އެމެރިކާގެ ރިޔާސީ އިންތިހާބުގައި ވާދަކުރައްވާ އެ ގައުމުގެ ކުރީގެ ރައީސް ޑޮނަލްޑް ޓްރަމްޕަށް ދިން ހަމަލާއާއެކު، އެ ގައުމުގެ ސެކިއުރިޓީއާ މެދު ސުވާލު އުފައްދަން ފަށައިފި އެވެ.
ރާއްޖެ ގަޑިން ފަތިހު 4:00 ހާއިރު ހިނގި އެ ހާދިސާގައި ޓްރަމްޕުގެ ކަނާއަތު ކަންފަތަށް ވަޒަނެއް އެރި އެވެ. ބަޑި ޖެހި އިރު ޓްރަމްޕު ހުންނެވީ ޕޯޑިއަމުގައި ވާހަކަ ދައްކަވާށެވެ. ބަޑީގެ އަޑު އިވުމާއެކު ޓްރަމްޕު ޕޯޑިއަމް ކައިރިއަށް ތިރިވި އެވެ. އަދި ތެދުވެވަޑައިގެންނެވިއިރު ކަންފަތުން ލޭ އާދެ އެވެ.
އެ ހަމަލާއާ ގުޅިގެން އެމެރިކާގެ ސީކްރެޓް ސާވިސްއިން ނެރުނު ނޫސް ބަޔާނެއްގައި ބުނީ ބަޑި ޖެހި މީހާ ވަގުތުން މަރާލި ކަމަށާއި ހާދިސާގައި އެއްވުމުން އެކަކު މަރުވެ، އެކަކު ވަރަށް ބޮޑަށް ޒަހަމްވެފައިވާ ކަމަށެވެ.
ދުނިޔޭގެ އެންމެ ސެކިއުރިޓީ ވަރުގަދަ އެއް ގައުމު ކަމަށްވާ އެމެރިކާގައި މިފަދަ ހަމަލާއެއް ރިޔާސީ ކެންޑިޑޭޓަކަށް އަމާޒުކޮށް ދިނުމުން، ގިނަ ބަޔަކު އަންނަނީ ސީކްރެޓް ސާވިސް ފެއިލްވެފައިވާ ކަމަށް ބުނަމުންނެވެ.
"އެކްސް" ގައި ޝުއޫރު ފާޅުކުރަމުން އަންނަ މީހުން ބުނީ އިވެންޓުތަކަކީ ދުރާލައި ރޭވި، ސެކިއުރިޓީގެ ކަންކަން ކަށަވަރުކޮށްގެން ބާއްވާ އިވެންޓުތައް ކަމަށާއި ސީކްރެޓް ސާވިސް ބްރީޗްކޮށް ބަޑީގެ ހަމަލާ ދެވިގެން ނުވާނެ ކަމަށެވެ.
"އަހަރުމެންނަށް ފެނުނު މީހަކު ބިލްޑިންއެއްގެ ރޫފްއަށް އެރިތަން. އޭނަ އަތުގައި ރައިފަލްއެއް އޮތް. އަހަރެން ދެކޭ ގޮތުގައި ސީކްރެޓް ސާވިސްއިން އެ ސަރަހައްދުގެ ހުރިހާ އިމާރާތެއްގައި ހިނގާ ކަންކަން އެވަގުތު ބަލަން ޖެހޭނެ. މިފަދަ ހަމަލާއެއް ދެވިގެން ނުވާނެ،" ހަމަލާ ދިން ސަރަހައްދުގައި ހުރި މީހަކު ބުންޏެވެ.
ހަމަލާދިން މީހާ ވަގުތުން މަރާލުމުން ސީކްރެޓް ސާވިސްއަށް ބައެއް މީހުން އަންނަނީ ތައުރީފް ކުރަމުންނެވެ. ނަމަވެސް އެ މީހާއަށް އިނގިލި ދިއްކޮށް ސީކްރެޓް ސާވިސްއަށް ދެއްކީ އެއްވުމުގައި ތިބި މީހުން ކަމަށް ރިޕޯޓްތައް ބުނެ އެވެ.
