ޑޯޓްމަންޑް (ޖުލައި 10) - ޔޫރޯ ފުޓްބޯޅަ މުބާރާތުގެ ސެމީ ފައިނަލުގެ ތައްޔާރީތަކުގެ ތެރެއިން، ނެދަލެންޑްސް އަށް ކުރިމަތިވި ދަތުރުފަތުރުގެ ޑިލޭތަކުގެ ސަބަބުން އުނދަގޫ ހާލަތެއް އައި ނަމަވެސް މެޗާ މެދު އޮތް ވިސްނުމާއި ތައްޔާރީތަކަށް ބަދަލެއް ނާންނަ ކަމަށް ނެދަލެންޑްސްގެ ކޯޗު ރޮނާލްޑް ކޫމަން ބުނެފި އެވެ.
ސެމީ ފައިނަލްގެ ތައްޔާރީތަކަށް ނެދަލެންޑްސް އިން ވުލްފްސްބާގުން، ޑޯޓްމަންޑަށް ދާން ހަމަޖެހުނު ޓްރާންސްޕޯޓްގެ ކަންކަން ފަހު ވަގުތު ވަނީ ކެންސަލްކުރަން ޖެހިފަ އެވެ. އެހެންވެ، ނެދަލެންޑްސް އިން ޓްރެއިނިން ޝެޑިއުލަށް ބަދަލު ގެނެސް، ދަތުރުކުރީ ފްލައިޓެއްގަ އެވެ.
"މާ ބޮޑު މައްސަލައެއް ނެތް، އަހަރެމެން އެ ދުވަހު އަރާމްކުރިން. އަހަރެމެން 30 މިނިޓްގެ ފްލައިޓް ދަތުރެއް ނިންމާފައި އައިސް ހޮޓަލުގައި ވެސް އަރާމްކުރަން ވަގުތު ލިބުނު،" ދަތުރުފަތުުރުގެ ޑިލޭތަކާ ހެދި ލަސްކޮށް، ބާއްވަން ޖެހުނު ނޫސްވެރިންގެ ބައްދަލުވުމުގައި ވާހަކަ ދައްކަމުން ކޫމަން ބުންޏެވެ.
މިއީ ބައިނަލްއަގުވާމީ މުބާރާތްތަކުގައި ނެދަލެންޑްސް އާއި އިންގްލެންޑްގެ ހަތަރު ވަނަ ކުރިމަތިލުމެވެ. ކޮންމެ ޓީމެއް މީގެ ކުރިން ވަނީ އެއް މެޗުން މޮޅުވެފަ އެވެ. އެކަމަކު، ނެދަލެންޑްސް އިން އެންމެ ފަހުން، އިންގްލެންޑާ ކުޅުނު ނުވަ މެޗުގެ ތެރެއިން މޮޅުވީ، އެންމެ ފަހަރަކު އެވެ. އެހެން ނަމަވެސް، އެކަމަށް މާ ބޮޑު ސަމާލުކަމެއް ނުދޭން ކޫމަން ވަނީ ނިންމައިފަ އެވެ.
"މި ދެ ޓީމުގެ (ނެދަލެންޑްސް އާއި އިންގްލެންޑްގެ) މާ ބޮޑު ފަރަގެއް ނެތްކަން އަހަންނަށް އެނގޭ، އަހަރެންގެ ނަޒަރުގައި މިއީ 50-50 މެޗެއް. މޮޅުވަންޏާ އަހަރެމެން އެބަޖެހޭ ވަރަށް ފުރިހަަމަ ގޭމެއް ކުޅެން،" ކޫމަން ބުންޏެވެ.
ކުއާޓާ ފައިނަލުގައި އިންގްލެންޑުން ސްވިޒަލެންޑް ބަލިކުރީ ޕެނަލްޓީ ޖަހައިގެންނެވެ. ނެދަލެންޑްސް އިން ވަނީ، މެޗުގެ ފުރިހަމަ ވަގުތުގައި ތުރުކީ ބަލިކޮށްފަ އެވެ. ރިކަވަރީ ވަގުތަށް ބަލާއިރު، އިންގްލެންޑަށް ލިބުނީ ނެދަލެންޑްސް އަށް ވުރެ މަދު ވަގުތެވެެ. އެއީ މިރޭގެ މެޗަށް ނުކުންނައިރު، އެޑްވާންޓޭޖެއްތޯ އެހުމުން، ކޫމަން ބުނީ، މިރޭގެ މެޗުގެ ފަހުކޮޅަށްދާއިރު، ނެދަލެންޑްސް އަށް އޭގެ ފައިދާ ކުރުމުގެ ފުރުސަތު އެބައޮތް ކަމަށެވެ.
އިންގްލެންޑާއި ނެދަލެންޑްސް ކުޅޭ ސެމީ ފައިނަލް މެޗު ފަށާނީ 12 ޖަހާއިރު އެވެ.
