ކޮންމެ ޔޫރޯ ފުޓްބޯޅަ މުބާރާތަކަށް ވެސް ތަފާތު ބޯޅައެއް ބޭނުންކުރާއިރު، މި ފަހަރު ޖަރުމަނުގައި ކުރިއަށްދާ ޔޫރޯ އަށް ޖަރުމަނުގެ އެޑިޑާސް ކުންފުނިން ހެދި ބޯޅަ އަކީ "ފުސްބަލީބޭ" އެވެ. އޭގެ އާ ބޯޅައެއް، ސެމީ ފައިނަލާއި ފައިނަލުގައި ބޭނުންކުރާއިރު، އެއީ، "ފުސްބަލީބޭ ފައިނަލް" ނަމުން ނަން ދީފައިވާ އަޅި ކުލައިގެ ބޯޅައެެކެވެ.
ޔުއެފާ އިން ދެ ސެމީ ފައިނަލާއި ފައިނަލަށް އާ ބޯޅައެއް ހަަދަން ނިންމީ، މުބާރާތް ބާއްވާ ގައުމު ޖަރުމަނުގެ ކުލަތަކާއި ޔޫރޯގެ ޗެމްޕިއަނުންނަށް ދޭ ތަށްޓާ ގުޅުވާލުމުގެ ގޮތުންނެވެ.
މީގެ އިތުރުން، އަޅި ކުލައިގައި އެ ބޯޅަ ބޭއްވުމުގެ އަނެއް ބޭނުމަކީ، ދަނޑުގެ ލައިޓްތައް ހުންނަ ހުދު ކުލައާ ތަފާތެއް ގެނައުމުގެ ބޭނުމާ އެކު އެވެ.
މި ފަހަރުގެ ޔޫރޯގެ ސެމީ ފައިނަލާއި ފައިނަލުގެ ކުރިން، ބޭނުންކުރި "ފުސްބަލީބޭ" ބޯޅަ އަކީ ހުދު ކުލައިގެ ބޯޅަ އެކެވެ.
މި ފަހަރުގެ ޔޫރޯގެ ސެމީ ފައިނަލާއި ފައިނަލްގައި ބޭނުންކުރާ "ފުސްބަލީބޭ ފައިނަލް" ނަމުން ނަން ދީފައިވާ އަޅި ކުލައިގެ ބޯޅަ.
ޔޫރޯގެ ބޯޅަ އަށް، ޖަރުމަން ބަހުން ހެދި މި ނަމުގައި އެކުލެވޭ ދެ ބަހުގެ މާނައަކީ "ލޯބި" އަދި "ފުޓްބޯލް" އެވެ.
މި ބޯޅަ ތައްޔާރުކޮށްފައިވަނީ ތިމާވެއްޓާ ރައްޓެހި ގޮތަަކަށެވެ. މި ބޯޅަ ހެދުމަށް ރީސައިކަލްކޮށްފައިވާ ޕޮލިސްޓާ އާއި ފެން ހިމެނޭ ދެލި އަދި އެހެން ތަކެތި ބޭނުންކޮށްފައިވެ އެވެ.
"ފުސްބަލީބޭ" ބޯޅައިގެ އެންމެ ހާއްސަކަމަކީ މި ބޯޅައިގައި ހިމެނޭ ޓެކްނޮލޮޖީ އެވެ. މި ބޯޅައިގައި ހިމެނޭ ޗިޕްއެއްގެ އެހީގައި، މި އަހަރުގެ ޔޫރޯގައި ސެމީ އޮޓަމޭޓަޑް އޮފްސައިޑް ޓެކްނޮލޮޖީ ބޭނުންކުރުމުގައި އިތުރު ފުރިހަމަކަމެއް ލިބޭނެ އެވެ.
މީގެ އިތުރުން ހޭންޑްބޯލް ނިންމުންތަކުގައި މި ޗިޕްގެ ސަބަބުން ރެފްރީންނަށް ފަސޭހަވާނެ އެވެ. ބޯޅަ ކުޅުންތެރިއެއްގެ ގައިގައި ޖެހިލާއިރު، މި ޗިޕް މެދުވެރިކޮށް އެކަން އެނގޭނެ އެވެ.
ވޯލްޑް ކަޕް 2006 އިން ފެށިގެން މިހާތަނަށް ބޭއްވި ވޯލްޑް ކަޕް އަދި ޔޫރޯގައި ޖެހި ލަނޑުތަކުގެ ތެރެއިން ދުުރުން ޖަހާފައިވާ ލަނޑަކީ 13 ޕަސެންޓެވެ. އެ ސްޓެޓިސްޓިކްސް އަށް މި ފަހަރުގެ ޔޫރޯގައި ބޮޑު ބަދަލެއް ވަނީ އަތުވެފަ އެވެ. މި ފަހަރުގެ ޔޫރޯގައި މިހާތަނަށް ޖެހި ގޯލުތަކުގެ ތެރެއިން 30 ޕަސެންޓާ ގާތްކުރަނީ، އޭރިއާބޭރުން ޖެހި ގޯލެވެ.
"ފުސްބަލީބޭ ފައިނަލް" ނަމުން ނަން ދީފައިވާ އަޅި ކުލައިގެ ބޯޅަ: މިއީ މި ފަހަރުގެ ޔޫރޯގެ ސެމީ ފައިނަލާއި ފައިނަލުގައި ބޭނުންކުރާނެ ބޯޅަ.
