ޗައިނާގެ ސިޗުއާން ޕްރޮވިންސްގެ ވިޔަފާރިވެރިންނާ ރާއްޖޭގައި ބައްދަލުކުރުމުގެ ފުރުސަތު ދިވެހި ވިޔަފާރިވެރިންނަށް އިކޮނިމިކް މިނިސްޓްރީން އިއްޔެ ހުޅުވާލައިފި އެވެ.
އިކޮނޮމިކް މިނިސްޓްރީން ކުރި އިއުލާނެއްގައި ބުނީ، ސިޗުއާންގެ ވައިސް ޗެއާމަން އޮފް ދަ ސްޓޭންޑިން ކޮމިޓީ މިސް ޒޫ ޗުންޝިއު އިސްކޮށް ހުންނަވައި ހަ މެންބަރުންގެ މައްޗަށް އެކުލެވޭ ވަފުދެއް މިއަހަރުގެ އޮގަސްޓް މަހު ރާއްޖެއަށް ރަސްމީ ދަތުރެއް ކުރެއްވުމަށް ހަމަޖެހިފައިވާ ކަމަށެވެ. މި ދަތުރާ ގުޅިގެން ސިޗުއާން ޕްރޮވިންސާއި ދިވެހިރާއްޖެއާ ދެމެދު ވިޔަފާރީގެ ގުޅުން ފުޅާކުރުމާ ގުޅޭ ގޮތުން މަޝްވަރާ ކުރުމަށް އޮގަސްޓް ހައެއްގައި ބާއްވާ ޓްރޭޑް އެންޑް އިންވެސްޓްމަންޓް ކޮންފަރަންސްގައި ސިޗުއާންގެ ވިޔަފާރިވެރިން ބައިވެރިވާނެ އެވެ.
ސިޗުއާނުން ވިޔަފާރިވެރިން އަންނަ ދާއިރާތައް
- ދަނޑުވެރިކަން
- މޭވާ އަދި ތަރުކާރީ ސަޕްލައިކުރާ ފަރާތްތައް
- ކާބޯތަކެތި އުފެއްދުމާއި، ޕްރޮސެސް ކުރުމާއި އެކްސްޕޯޓް އަދި ސަޕްލައިއާއި ބެހޭ ވިޔަފާރި
- ކޮންސިއުމާ ގުޑްސް އަދި ހޯލްސޭލް ވިޔަފާރި
- ޓޫރިޒަމާ ބެހޭ ދާއިރާ
މިނިސްޓްރީން ބުނީ މި ކޮންފަރެންސްގެ ތެރެއިން ޗައިނާގެ ވިޔަފާރިވެރިންނާ ބައްދަލުކުރަން ބޭނުންވާ ދިވެހި ވިޔަފާރިވެރިން ޖުލައި 18، ގެ 14.00 ގެ ކުރިން، ރަޖިސްޓްރީވާން ޖެހޭނެ ކަމަށެވެ. ރަޖިސްޓްރީވާން ޖެހެނީ އޮންލައިންކޮށް ފޯމެއް ފުރައިގެންނެވެ.
މިނިސްޓްރީން ބުނީ ކޮންފަރަންސްގައި ބައިވެރިވުމުގެ ފުރުސަތު ދިނުމުގައި ތަނުގެ ޖާގައަށް ބަލައި ސިޗުއާން އިން އަންނަ ވިޔަފާރިތަކާ އެންމެ ގުޅޭ ދާއިރާތަކުގެ ވިޔަފާރިތަކަށް އިސްކަންދެވޭނެ ކަމަށެވެ.
