ޔޫރޯ ފުޓްބޯޅަ މުބާރާތުގެ ފައިނަލުގައި ސްޕެއިނާއި އިންގްލެންްޑް ކުޅޭ މެޗުގެ ރެފްރީ، ފްރާންސްގެ ފްރާންކޮއިސް ލެޓެކްސިއާ އަކީ ޕާޓް ޓައިމް އަކީ ކޮޓު އޮފިސަރެެކެވެ. ފީފާގެ ރެފްރީއެއްގެ ގޮތުގައި 2017 އިން ފެށިގެން މަސައްކަތް ކުރަމުން އަންނަ ލެޓެކްސިއާ ވެގެންދާނީ ޔޫރޯ ފައިނަލުގައި ފެންނަ އެންމެ ހަގު ރެފްރީ އަށެވެ.
އުމުރުން، 35 އަހަރާއި 82 ދުވަހުގެ، ލެޓެކްސިއާ މިރޭގެ ފައިނަލުގައި އިންސާފުކުރަން ނުކުންނައިރު، އޭނާ މި ވަނީ 24 އަހަރު ވަންދެން ސްވިޑެންގެ ރެފްރީ، އެންޑާސް ފްރިސްކް އަތުގައި އޮތް ރެކޯޑް މުގުރާލައިފަ އެވެ.
އެ ގޮތުން، 2000 ވަނަ އަހަރުގެ ޔޫރޯ ފައިނަލުގައި، އިޓަލީ އާއި ފްރާންސް ބައްދަލުކުރި މެޗުގައި ރެފްރީކަން ކުރި ފްރިސްކް އަކީ މިރޭ ފައިނަލާ ހަމައަށް ޔޫރޯގެ ފައިނަލުން ފެނުނު އެންމެ ހަގު ރެފްރީ އެވެ. އެ ފަހަރު މެޗުގެ ރެފްރީކަން ކުރިއިރު، ފްރިސްކްގެ އުމުރަކީ، 37 އަހަރާއި 137 ދުވަހެވެ. އޭގެ ކުރިން، އެ ރެކޯޑް އޮތީ، 1984 ވަަނަ އަހަރުގެ ޔޫރޯގެ ފައިނަލުގައި، ސްޕެއިނާއި ފްރާންސް ބައްދަލުކުރި މެޗުގެ ރެފްރީ، ޗެކް ރިޕަބްލިކްގެ ވޮޖްޓެކް ކްރިސްޓޯފް އެވެ. އޭނާގެ އުމުރަކީ، 39 އަހަރާއި 103 ދުވަހެެވެ.
މި ފަަހަރުގެ ޔޫރޯގެ މެޗެއްގެ ތެރެއިން ލެޓެކްސިއާ: އޭނާ އަކީ ޔޫރޯގެ ފައިނަލެއްގައި ފެންނާނެ އެންމެ ހަގު ރެފްރީ.
ލެޓެކްސިއާ، ރަސްމީކޮށް، އެންމެ މަތީ ފަންތީގައި ރެފްރީކަން ކުރަން ނުކުމެފައިވަނީ، 2016 ވަނަ އަހަރު ފްރެންޗް ލީގުގަ އެވެ. އޭނާގެ ކޮލިޓީ ރަނގަޅުވުމުން، 2017 ވަނަ އަހަރު ފީފާ ބެޖް ލިބުނެވެ. ލެޓެކްސިއާ އެންމެ ފުރަތަމަ އިންޓަނޭޝަނަލް މެޗެއްގައި އިންސާފުކުރީ 2018 ވަނަ އަހަރު ބަލްގޭރިއާ އާއި ބޮސްނިއާ ކުޅުނު މެޗުގަ އެވެ.
މިހާތަނަށް ގިނަ މުބާރާތެއްގައި އިންސާފުކުރުމުގެ ފުރުސަތު ލިބިފައިވާ ލެޓެކްސިއާ ވަނީ، މިރޭގެ ފައިނަލާ ހަމައަށް 65 މެޗުގައި އިންސާފުކޮށްފަ އެވެ. އޭގެ ތެރޭގައި ޔުއެފާގެ ޔޫތު ލީގު މުބާރާތްތަކުން ފެށިގެން ސީނިއާ މުބާރާތްތަށް ވެސް ހިމެނެ އެވެ.
ފައިނަލް މެޗަކީ ލެޓެކްސިއާ މި ފަހަރުގެ ޔޫރޯގައި ފެންނާނެ ހަތަރު ވަނަ މެޗެވެ. މީގެ ކުރިން ލެޓެކްސިއާ ވަނީ މި ފަހަރުގެ ޔޫރޯގައި ކްރޮއޭޝިއާ އާއި އަލްބޭނިއާ 2-2 އިން އެއްވަރުވި މެޗާއި ޑެންމާކާއި ސާބިއާ 0-0 އިން އެއްވަރުވި މެޗުގެ އިތުރުން، ގަދަ 16 ބުރުގައި، ސްޕެއިނުން 4-1 އިން ޖޯޖިއާ ބަލިކުރި މެޗުގައި ރެފްރީކަން ކޮށްފަ އެވެ.
މި ސީޒަނުގެ ޗެމްޕިއަންސް ލީގުގައި ރެއާލް މެޑްރިޑާއި ބޮރޫޝިއާ ޑޯޓްމަންޑް ބައްދަލުކުރި މެޗުގައި، ހަތަރު ވަނަ އޮފިޝަަލަކަށް މަސައްކަތްކުރި ލެޓެކްސިއާ އަކީ 2023 ވަނަ އަހަރު ޔުއެފާ ސުޕަ ކަޕް ފައިނަލުގައި ސެވިއްޔާ އާއި މެންޗެސްޓާ ސިޓީ ބައްދަލުކުރި މެޗުގެ ވެސް ރެފްރީ އެވެ. އަދި 2021 ވަނަ އަހަރު ވިޔަރެއާލާއި މެންޗެސްޓާ ޔުނައިޓެޑުން، ޔޫރޮޕާ ލީގުގެ ފައިނަލުގައި ކުޅުނުއިރު، ވީޑިއޯ އެސިސްޓަންޓް ރެފްރީ (ވީއޭއާރް)ގެ ޒިންމާއާ ހަވާލުވެހުރީ ލެޓެކްސިއާ އެވެ.
އެންމެ ފަހުން، ބޭއްވި ޔޫރޯގެ ފައިނަލުގައި ރެފްރީކަން ކުރީ، ނެދަލެންޑްސްގެ ރެފްރީ، ބިޖޯން ކުއިޕާސް އެވެ. މިހާރު ޔުއެފާގެ ރެފްރީސް ކޮމިޓީގައި މަސައްކަތްކުރަމުން އަންނަ ކުއިޕާސް ބުނީ، ޔޫރޯގެ ފައިނަލެއްގައި ރެފްރީކަން ކުރަން ލިބުމަކީ ފަހުރެއް ކަމަށެވެ. އަދި މި ފަހަރު ލެޓެކްސިއާ އަށް ޔޫރޯ ފައިނަލް ދޭން ނިންމުމަކީ ވަރަށް ރަނގަޅު ނިންމުމެއް ކަމަށް ކުއިޕާސް ބުނީ، މުޅި މުބާރާތަށް ބަލާއިރު، ލެޓެކްސިއާގެ ނިންމުންތައް ރަނގަޅުވުމުންނެވެ.
