގެން ނޫން ކަމަށާއި އެއާއެކު އައިޑެންޓިޓީ ކަށަވަރުކުރީ ޑީއެންއޭގެ އިތުރުން ފޭޝަލް ރިކޮގްނިޝަން ޓެކްނޮލިޖީ ބޭނުން ކޮށްގެން ކަމަށެވެ.
ހަމަލާދިން ސަރަހައްދާ 43 މޭލު ދުރުގައި ދިރިއުޅެމުންދިޔަ ކްރުކްސް ގްރެޖުއޭޓްވީ 2022 ގައި ބެތަލް ޕާކް ހައި ސްކޫލުންނެވެ. އޭނާ ވަނީ މެތެމެޓިކްސް އަދި ސައިންސުން މަތިން މާކްސް ހޯދައިގެން 500 ޑޮލަރުގެ ފައިސާގެ އިނާމެއް ވެސް ހާސިލުކޮށްފަ އެވެ.
ކްރޫކްސް މަސައްކަތް ކުރީ އޭނާ ދިރިއުޅެމުންދިޔަ ގެއާ ކައިރި ލޯކަލް ނާސިން ގެއެއްގެ ބަދިގޭގަ އެވެ.
ކްރޫކްސްއަކީ މަޑުމައިތިރި އަދި ކްލާހުން މަތީ ގްރޭޑްތައް އަބަދުވެސް ހޯދާ މީހެއް ކަމަށާއި އޭނާ ތާރީހުގެ ކަންކަން ވަރަށް ބޮޑު ޝައުގެއް ހުރި ކަމަށް ރިޕޯޓްތައް ބުނެ އެވެ.
"އޭނާއަކީ ވަރަށް މަޑުމައިތިރި އަދި މީހުންނާ މާ ވާހަކަ ދައްކާ އުޅޭ މީހެއް ނޫން. އޭނާ މިފަދަ ކަމެއް ކޮށްފާނެ ކަމަށް އުންމީދެއް ވެސް ނުކުރެވޭ،" ކްރޫކްސް ގެ ކައިރީ އުޅުނު މީހަކު ބުންޏެވެ.
އެމެރިކާ ނޫސްތަކުން ބުނީ ރިކޯޑްތައް ދައްކާ ގޮތުން ކްރޫކްސް ރަޖިސްޓްރީ ކޮށްފައި ހުރީ ރިޕަބްލިކަން ޕާޓީގައި ކަމަށާއި އޭނާ ވަނީ ލޯކަލް ޝޫޓިން ކްލަބެއްގައި އެއް އަހަރެއްހާ ދުވަހު އުޅެފައި ކަމަށެވެ.
ކްރޫކްސް ޓްރަމްޕަށް ހަމަލާދިނީ އޭއާރް-15 ރައިފަލްއެއް ބޭނުންކޮށްގެންނެވެ. އެ ރައިފަލްއަކީ ކްރޫކްސްގެ ބައްޕަ މީގެ ހަ މަހެއްހާ ދުވަސް ކުރިން ގަނެފައިވާ ބަޑިއެއް ކަމަށް ރިޕޯޓްތައް ބުނެ އެވެ.
ސީބީއެސްއިން ބުނީ ކްރޫކްސްގެ ކާރުން ޝައްކު އުފެދޭ ޑިވައިސްއެއް ފެނިގެން ލޯ އެންފޯސްމަންޓުން ވަނީ އެ ކާރު ހިމެނޭ ސަރަހައްދު ބަންދުކޮށް، އެ ޑިވައިސް ބެލުމުގެ ދަށަށް ގެންގޮސްފަ އެވެ.
އެފްބީއައިން ބުނީ ކްރޫކްސް ހަމަލާދޭން ޖެހުނު ސަބަބު ދެނެގަތުމަކީ އެންމެ ބޮޑު އަމާޒު ކަމަށާއި ނަމަވެސް މިހާތަނަށް އެކަން އެނގޭ ގޮތް ނުވާ ކަމަށެވެ.
"އަހަރެންނަށް އަދިވެސް ނޭގޭ މިވެގެން އުޅޭގޮތެއް. ލޯ އެންފޯސްމަންޓާއި ވާހަކަ ދެއްކީމަ އެނގޭނީ ވެގެން އުޅޭ ގޮތެއް،" ކްރޫކްސްގެ ބައްޕަ ސީއެންއާ ވާހަކަދައްކަމުން ބުންޏެވެ.
ކްރޫކްސްގެ އާއިލާއިން ކަމާ ބެހޭ ފަރާތްތަކަށް އެއްބާރުލުން ދެމުންދާ ކަމަށް އެފްބީއައި އިން ވަނީ ބުނެފަ އެވެ. އަދި އެފްބީއައި އިން ވަނީ އޭނާގެ ގެ އެއްކޮށް ކޯޑަންކޮށް ނުވަދެވޭ ގޮތް ހަދާފަ އެވެ.
