އެމެރިކާގެ ރިޔާސީ އިންތިހާބުގައި ވާދަކުރައްވާ އެ ގައުމުގެ ކުރީގެ ރައީސް ޑޮނަލްޑް ޓްރަމްޕަށް ހަމަލާދިން މީހާގެ ވަނަވަރު ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އިން ހާމަކޮށްފި އެވެ.
ރާއްޖެ ގަޑިން ފަތިހު 4:00 ހާއިރު ހިނގި އެ ހާދިސާގައި ޓްރަމްޕުގެ ކަނާއަތު ކަންފަތަށް ވަޒަނެއް އެރި އެވެ. ބަޑި ޖެހި އިރު ޓްރަމްޕު ހުންނެވީ ޕޯޑިއަމުގައި ވާހަކަ ދައްކަވާށެވެ. ބަޑީގެ އަޑު އިވުމާއެކު ޓްރަމްޕު ޕޯޑިއަމް ކައިރިއަށް ތިރިވި އެވެ. އަދި ތެދުވެވަޑައިގެންނެވިއިރު ކަންފަތުން ލޭ އާދެ އެވެ.
އެފްބީއައި އިން ބުނީ އެ ހަމަލާދީފައި ވަނީ ތޯމަސް މެތިއު ކްރޫކްސް، 20 ކަމަށާއި އޭނާއަކީ ހަމަލާދިން ސަރަހައްދު ޕެންސިލްވޭނިއާއަށް ނިސްބަތްވާ ޒުވާނެކެވެ.
"މި މައްސަލަ ދަނީ ތަހުގީގު ކުރަމުން. ކަމާ ގުޅޭ އެއްވެސް މައުލޫމާތެއް އެނގޭނަމަ އަދި ވީޑިއޯއާއި ފޮޓޯ ހުރިނަމަ ލަސްނުކޮށް ހިއްސާ ކުރުމަށް އެދެން،" އެފްބީއައި އިން ބުންޏެވެ.
އޭނާގެ ވަނަވަރު އެފްބީއައި އިން ހާމަކުރީ ޑީއެންއޭ ޓެސްޓު ކުރުމަށްފަހު ކަމަށް ރިޕޯޓްތައް ބުނެ އެވެ.
ޓްރަމްޕަށް މެތިއު ހަމަލާދިނީ ގެއެއްގެ ފުރާޅު މަތީގައި އޮށޯވެގެން އޮވެ ބަޑިއަކުންނެވެ. ނަމަވެސް ހަމަލާދިންތާ ސިކުންތުކޮޅެއްގެ ތެރޭގައި އެ ސަރަހައްދުގައި ސެކިއުރިޓީ ބަލަހައްޓަމުންދިޔަ ސީކްރެޓް ސާވިސްއިން ވަނީ ބަޑި ޖެހި މެތިއު މަރާލާފަ އެވެ.
ހަމަލާގައި އެ ސަރަހައްދަށް އެއްވެފައި ތިބި މީހުންގެ ތެރެއިން އެކަކު ވަނީ މަރުވެފަ އެވެ. އަދި އެކަކު ވަރަށް ބޮޑަށް ޒަހަމްވެ އަންނަނީ ފަރުވާދެމުންނެވެ.
