ޑޯޓްމަންޑް (ޖުލައި 11) - ޔޫރޯ ފުޓްބޯޅަ މުބާރާތުަގެ ސެމީ ފައިނަލުގައި ނެދަލެންޑްސް އަތުން 2-1 އިން އިންގްލެންޑް މޮޅުވެ، ފައިނަލަށް ދަތުރުކުރި މެޗުގައި އެ ޓީމަށް ދިން ޕެނަލްޓީ އަށް ނެދަލެންޑްސްގެ ކޯޗު ރޮނާލްޑް ކޫމަން ވަރަށް ބޮޑަށް ފާޑުކިޔައިފި އެވެ.
ހަތް ވަނަ މިނިޓްގައި ޒަވީ ސިމޯންސް ނެދަލެންޑްސް އަށް ލީޑުނަގައިދީފައި އޮއްވައި، 11 ވަރަކަށް މިނިޓް ފަހުން އިންގްލެންޑުން އެއްވަރުކުރީ މައްސަލަ ބޮޑުވި ޕެނަލްޓީއަކުންނެވެ.
އެ ގޮތުން، މެޗުގެ 18 ވަނަ މިނިޓްގައި އިންގްލެންޑްގެ ކޭން އަށް ނެދަލެންޑްސްގެ ޑެންޒެލް ޑަމްފްރީސް ކުރި ފައުލަކަށް ވީޑިއޯ އެސިސްޓަންޓް ރެފްރީ (ވީއޭއާރް) އިން އަންގައިގެން، ދަނޑުގައި ބަހައްޓާފައި ހުރި މޮނީޓަރުން ބެލުމަށް ފަހު، ރެފްރީ، ފީލިކްސް ޒްވޯޔާ ޕެނަލްޓީއެއް ދިނެވެ. ވީޑިއޯ އިން ފެންނަ ގޮތުގައި، ޑަމްފްރީސް ފައި ކޭން ގައިގައި ޖެހެނީ އޭނާ ޝޮޓް ޖަހާ ފަހުންނެވެ.
ރޭގެ މެޗުގެ ތެރެއިން ކޭން (ކ) އަށް ޑަމްފްރީސް ފައުލުކުރި ކަމަށް ބުނެ، ޕެނަލްޓީ ދިން ފައުލް.
ކޫމަން ބުނީ ވީއޭއާރްގެ އެ ނިންމުމާ ހެދި މެޗު ހަލާކުވިކަމަށެވެ.
"އަހަރެން ދެކޭ ގޮތުގައި އެއީ ޕެނަލްޓީއެއް ނޫން. ބޯޅަ ޖެހީމަ ދެން، ދެ ކުޅުންތެރިން ބޫޓު މި ޖެހިލީ. މި ވީއޭއާރްގެ ސަަބަބުން އެންމެ ރަނގަޅު ފުޓްބޯޅައެއް ކުޅެވެން ނެތް. މީގެ ސަބަބުން ފުޓްބޯޅަ ހަލާކުކޮށްލައިފި،" ހިތްހަަމަ ނުޖެހިފައި ހުރި ކޫމަން ބުންޏެވެ.
ނެދަލެންޑްސްގެ ކެޕްޓަން، ވާޖިލް ވެން ޑައިކް ބުނީ، އެ ޕެނަލްޓީގެ ނިންމުމަކީ މެޗު އެނބުރުނު ހިސާބު ކަމަށެވެ. އެ ނިންމުމާ އެކު، ލިބުނު ޕެނަލްޓީ ކާމިޔާބުކޮށް އިންގްލެންޑްގެ ކޮންފިޑެންސް ލެވަލް ރަނގަޅުވި ކަމަށް ވެން ޑައިކް ބުނެފައިވެ އެވެ.
"ވަރަށް ގިނަ ނިންމުންތައް ގޮސްފައި ހުރީ އަހަރެމެންނާ ދެކޮޅަށް. އެކަމަކު، އަހަރެން ބޭނުމެއް ނޫން ސީދާ ރެފްރީގެ ވާހަކަ ދައްކަން، މެޗުގެ ފަހު ކަށިގަނޑާ ހަމައިން ރެފްރީ ސީދާ ދުވެފައި ގޮސް ޓަނަލް އަށް ވަނީމަ، މީގެއިން ވެސް އެބަ އެނގޭ ކަންތައްތަކެއް،" ވެން ޑައިކް ބުންޏެވެ.
އަންނަ އާދިއްތަ ދުވަހުގެރޭ ކުޅޭ ފައިނަލުގައި އިންގްލެންޑް ކުޅޭނީ ސްޕެއިންއާ އެވެ.
ނެދަލެންޑްސް މި ވަނީ ރޭގެ ނަތީޖާ އަށް ފަހު ޖެހިޖެހިގެން ހަތަރު ސެމީ ފައިނަލުން ބަލިވެފަ އެވެ.
ޔޫރޯގެ ޗެމްޕިއަންކަން، 1988 ވަނަ އަހަރުގެ މުބާރާތުގައ ހޯދި ނެދަލެންޑްސް މި ވަނީ 1992، 2000، 2004 އަދި މި ފަހަރުގެ ޔޫރޯގެ ސެމީން ބަލިވެފަ އެވެ.
