ބާލިން (ޖުލައި 13) - ޔޫރޯގެ ފައިނަލްގައި އާދިއްތަ ދުވަހުގެ ރޭ އިންގްލެންޑާއި ސްޕެއިން ބައްދަލުކުރާއިރު، ސްޕެއިން އަކީ ފޭވަރިޓް ކަމަށާއި އިންގްލެންޑަށް ސްޕެއިންގެ މައްޗަށް ކުރި ހޯދޭނީ "ޓެކްޓިކަލީ" ފުރިހަމަ ކުޅުމެއް ދައްކައިގެން ކަމަށް އެ ޓީމުގެ ކޯޗު ގެރެތު ސައުތުގޭޓް ބުނެފި އެވެ.
ގައުމުން ބޭރުގައި އޮތް ބައިނަލްއަގުވާމީ ބޮޑު މުބާރާތެއްގެ ފައިނަލަށް އިންގްލެންޑް ފުރަތަމަ ފަހަރަށް ދަތުރުކުރީ ސެމީ ފައިނަލްގައި ނެދަލޭންޑްސް އަތުން 2-1 އިން ފަހަތުންއަރައި މޮޅުވެގެންނެވެ.
މިއީ، ޔޫރޯގެ ފައިނަލަށް އިންގްލެންޑް ޖެހިޖެހިގެން ދަތުރުކުރި ދެ ވަނަ ފަހަރެވެ. މިއީ ވެސް އެ ގައުމުގެ ފުޓްބޯޅަ ތާރީހުގައި ފުރަތަމަ ފަހަރަށް ހާސިލްކުރެވުނު ކަމެކެވެ.
މި މެޗަށް ސްޕެއިން ނުކުންނަނީ މި މުބާރާތުގައި ކުޅުނު ހުރިހާ މެޗަކުން މޮޅުވެގެންނެވެ. ސްޕެއިންއަކީ ޔޫރޯގެ މުބާރާތެއްގައި ޖެހިޖެހިގެން ހަ މެޗުން މޮޅުވި ފުރަތަމަ ގައުމެވެ. އަދި ފައިނަލް ކާމިޔާބުކޮށްފިނަމަ، ޔޫރޯ މުބާރާތެއްގައި ސައްތައިން ސައްތަ ރެކޯޑަކާއެކު ކާމިޔާބުކުރި ފުރަތަމަ ގައުމަށް ސްޕެއިން ވެގެންދާނެއެވެ.
ސްޕެއިންގެ ކުޅުމަށް މުބާރާތުގައި ތައުރީފް އޮހުނު ނަމަވެސް، އިންގްލެންޑް ފައިނަލަށް ދަތުރުކުރީ ގިނަ ފާޑުކިއުންތަކެއް އަމާޒުވެފައި ވަނިކޮށެވެ.
މެޗުގެ ކުރިން މީޑިއާއާ ވާހަކަދައްކަމުން އިންގްލެންޑްގެ ކޯޗު ސައުތުގޭޓް ބުނީ ފައިނަލަށް ކުރިމަތިލާއިރު ސްޕެއިން އަކީ "ފޭވަރިޓް"ކަން އޭނާވެސް ގަބޫލްކުރާ ކަމަށެވެ. އަދި ސްޕެއިންގެ މައްޗަށް ކުރި ހޯދޭނީ ފައިނަލްގައި "ޓެކްޓިކަލީ" ފުރިހަމަ ކުޅުމެއް އިންގްލެންޑް އިން ދައްކައިގެން ކަމަށެވެ.
"މި މުބާރާތުގައި ސްޕެއިން ދައްކާފައިވާ ކުޅުމަށް ބަލާއިރު އެއީ ފޭވަރިޓުން. މި މުބާރާތުގައި މިހާތަނަށް އެންމެ މޮޅު ޓީމަކަށް ފެނުނީ ސްޕެއިން،." ސައުތުގޭޓް ބުންޏެވެ.
"އިންގްލެންޑް އިން ޖެހޭނީ ޓެކްޓިކަލީ ފުރިހަމަ ކުޅުމެއް ދައްކަން. އެއީ ސްޕެއިން އަކީ މޮޅު ޓީމަކަށްވާތީ."
އިންގްލެންޑް އިން ހިތްވަރު ހޯދާނީ 2020ގެ ޔޫރޯގެ ނާކާމިޔާބުން
ޔޫރޯގެ 2020ގެ ފައިނަލްގައި އިޓަލީ އަތުން އިންގްލެންޑް ބަލިވީ ޕެނަލްޓީ ޖަހައިގެނެވެ.
އިންގްލެންޑްގެ މިޑްފީލްޑަރު ޑެކްލަން ރައިސް ބުނީ އެ މެޗުގެ ނާކާމިޔާބަކީ މި އަހަރުގެ ފައިނަލަށް ނުކުންނައިރު ކުޅުންތެރިންނަށް ލިބޭ އިތުރު "މޯޓިވޭޝަން"އެއް ކަމަށެވެ.
"އިޓަލީ އެ މުބާރާތުގެ ތަށި ހޯދި އުފުލާލި މަންޒަރު އަހަރެން ދުވަހަކުވެސް ހަނދާން ނުނެތޭނެ،" ރައިސް ބުންޏެވެ.
"އަނެއްކާވެސް މި އޮތީ އަހަރަމެންނަށް ތާރީހުން ޖާގަ ހޯދަން ފުރުސަތު ލިބިފައި. މި ފަހަރުވެސް މި ނުކުންނަނީ ވަރުގަދަ ޓީމަކާ ދެކޮޅަށް. އަހަރަމެން ސްޕެއިންއަށް އިހުތިރާމްކުރަން."
އިންގްލެންޑްގެ މިޑްފީލްޑަރު, ކޯލް ޕާމާ ބުނީ ފައިނަލް ކާމިޔާބުކުރުމަކީ އިންގްލެންޑްގެ ކުޅުންތެރިންގެ "ދިރިއުޅުން ބަދަލުވާނެ" ކަމެއް ކަމަށެވެ.
"ކުޅުންތެރިންނާއި ކުޅުންތެރިންގެ އާއިލާ އަށް ލިބޭނެ ފަހުރެއް ތަށި ކާމިޔާބުކުރުމަކީ،" ޕާލްމާ ބުންޏެވެ.
އިންގްލެންޑްގެ ކެޕްޓަން، ހެރީ ކޭން ބުނީ، އެންމެ ފަހުން ބޭއްވި ޔޫރޯ ފުޓްބޯޅަ މުބާރާތުގެ ފައިނަލުގައި ޕެނަލްޓީ ޖަހައިގެން އިޓަލީ އަތުން ބަލިވި ހަނދާން އަދިވެސް ހިތުގައި އެބަހުރި ކަމަށެވެ. އަދި އެކަމުން އަރައިގަންނަން ކުޑަ ވެސް ފުރުސަތެއް އޮތީ، މި ފަހަރުގެ ޔޫރޯގެ ފައިނަލުން މޮޅުވެގެން ކަމަށް ވެސް ކޭން ވަނީ ބުނެފަ އެވެ.
