ޑޯޓްމަންޑް (ޖުލައި 10) - ޔޫރޯ ފުޓްބޯޅަ މުބާރާތުގެ ސެމީ ފައިނަލުގައި މިރޭ ނެދަލެންޑްސްއާ ކުޅޭއިރު، ޓީމު ނެގުމުގެ ކަންކަމާއި ރިކަވަރީ އާއި ޓީމުގެ ވަކިވަކި ކުޅުންތެރިންގެ ފޯމާ މެދު އިންގްލެންޑްގެ ކޯޗު ގަރެތު ސައުތުގޭޓް ކުރިއަށް ވުރެ ބޮޑަށް ވިސްނަން ޖެހޭ ކަމަށް ބުނެފި އެވެ.
އިންގްލެންޑްގެ ކޯޗުކަން 2016 ވަނަ އަހަރުން ފެށިގެން ކުރަމުން އަންނަ ސައުތުގޭޓް މި ފަހަރުގެ މުބާރާތުގައި އެ ޓީމަށް ކާމިޔާބު ހޯދައިނުދެވިއްޖެނަމަ މަގާމުގައި ދެމިނުހުރެވޭނެ މޭރުމަަކުން ވެސް ވަނީ ވާހަކަ ދައްކައިފަ އެވެ. އެހެންކަމުން، މިރޭ ނެދަލެންޑްސްއާ ދެކޮޅަށް އިންގްލެންޑް ކުޅޭ މެޗަކީ، ސައުތުގޭޓްގެ މުސްތަގުބަލާ ވަރަށް ބޮޑަށް ގުޅިފައި އޮތް މެޗެކެވެ.
މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި، ސައުތުގޭޓް ވަނީ އޭނާ އިނގިރޭސި ޓީމު ނަގާގޮތް މީޑިއާގެ ބަހުސަކަށްވާއިރު، ބައެއް ފަހަރު، އިދިކޮޅު ޓީމަށް މުހިންމު މައުލޫމާތުތަކެއް ލިބޭ ގޮތަށް ޓީމުގެ މައުލޫމާތު ލީކުވުމަކީ ކަންބޮޑުވުމެއް ކަމަށެވެ. އެކަމަކު، އެ އަށް ވިސްނަން ޖެހޭ ވަރަށް ވުރެ މިހާރު ފުޓްބޯޅައިގެ ކަންކަން ތަފްސީލީ ނަޒަރަކުން ބަލާތީއާ އެކު، ޓީމު ނެގުމުގެ ކަންކަން ބޮލުގެ ރިހުމަކަށްވާ ކަމަށެވެ.
"އެންމެ ހާއްސަ ކަމަކަށް ކުރަން ޖެހޭ ކަމަކީ ރަނގަޅު ޓީމު ނެގުން. ރަނގަޅަށް ސްކޮޑު މެނޭޖްކުރުން. މިހާރު ފުޓްބޯޅައިގައި މި ގެންގުޅޭ ރިކަވަރީ ސްޓްރެޓަޖީސް މި ފެންނަނީ މުޅިން ތަފާތުކޮށް، ވަރަށް ތަފްސީލުކޮށް ފުޓްބޯޅައިގެ ސައިންސް ކަންކަން މި ހުންނަނީ، އެހެންވީމަ، މުބާރާތެއްގެ ފަހުކޮޅަށްދާއިރު ކޯޗަށް އޮންނަ ބޮލުގެ ރިހުން ބޮޑު،" ސައުތުގޭޓް ބުންޏެވެ.
ކުއާޓާ ފައިނަލުގައި ސްވިޒަލެންޑް އަތުން މޮޅުވި މެޗުގައި، ދެއްކި ހިތްވަރަށް ވުރެ އެއް ހަރުފަތް މައްޗަށް ޓީމުގެ ހުރިހާ ކަމެއް ގެންގޮސްގެން ނޫނީ އިންގްލެންޑަށް ނެދަލެންޑްސްގެ މައްޗަށް ކާމިޔާބު ނުހޯދޭނެ ކަމަށް ސައުތުގޭޓް ވަނީ ބުނެފަ އެވެ.
އިންގްލެންޑް ކުޅުންތެރިން މިރޭގެ މެޗުގެ ކުރިން ޕެނަލްޓީ ޝޫޓައުޓާ ބެހޭގޮތުން، މަޝްވަރާ ކުރުމާއި މީޑިއާ އިންޓަވިއު ދިނުން ސައުތުގޭޓް ވަނީ މަނާކޮށްފަ އެވެ. އަދި ޕެނަލްޓީ އަށް ތައްޔާރުވުމަކީ ވަކި ޑިޕާޓްމަންޓެއްގެ ކަމެއް ކަމަށް ސައުތުގޭޓް ވަނީ ބުނެފަ އެވެ.
މިއީ ބައިނަލްއަގުވާމީ މުބާރާތްތަކުގައި ސްޕެއިނާއި ނެދަލެންޑްސް ކުޅޭ ހަތަރު ވަނަ މެޗެވެ. މީގެ ކުރިން، 1988 ވަނަ އަހަރުގެ ޔޫރޯގައި ނެދަލެންޑްސް 3-1 އިން ވަނީ މޮޅުވެފަ އެވެ. އަދި 1990 ވަނަ އަހަރުގެ ވޯލްޑް ކަޕްގައި ލަނޑެއް ނުޖެހި އެއްވަރުވިއިރު، 1996 ވަނަ އަހަރުގެ ޔޫރޯގައި އިންގްލެންޑް ވަނީ 4-1 އިން ނެދަލެންޑްސް ބަލިކޮށްފަ އެވެ.
ނެދަލެންޑްސް އާއި އިންގްލެންޑް ކުޅޭ މި ފަހަރުގެ ޔޫރޯގެ ސެމީ ފައިނަލް ފަށާނީ މިރޭ 12 ޖަހާއިރު އެވެ.