އެމެރިކާގައި ސީކްރެޓް ސާވިސްގެ ބެލުމުގެ ދަށުން ހިންގާ އިވެންޓުތަކުގައި އަބަދުވެސް ސެކިއުރިޓީ ވަރުގަދަ ކުރެ އެވެ. އެގޮތުން މުޅި ސަރަހައްދުގެ ސަލާމަތީ ކަންކަމުގެ ފުރިހަމަ ޒިންމާ ސީކްރެޓް ސާވިސްއިން ނަގަން ޖެހެ އެވެ.
ޓްރަމްޕު އަވަހާރަކޮށްލަން އުޅުނު މީހާ ހުރީ ގާތްގަނޑަކަށް 450 ފޫޓު ދުރުގައި ހުރި ފުރާޅެއްގަ އެވެ. ޓްރަމްޕުގެ ސެކިއުރިޓީ ބަލަހައްޓަން ތިބި ސްނައިޕަރުން ވަނީ ހަމަ އެ ވަގުތު އޭނާއަށް ހަމަލާދީ މަރާލައިފަ އެވެ.
ގާތްގަނޑަކަށް ތިން ފަހަރު ޓްރަމްޕު ގަޔަށް ބަޑި ޖެހި އަޑު ވީޑިއޯއަކުން އިވެ އެވެ. ބަޑި ޖެހި އިރު ޓްރަމްޕު ކަންފަތުގައި އަތް އަޅުއްވާ މަންޒަރު ވެސް ފެނެ އެވެ. ޕޯޑިއަމުން ކައިރިއަށް ތިރިވުމަށްފަހު ތެދުވެވަޑައިގެން އަތުގެ އިޝާރާތުން ގަދަކޮށް ހުންނެވިކަން ޓްރަމްޕު ދެއްކެވި އެވެ.
މީގެ ކުރިން 2017 ވަނަ އަހަރުން ފެށިގެން ހަތަރު އަހަރު އެމެރިކާގެ ރައީސްގެ މަގާމުގައި ހުންނެވި ޓްރަމްޕުގެ ހާލުކޮޅު ރަނގަޅު ކަމަށް އޭނާގެ ތަރުޖަމާނު ވަނީ ވިދާޅުވެފަ އެވެ. އަދި އެ ހަމަލާ ވަރަށް ބޮޑަށް ކުށްވެރި ކުރާ ކަމަށް ވެސް ތަރުޖަމާނު ވަނީ ވިދާޅުވެފަ އެވެ.
ޓްރަމްޕަށް ހަމަލާދިނުމުން އެމެރިކާގެ ރައީސް ޖޯ ބައިޑެން ވަނީ ޓްރަމްޕަށް ގުޅައި ވާހަކަ ދައްކަވައިފަ އެވެ. އަދި އެ ހަމަލާ ހަރުކަށި އިބާރާތުން ކުށްވެރި ކުރައްވާ ކަމަށް ބައިޑެން ވަނީ ވިދާޅުވެފަ އެވެ.
ޓްރަމްޕަށް ހަމަލާދީފައި ވަނީ ބަޓްލާ، ޕެންސިލްވޭނިއާގައި ކުރިއަށް ގެންދިޔަ ރެލީއެއްގެ ތެރެއިންނެވެ. ޓްރަމްޕު ގަޔަށް ބަޑި ޖެހި މީހާ މަރާލީ އެމެރިކާ ސީކްރެޓް ސާވިސްގެ ސްނައިޕަރުން ކަމަށް ބެލެވެ އެވެ. ޕޯޑިއަމްއާ ދިމާލުން މަތީގައި ހުރި ފުރާޅެއްގައި ހުރެ ސްނައިޕަރަކު ރައްދުގައި ހަމަލާ ދޭ މަންޒަރު ވީޑިއޯއަކުން ފެނެ އެވެ.
އެ ހާދިސާ ހިނގި އިރު ރައީސް ޖޯ ބައިޑެން ހުންނެވީ ޗުއްޓީގަ އެވެ. ނަމަވެސް މިހާރު ޗުއްޓީ ކުރުކޮށްލެއްވުމަށްފަހު އެނބުރި ވައިޓް ހައުސްއަށް ވަޑައިގަންނަވަން އުޅުއްވާ ކަމަށް ބައެއް ރިޕޯޓުތަކުން ބުނެ އެވެ. އަދި މިހާރު އެ ހާދިސާގެ ދެ ބްރީފިންއެއް ވެސް ސީކްރެޓް ސާވިސް އިން ބައިޑެންއަށް އަރުވާފައިވާ ކަމަށް ސަރުކާރުން ބުނެ އެވެ.
