ވ. ކޮޅުދިއްފުށި ފަޅުގައި އޮންނަ ބޮޑުފިނޮޅު ކުއްޔަށް ދިނީ އެ ކައުންސިލާ އެއްވެސް މަޝްވަރާއެއް ނުކޮށް ކަމަށް ވ. އަތޮޅު ކައުންސިލުން ބުނެފި އެވެ.
ވ. އަތޮޅު ތިނަދޫއާ އެއް ބިތެއްގައި، އެ ރަށާ 7.7 ކިލޯމީޓަރު ދުރުގައި އޮތް އެ ފިނޮޅު ވިއްކާލީ 729،000 ޑޮލަރަށް (11.2 މިލިއަން ރުފިޔާ) އަށް ރާއްޖޭގައި އެންމެ ފުޅާ ދާއިރާގެ ލޯކަލް ޓޫރިޒަމް ހިންގާ ކާނި ހޮޓެލްސްއަށެވެ.
ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައިވާ ގޮތުން އަތޮޅު ކައުންސިލް ނިސްބަތްވާ އިދާރީ ދާއިރާގެ ތެރޭގައި ހިމެނޭ އެންމެހައި ފަޅުރަށްތަކާއި، ފަޅުތައް ސަރުކާރުގެ އެއްވެސް އިދާރާއަކުން ކުއްޔަށް ދޫކުރަންވާނީ ކައުންސިލާ މަޝްވަރާ ކޮށްގެންނެވެ.
ނަމަވެސް ވ. އަތޮޅު ކައުންސިލުން ނެރުނު ނޫސް ބަޔާނެއްގައި ބުނީ ބޮޑުފިނޮޅު ސަރުކާރުން ކުއްޔަށް ދީފައިވާއިރު ކައުންސިލާ އެއްވެސް ވަރަކަށް މަޝްވަރާއެއް ކޮށްފައި ނުވާ ކަމަށެވެ.
"މިކަން މިގޮތަށް ކުރުމުން ވ.އަތޮޅުގެ ފަތުރުވެރިކަން ހަލާކުވެ ސަރަހައްދީ ފަތުރުވެރިކަމަށް ވެސް ނުހަނު ގެއްލުން ލިބުމުގެ އިތުރުން އާއްމު ރައްޔިތުންގެ ހިތްހަމަ ނުޖެހުންތަކާއި ނުތަނަވަސްކަން އުފެދި މިކަމުގެ ސަބަބުން ހީވެސް ނުކުރާފަދަ ގެއްލުންތައް ލިބިދާނެ ކަމަށް ގަބޫލު ކުރަން،" އެ ކައުންސިލުން ބުންޏެވެ.
އެ ކައުންސިލުން ބުނީ ބޮޑުފިނޮޅަކީ އެ ކައުންސިލުގެ ހަތަރުވަނަ ދައުރުގެ 11 ވަނަ ޖަލްސާގައި ދަތުރު ދިޔުމަށް އަދި ފަތުރުވެރިކަމުގެ އެޓްރެކްޝަނެއް ގޮތުގައި ތަރައްގީކޮށް ބެލެހެއްޓުމަށް ކަނޑައެޅިފައިވާ ސަރަހައްދެއް ކަމަށެވެ.
އެގޮތުން ކައުންސިލް ޖަލްސާގައި ނިންމި ގޮތަށް އެތަން ބޭނުންކުރާނެ ގޮތް ވާނީ ރައްޔިތުންގެ ފަރާތުން ރައީސުލްޖުމްހޫރިއްޔާގެ އޮފީސް އަދި ގުޅުންހުރި މިނިސްޓްރީތަކަށް ފޮނުވާފައި ކަމަށް ވެސް އެ ކައުންސިލުން ބުނެ އެވެ.
ބޮޑުފިނޮޅު ވިއްކާލުމާ ދެކޮޅަށް މިއަދު މެންދުރު "ބޮޑުފިނޮޅު މުޒާހަރާ" ގެ ނަމުގައި ބޮޑު މުޒާހަރާއެއް ވ. ކޮޅުދިއްފުށީގައި ކުރުމަށް ވަނީ ރާވާފަ އެވެ.
