އިޒްރޭލާއި ލުބުނާނާ ދެމެދު އެމެރިކާގެ މެދުވެރިކަމާއެކު އެއްބަސްވި ހަނގުރާމަ ހުއްޓާލުމުގެ އާ ޝަރުތުތަކަށް ލުބުނާނުގެ ހިޒްބުالله ޖަމާއަތުން ރަސްމީކޮށް ދެކޮޅު ހަދައިފި އެވެ.
އިރާނުގެ މަދަދު ލިބޭ އެ ޖަމާއަތުގެ ލީޑަރު ނައީމް ގާސިމް ނެރުއްވި ބަޔާނެއްގައި ވިދާޅުވީ މި މަޝްވަރާތަކަކީ އެއްވެސް ނަތީޖާއެއް ނެތް އަދި ލުބުނާނުގެ ރައްޔިތުން އިހާނެތިކޮށްލުމަށް ހިންގި ކަމެއް ކަމަށެވެ. އަދި މި އެއްބަސްވުމަކީ ލުބުނާނުގެ ގިނަ ބަޔަކު ގަބޫލުކުރާނެ ކަމެއް ނޫން ކަމަށްވެސް އޭނާ ވިދާޅުވިއެވެ.
މި އެއްބަސްވުމުގެ ދަށުން ލުބުނާނުގެ ދެކުނުގައި ހިޒްބުاللهގެ ހަނގުރާމަވެރިންނަށް ނުވަދެވޭނެ ފަދަ ސަލާމަތީ ސަރަހައްދުތަކެއް ގާއިމުކުރުމަށް ވަނީ ނިންމާފައެވެ. އެމެރިކާގެ ސްޓޭޓް ޑިޕާޓްމަންޓުން ބުނެފައިވަނީ މި އެއްބަސްވުން ދެމިއޮންނާނީ ހިޒްބުالله އިން ހަމަލާދިނުން މުޅިން ހުއްޓާލުމުން ކަމަށެވެ.
ނަމަވެސް މި މަޝްވަރާތަކުގައި ބައިވެރިނުވާ ހިޒްބުاللهގެ ލީޑަރު ވިދާޅުވީ، ހަނގުރާމަވެރިން ދެކުނުގެ ސަރަހައްދުތަކުން ފޭބުމަކީ އިިޒްރޭލުގެ މަގުސަދުތައް ހާސިލުކޮށްދީ، ހިޒްބުالله އިން އަމާންދިނުން ފަދަ ކަމެއް ކަމަށެވެ.
ލުބުނާނުގެ ވެރިރަށް ބެއިރޫތުގެ ދެކުނު ސަރަހައްދުތަކުގައި ދިރިއުޅޭ އާންމުންގެ މެދުގައިވެސް މި އެއްބަސްވުމާ މެދު އޮތީ ނުތަނަވަސްކަމެވެ. އެ ސަރަހައްދުގައި ވިޔަފާރިކުރާ ބައެއް މީހުން ބުނާ ގޮތުގައި، ހަނގުރާމަ ހުއްޓާލަންވާނީ ހުރިހާ ފަރާތަކުން އެއްބަސްވެގެންނެވެ. އެއް ފަރާތަކުން އެކަނި ހަމަލާ ހުއްޓާލުމަކީ ސުލުހައިގެ އެއްބަސްވުމެއް ނޫން ކަމަށާއި، އެއީ ބަލިގަބޫލުކޮށް އަމާންދިނުން ކަމަށް އެމީހުން ސިފަކުރެއެވެ.
ވޮޝިންގްޓަނުގައި ކުރިއަށްދިޔަ މަޝްވަރާތަކަށްފަހު އެކުލަވާލި މި އެއްބަސްވުމުގައިވާ ގޮތުން، އިޒްރޭލްގެ ބޯޑަރާއި ލިޓާނީ ކޯރާ ދެމެދު އޮތް 30 ކިލޯމީޓަރުގެ ސަރަހައްދުން ހިޒްބުاللهގެ ހުރިހާ ހަނގުރާމަވެރިން ފައިބަންޖެހެއެވެ. އެ ސަރަހައްދު ބަލަހައްޓާނީ ލުބުނާނުގެ ރަސްމީ ސިފައިންނެވެ. މި މަޝްވަރާތަކުގެ ފަހުގެ ބައްދަލުވުމެއް ޖޫން މަހުގެ 22 ވަނަ ދުވަހު ބޭއްވުމަށް ވަނީ ތާވަލުކޮށްފައެވެ.
މި އެއްބަސްވުމާ މެދު ސިޔާސީ ގޮތުން ބަހުސްތައް ކުރެވެމުންދާއިރު، ބުރާސްފަތި ދުވަހުވެސް އިޒްރޭލުން ވަނީ ލުބުނާނުގެ ދެކުނުގެ އެކި ސަރަހައްދުތަކަށް ވަރުގަދަ ވައިގެ ހަމަލާތަކެއް ދީފައެވެ. މި ހަމަލާތަކުގައި މަދުވެގެން އަށް މީހުން މަރުވެ، ގިނަ ބަޔަކު ޒަހަމްވެފައިވާ ކަމަށް ލުބުނާނުގެ ސިއްހީ ވުޒާރާއިން ބުނެއެވެ. މީގެ އިތުރުން، އދ. ގެ ސުލުހަ ބަލަހައްޓާ ފައުޖުގެ ސާބިއާގެ ސިފައިންގެ މީހަކުވެސް ވަނީ ހަމަލާއެއްގައި މަރުވެފައެވެ.
އިޒްރޭލު ދިފާއީ ވަޒީރު އިސްރާއީލް ކާޓްޒް ވިދާޅުވީ، ޓެރަރިސްޓުންގެ އިންފްރާސްޓްރަކްޗާ ނައްތާލުމަށްޓަކައި އެގައުމުގެ ސިފައިން ކުރިއަށްގެންދާ އޮޕަރޭޝަންތައް ވަގުތީ ގޮތުން މެދުކަނޑާނުލާނެ ކަމަށެވެ. އަނެއްކޮޅުން ހިޒްބުالله އިން ބުނީ ޑްރޯން އަދި ރޮކެޓް ބޭނުންކޮށްގެން އިޒްރޭލްގެ ސިފައިންނަށް ހަމަލާދީފައިވާނެ ކަމަށެވެ.
މިދިޔަ މާޗު މަހުން ފެށިގެން ކުރިއަށްދާ މި ހަނގުރާމައިގައި ލުބުނާނުން މިހާތަނަށް 3،500 އަށްވުރެ ގިނަ މީހުން މަރުވެފައިވާއިރު، އެއް މިލިއަނަށްވުރެ ގިނަ މީހުން ވަނީ ގެދޮރު ދޫކޮށް ރައްކާތެރި ސަރަހައްދުތަކަށް ބަދަލުވެފައެވެ. އެމެރިކާއިން އުއްމީދު ކުރަނީ މި އެއްބަސްވުމުގެ ސަބަބުން ސަރަހައްދީ ސުލުހައަށް މަގުފަހިވާނެ ކަމަށެވެ. ނަމަވެސް ހިޒްބުاللهގެ އިންކާރާއެކު މި އެއްބަސްވުން ތަންފީޒުކުރުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.
