ބާލިން (ޖުލައި 15) - އިންގްލެންޑް އަތުން 2-1 އިން މޮޅުވެ، ސްޕެއިނުން ޔޫރޯގެ ޗެމްޕިއަންކަން ހަތަރު ވަނަ ފަހަރަށް ހޯދައި، މުބާރާތުގެ އެންމެ ކާމިޔާބު ޓީމުގެ ޝަރަފް ހޯދައިފި އެވެ.
މި މުބާރާތަށް އައިއިރު ސްޕެއިނާއި ޖަރުމަނު އޮތީ ތިން ތަށި ހޯދައިގެން އެއްވަރުވެފަ އެވެ.
ސްޕެއިނުން ޔޫރޯގެ ތަށި މި އުފުލާލީ 12 އަހަރަށް ފަހު އެވެ. އެ ޓީމުން މީގެ ކުރިން މި މުބާރާތުގެ ޗެމްޕިއަންކަން ހޯދައިފައިވަނީ، 1964، 2008، 2012 އަދި 2024 ވަނަ އަހަރު އެވެ. މި ފަހަރުގެ މުބާރާތް ސްޕެއިނަށް ހާއްސަ އެވެ. އެ ޓީމުން ތަށި އުފުލާލީ ކުޅުނު ހަތް މެޗުން ވެސް މޮޅުވެގެންނެވެ.
ޖަރުމަނުގެ މަޝްހޫރު ބާލިން އޮލިމްޕިކް ސްޓޭޑިއަމްގައި މިރޭ ކުޅުނު މެޗު ފަށައިގެން ފުރަތަމަ ހާފުގައި ދެ ޓީމަށް ވެސް މާ ނުރައްކާތެރި ހަމަލާތަކެއް ފޮނުވާލެވޭ ގޮތެއްނުވި އެވެ. ސްޕެއިނުގެ ގޯލަށް ފުރަތަމަ ހާފުގެ ފަހުކޮޅުގައި އިންގްލެންޑްގެ ފިލް ފޯޑެން ޖެހި ބޯޅަ ސްޕެއިންގެ ކީޕަރު އުނާއި ސިމޯން ވަނީ މަތަކޮށްފަ އެވެ.
ފުރަތަމަ ހާފާ ހިލާފަށް ދެ ވަނަ ހާފުގައި ސްޕެއިން ފެނުނީ ތަފާތުކޮށެވެ. ދެ ވަނަ ހާފުގެ ކުޅުން ފެށިތާ ދޮޅު މިނިޓް ތެރޭ ސްޕެއިނުން ލީޑުނެގި އެެވެ. މި ލަނޑު ޖެހީ، އިއްޔެ 17 ވަނަ އުފަން ދުވަސް ފާހަގަކުރި ލަމީން ޔަމާލް ދިން ބޯޅައަކުން، ނީކޯ ވިލިއަމްސް އެވެ. އޭރިއާތެރެއިން ނީކޯ ޖެހި ބޯޅަ އަމާޒުވީ ގޯލުގެ ދުރު ކަނަށެވެ.
އިންގްލެންޑަށް ނަތީޖާ ހަމަހަމަކޮށްދިން ގޯލު ޖަހައިދިން ކޯލް ޕާމާ އުފާފާޅުކުރަނީ.--- ފޮޓޯ: އޭއެފްޕީ
އޭގެ އިރުކޮޅެއް ފަހުން، ސްޕެއިނަށް ލީޑުފުޅާކޮށްދޭން އޭރިއާތެެރެއިން ޑަނީ އޯލްމޯ އަށް ލިބުނު ފުރުސަތުގައި ޖެހި ބޯޅަ ދިޔައީ ގޯލާ ސީދާނުވެ އެވެ. އަދި ފަހުން، ސްޕެއިންގެ ފޯވާޑް، އަލްވާރޯ މޮރާޓާ އޭރިއާތެރެއިން ހުސްކޮށް އަރައި، ޖެހި ޝޮޓް އިންގްލެންޑްގެ މިޑްފީލްޑަރު، ޑެކްލަން ރައިސް ފަހަތަށްފައިބައި ސަލާމަތްކުރި އެވެ.
