މޯލްޑިވްސް މަނިޓަރީ އޮތޯރިޓީގެ ގަވަރުނަރު އަލީ ހާޝިމް މަގާމުން ވަކިކުރުމަށް ޓަކައި ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ހުށަހަޅާފައިވާ މައްސަލާގައި އެކޮމިޓީން މާދަމާ ބާއްވާ ބައްދަލުވުމަށް އޭނާ ހާޒިކުރަން ނިންމައިފި އެވެ.
"އަދަދު"އަށް އެނގިފައިވާ ގޮތުގައި އަލީ ހާޝިމް ހާޒިކުރާ ބައްދަލުވުން ތާވަލުކޮށްފައި އޮތީ މާދަމާ ހެނދުނު 11:00 އަށެވެ. އެ ބައްދަލުވުން ބާއްވާނީ މަޖިލީހުގެ ކޮމިޓީ ރޫމް 10 ގަ އެވެ.
ހާޝިމް ވަކި ކުރަން ރައީސް ޑރ. މުހައްމަދު މުއިއްޒަށް ލަފާ ދޭން ފުރަތަމަ ނިންމީ ވެސް މާލިއްޔަތު ކޮމިޓީންނެވެ. އޭނާ ވަކިކުރަން ކޮމިޓީއަށް ހުށަހެޅުއްވީ ކޮމިޓީގެ މެންބަރު އަދި މަޖިލީހުގެ ދިއްގަރު ދާއިރާގެ ޕީއެންސީ މެންބަރު އަހުމަދު ނާޒިމެވެ.
ނާޒިމް އެ މައްސަލަ ހުށަހަޅުއްވަމުން ވިދާޅުވީ ގަވަރުނަރު ވަކިކުރަން ލަފާ ދެނީ ގައުމުގެ އިގުތިސޯދު ހީނަރުވެ، އަލުން އަނބުރާ އިއާދަކުރަން އުނދަގޫ ހިސާބަކަށް ދިޔައިރު، އެމްއެމްއޭއަށް މަނިޓަރީ ޕޮލިސީ އޭގެ އެންމެ އެކަށޭނެ ގޮތުގައި ހިންގަމުންދާ ތަން ފެންނަމުން ނުދާ ކަމަށް ވިދާޅުވެ އެވެ.
ނާޒިމްގެ ހުށަހެޅުން ކޮމިޓީން ފާސްކޮށް މަޖިލީހުގެ ރައީސަށް ސިޓީއަކުން ދެންނެވުމުން، އެ މައްސަލަ ބަލައިގަތުމާ މެދު މަޖިލީހުގެ ތަޅުމުގައި ވޯޓެއް ނެގީ ޖުލައި 7، ގަ އެވެ. އެ ވޯޓުގައި އެ މައްސަލަ މަޖިލީހަށް ބަލައިގަންނަން ނިންމުމަށް ފަހު އަނެއްކާ ވެސް ފޮނުވީ ކޮމިޓީއަށެވެ.
