ޑޯޓްމަންޑް (ޖުލައި 11) - ބަދަލު ކުޅުންތެރިއެއްގެ ގޮތުގައި ކުޅެން އަރައި ތަފާތު ދެއްކޭނެ ކަމުގެ ޔަގީންކަން އޮތް ކަމަށް ރޭ ޔޫރޯ ފުޓްބޯޅަ މުބާރާތުގެ ސެމީ ފައިނަލުގެ އިތުރު ވަގުތުގައި އިންގްލެންޑް މޮޅުކޮށްދިން ލަނޑު ޖެހި ފޯވާޑް އޮލީ ވަޓްކިންސް ބުނެފި އެވެ.
ޒަވީ ސިމޯންސް އޭރިއާބޭރުން ޖެހި ގޯލުން ނެދަލެންޑްސް ލީޑުނަގާފައި އޮއްވައި، އިންގްލެންޑުން ފުރަތަމަ ހާފުގައި އެއްވަރުކުރީ ހެރީ ކޭން ޖެހި ޕެނަލްޓީންނެވެ. ކޭންގެ ބަދަލުގައި ކުޅެން އެރި، ވަޓްކިންސް ވަނީ ލިބުނު ފުރަތަމަ ފުރުސަތުގައި، އޭރިއާތެރެއިން ގޯލުގެ ދުރު ކަނަށް ބޯޅަ ފޮނުވާލައިގެން، އިންގްލެންޑް ފައިނަލަށް ގެންގޮސްދިން ލަނޑު ޖަހައިފަ އެވެ.
"އެތައް ހަފްތާއެއް މި ކަމަށް އިންތިޒާރުކޮށްފިން. އަހަރެން މި ހުރި ހިސާބަށް އަންނަން އެތައް މަސައްކަތެއް ކޮށްފިން. ދެން، މި ފުރުސަތު ލިބުނީތީވެ ވަރަށް ބޮޑަށް އުފާކުރަން،" ބައިނަލްއަގުވާމީ ބޮޑު މުބާރާތެއްގައި އިންގްލެންޑަށް ޖަހައިދިން ފުރަތަމަ ގޯލުން ވެސް އެ ޓީމު ފައިނަލަށް ގެންގޮސްދެވުމާ ބެހޭގޮތުން ވަޓްކިންސް ބުންޏެވެ.
"އަހަންނަށް އޮތް ވަރަށް ޔަގީންކަން. އަހަރެންް މެޗަށް އެރުމުގެ ކުރިން ވެސް އަހަރެން ބުނިން، ކޯލް (ޕާމާ) ގާތުގައި، އޭނަ އަހަންނަށް ދޭ ބޯޅައަކުންނޭ އަހަރެން މޮޅުވާ ލަނޑު ޖަހާނީ، އެ ޔަގީންކަން މި ފެނުނީ، އެ ކަން ދަނޑުމަތީގައި މި ހިނގީ،"
މިއީ ގައުމުން ބޭރުގައި ކުޅޭ ބައިނަލްއަގުވާމީ މުބާރާތެއްގެ ފައިނަލުން އިންގްލެންޑް ޖާގަ ހޯދި ފުރަތަމަ ފަހަރެވެ. އަނެއްކޮޅުން، މިއީ އިންގްލެންޑްގެ ފުޓްބޯޅަ ތާރީހުގައި އެ ޓީމުން ބައިނަލްއަގުވާމީ މުބާރާތެއްގެ ފައިނަލުގައި ޖެހިޖެހިގެން ކުޅޭ ދެ ވަނަ ފަހަރެވެ. އިންގްލެންޑުން މީގެ ކުރިން 1966 ވަނަ އަހަރުގެ ފީފާ ވޯލްޑް ކަޕް ކުޅުނީ އެ ގައުމުގަ އެވެ. އަދި 2020 ވަނަ އަހަރުގެ (2021 ގައި ކޮވިޑްގެ ސަބަބުން ބޭއްވި) ޔޫރޯގެ ފައިނަލް ވެސް އޮތީ އިންގްލެންޑްގަ އެވެ.
އިންގްލެންޑުން އެންމެ ފަހުން އަމިއްލަ ގައުމުގައި ކުޅުނު ޔޫރޯ ފައިނަލުގައި އިޓަލީ އަތުން ބަލިވީ ޕެނަލްޓީ ޖަަހައިގެންނެވެ.
ރޭގެ މެޗަށް ފަހު، އިންގްލެންޑްގެ ކޯޗު ގަރެތު ސައުތުގޭޓް ބުނީ، މި މޮޅާ އެކު، އެ ޓީމުން ޓީމެއްގެ ގޮތުގައި ހޯދަމުން އަންނަ ކުރިއެރުން ވަޒަންކުރެވިއްޖެ ކަމަށާއި ދެން އޮތީ ތަށި ހޯދަން ކުރަން ޖެހޭ މަސައްކަތަށް ތައްޔާރުވުން ކަމަށެވެ.
އަންނަ އާދިއްތަ ދުވަހު ކުޅޭ ޔޫރޯގެ ފައިނަލް މެޗުގައި އިންގްލެންޑާ ދެކޮޅަށް ނުކުންނާނީ މި މުބާރާތުގެ ތަށި ތިން ފަހަރު ހޯދައި، މި ފަހަރުގެ މުބާރާތުގައި ކުޅުނު ހަ މެޗުން ވެސް މޮޅުވެ، ސައްތަ އިން ސައްތަ ރެކޯޑަކާ އެކު އޮތް ސްޕެއިން އެވެ.