އިންގްލެންޑުން މަޑުމަޑުން މެޗުގެ ތެރެއަށް ވަންނަން މަސައްކަތް ކުރަމުންދިޔައިރު، އެ ޓީމުގެ ތަރި، ޖޫޑް ބެލިންހަމް ވަނީ ދެ ކުޅުންތެރިން ކައިރިން ދެމިގަތުމަށް ފަހު ރަނގަޅު ޝޮޓެއް ފޮނުވާލައިފަ އެވެ. އޭނާ ޖެހި ބޯޅަ ގޯލާ ސީދާނުވި އެވެ.
އިންގްލެންޑުން 73 ވަނަ މިނިޓްގައި ނަތީޖާ ހަމަހަމަކުރީ ބެލިންހަމްގެ ދައުރާ އެކު ޖެހި ލަނޑަކުންނެވެ. ބެލިންހަމް ދިން ބޯޅައަކުން މި ލަނޑު ޖެހީ ކޯލް ޕާމާ އެވެ. ބަދަލަކަށް ކުޅެން އެރި ޕާމާ އޭރިއާ ރޮނގުކައިރިން ޖެހި ބޯޅަ އަމާޒުވީ ގޯލުގެ ތިރީ ކަނަށެވެ.
އަލުން ލީޑުނަގަން ސްޕެއިނުން ކުރި މަސައްކަތުގައި ޔަމާލް ޖެހި ޝޮޓެއް ކީޕަރު ޕިކްފޯޑް މަތަކުރި އެވެ.
ސްޕެއިން މޮޅުކޮށްދިން ލަނޑު ޖެހުމަށް ފަހު އޮޔާޒަބާލް އާއި ނިކޯ ވިލިއަމްސް އަދި ޔަމާލް އުފާފާޅުކުރަނީ.-- ފޮޓޯ: އޭއެފްޕީ
ސްޕެއިން މޮޅުކޮށްދިން ލަނޑު ޖެހީ ބަދަލަކަށް ކުޅެން އެރި މިކޭލް އޮޔާޒަބާލް އެވެ. މެޗުގެ، 86 ވަަނަ މިނިޓްގައި އޮޔާޒަބާލް މި ލަނޑު ޖެހީ ސްޕެއިނުގެ ފުލްބެކް، މާކް ކުކުރޭލާ ނަގައިިދިން ހުރަހަކަށް އަރަ އެވެ. އިންގްލެންޑަށް ދެ ވަނަ ފަަހަރަށް އެއްވަރުކޮށްދޭން އެންމެ ރަނގަޅު ހަމަލާއެއް ފޮނުވާލީ ފަހަތަށް ކުޅޭ މާކް ގޭހީ އެވެ. ކޯނަރެއްގައި ސްޕެއިން އޭރިއާތެރެއިން ލިބުނު ފުރުސަތުގައި، ގޭހީ ބޮލުން ޖެހި ބޯޅަ ގޯލު ރޮނގުމަތިން ސަލާމަތްކުރީ އޯލްމޯ އެވެ.
މި ނަތީޖާއާ އެކު، އިންގްލެންޑް މި ވަނީ ޖެހިޖެހިގެން ޔޫރޯގެ ދެ ފައިނަލުން ބަލިވެފަ އެވެ. އެންމެ ފަހުން ޔޫރޯގައި އަމިއްލަ ގައުމުގައި ފައިނަލް ކުޅެގެން ޕެނަލްޓީ ޖަހައިގެން އިޓަލީ އަތުން އިންގްލެންޑް ވަނީ ބަލިވެފަ އެވެ. ބައިނަލްއަގުވާމީ ފުޓްބޯޅައިގައި، އިންގްލެންޑުން ހޯދި ހަމައެކަނި ކާމިޔާބީ އަކީ 1966 ވަނަ އަހަރުގެ ފީފާ ވޯލްޑް ކަޕް އެވެ.
އަނެއްކޮޅުން، ސްޕެއިންގެ ކޯޗު، ލުއިސް ޑެ ފުއެންޓޭ މި ވަނީ 19 އަހަރުން ދަށުގެ ޔޫރޯ އާއި 21 އަހަރުން ދަށުގެ ޔޫރޯގެ އިތުރުން ޔޫރޯގެ ބޮޑު މުބާރާތް ކާމިޔާބުކޮށްފަ އެވެ.
