ބިލެތްދޫ ކައުންސިލްގެ ރައީސްގެ މަގާމަށް ވާދަކުރާ ޕީއެންސީގެ ކެންޑިޑޭޓަށް ތާއިދު ނުކުރި ފ. ބިލެތްދޫ އިންޖީނުގޭގެ ސްޓޭޝަން މެނޭޖަރު، މުސާރަ ނުލިބޭ ގޮތަށް ސަސްޕެންޑުކޮށްފި އެވެ.
ބިލަތްދޫގެ އިންޖީނުގޭގެ ސްޓޭޝަން މެނޭޖަރުގެ މަގާމުގައި ހުރި އެރަށު، އަހުސަން ހުސައިން އަށް ފެނަކަ ކޯޕަރޭޝަނުން ފޮނުވި ސިޓީގައި ބުނެފައި ވަނީ އޭނާ ގުޅުންހުރި މައްސަލައެއް ތަހުގީގު ކުރަމުން ދާތީވެ މި މަހުގެ 4 ވަނަ ދުވަހުގެ ފެށިގެން މުސާރަ ނުލިބޭ ގޮތަށް ސަސްޕެންޑުކޮށްފައިވާ ކަމަށެވެ.
މި މައްސަލައިގައި އަހްސަން "އަދަދު" ނޫހަށް ބުނީ ވަޒީފާ ގުޅުން ހުރި މައްސަލައެއްގައި ސަސްޕެންޑު ކުރަންޖެހޭނެ ސަބަބެއް ނޯންނާނެ ކަމަށެވެ. ނަމަވެސް ފެނަކަ ކޯޕަރޭޝަންއިން ތަހުގީގެއް ކުރަމުން ދާކަމަށް ބުނެފައިވާތީ އިތުރު ވާހަކަ މި ވަގުތު ދައްކަން އޭނާ ބޭނުމެއް ނުވެ އެވެ.
މި މައްސަލައިގެ މައުލޫމާތު އެނގޭ ބިލެތްދޫ މީހަކު ބުނީ އަހުސަން ސަސްޕެންޑުކުރީ މި މަހުގެ 20 ގައި ބާއްވާ، ބިލެތްދޫ ކައުންސިލްގެ ރައީސްގެ މަގާމަށް ވާދަކުރާ ޕީއެންސީގެ ކެންޑިޑޭޓަށް ތާއިދު ނުކުރުމުން ކަމަށް ގަބޫލުކުރާ ކަމަށެވެ.
"އަހުސަންގެ މައްސަލައެއް ތަހުގީގުކުރަމުން ދާއިރު، އެއީ ކޮން ކަމެއް ވެސް އަންގާފައެއް ނެތް. ހަމައެކަނި ސަބަބެއް ކަމަށް އެންމެން ވެސް ގަބޫލު މި ކުރެވެނީ ޕީއެންސީގެ ކެންޑިޑޭޓަށް ތާއިދު ނުކުރުން. އަހުސަން އެ ކެންޑިޑޭޓަށް ތާއިދު ނުކުރާކަން އެންމެނަށް ވެސް އެނގޭ. ދެން ކުއްލިއަކަށް މިއައީ ސަސްޕެންޝަން،" އަދަދު ނޫހާ ވާހަކަ ދެއްކި މީހާ ބުންޏެވެ.
"މަޖިލީހުގެ އިންތިހާބާ ދިމާކޮށް ފެނަކައިން ވަރަށް ގިނަ މީހުންނަށް ވަޒީފާ ދީފައިވޭ. އަހުސަން ސަސްޕެންޑުކުރީ އެ ސްޓާފުންނަށް ވެސް ބިރު ދެއްކުމަށް ކަމަށް ގަބޫލު ކުރެވޭ."
ބިލެއްދޫ ކައުންސިލްގެ ރައީސްގެ ގޮނޑި ހުސްވީ، އެ މަގާމުގައި ހުންނެވި އަހުމަދު އަސްލަމް، ރައްޔިތުންގެ މަޖިލީހުގެ ބިލެތްދޫ ދާއިރާއަށް އިންތިހާބު ވުމުންނެވެ.
ސަސްޕެންޑުކޮށްފައިވާ އަހުސަން ފެނަކައިގެ ވަޒީފާއާ ގުޅުނީ 2021 ވަނަ އަހަރު އެވެ.
