މިއުނިކް (ޖުލައި 9) - ޔޫރޯ ފުޓްބޯޅަ މުބާރާތުގެ ސެމީ ފައިނަލުގައި ނެދަލެންޑްސް އާއި އިންގްލެންޑް ބައްދަލުކުރާ މެޗަށް، މީގެ ކުރިން މެޗު ފިކްސިން މައްސަލައެއްގައި އަދަބު ލިބިފައިވާ ރެފްރީއެއް ކަމަށްވާ، ފީލިކްސް ޒްވޯޔާ އަރާތީވެ، އެ ކަމާ ގިނަ ބަޔަކު ކަންބޮޑުވުން ފާޅުކޮށްފި އެވެ.
ޒްވޯޔާ، 43، އަށް މީގެ ކުރިން ވަނީ މެޗު ފިކްސިންއާ ގުޅޭ މައްސަލައެއްގައި، 2005 ވަނަ އަހަރު ހަ މަސް ދުވަހުގެ އަދަބެއް ލިބިފަ އެވެ. އެއީ ޒްވޯޔާ، ލައިންސްމަނެއްގެ ގޮތުގައި ހަރަކާތްތެރިވިއިރު، ޓީމެއްގެ އޮފިޝަލެއް އަތުން، 250،000 ޕައުންޑް ނަގާފައިވާ ކަން ފަޅާއެރުމުންނެވެ.
ޒްވޯޔާ އެކަން ކޮށްފައިވަނީ، ރެފްރީ، ރޮބާޓް ހައުޒާއާ ގުޅިގެންނެވެ. މި މައްސަލައިގައި ރެފްރީ ހައުޒާ އަށް އައިސްފައިވަނީ އުމުރުދުވަހުގެ ސަސްޕެންޝަނެކެވެ.
މީގެ ކުރިން، ޒްވޯޔާ މެޗެއްގެ ރެފްރީ އަކަށް ހަމަޖެއްސުމުން، އިނގިރޭސި މިޑްފީލްޑަރު، ޖޫޑް ބެލިންހަމް ވަނީ އެކަމަށް ފާޑުކިޔައިފަ އެވެ.
އެ ގޮތުން، 2021 ވަނަ އަހަރު ޖަރުމަނުގައި، ބަޔާން މިއުނިކް އަތުން 3-2 އިން ޑޯޓްމަންޑް ބަލިވި މެޗަށް ފަހު، އޭރު ޑޯޓްމަންޑަށް ކުޅުނު ބެލިންހަމް ބުނީ، ކުރިން މެޗު ފިކްސްކޮށްފައި ހުރި ރެފްރީއެއްގެ އަތްމައްޗަށް ޖަރުމަނު ފުޓްބޯޅައިގެ މުހިންމު މެޗެއް ދިނުމުން އުންމީދު ވެސް ކުރެވޭނީ މި ކަހަލަ ކަމަކަށް ކަމަށެވެ. މިހެން ބުނުމުން، ބެލިންހަމް ވަނީ 40،000 ޑޮލަރުން ޖޫރިމަނާކޮށްފަ އެވެ.
ޒްވޯޔާ، މި މެޗުގެ ރެފްރީ އަކަށް ހަމަޖައްސާފައިވާތީ އިނގިރޭސި މީޑިއާ އިން ތަކުރާރުކޮށް، އިނގިރޭސި އެފްއޭގެ ބަހެއް ހޯދަން ކުރި މަސައްކަތް ކާމިޔާބެއްްނުވި އެވެ. އެކަމަކު، އެފްއޭގެ ބައެއް އޮފިޝަލުންނާ ހަވާލާދީ، އިނގިރޭސި ބައެއް މީޑިއާތަކުން ރިޕޯޓްކޮށްފައިވާ ގޮތުގައި، އިނގިރޭސި އެފްއޭގެ ހިތްހަަަމަނުޖެހުންތަކެއް މިކަމާ މެދު އެބަހުއްޓެވެ.
ރިޕޯޓްތައް ބުނާގޮތުން، ޔުއެފާ އިން ވަނީ ޒޯވްޔާ ބަދަލުނުކުރަން ނިންމައިފަ އެވެ.
އަނެއްކޮޅުން، ޔުއެފާ އިން ވަނީ ޖަރުމަނާއި ސްޕެއިން ބައްދަލުކުރި މެޗުގައި ރެފްރީކަން ކުރި، އިނގިރޭސި ރެފްރީ، އެންތަނީ ޓޭލާ އަށް މި ފަހަރުގެ މުބާރާތުގައި އިތުރު މެޗެއް ނުދޭން ނިންމައިފަ އެވެ. ކުއާޓާ ފައިނަލުގައި، ސްޕެއިނުގެ މާކް ކުކުރޭލާ އަތުގައި ބޯޅަޖެހި، ޕެނަލްޓީ އަކަށް ޖަރުމަނުން އެޕީލްކުރި ނަމަވެސް ޓޭލާ ވަނީ ވީޑިއޯ އެސިސްޓަންޓް ރެފްރީ (ވީއޭއާރް)ގެ ލަފަޔާ އެކު ޕެނަލްޓީއެއް ނޫން ކަމަށް ނިންމައިފަ އެވެ.
އެ މެޗަށް ފަހު، ޔުއެފާ އިން ވަނީ، ރެފްރީންގެ ޕެނަލްގެ ލަފަޔާ އެއްގޮތަށް ޓޭލާ ނިންމުން ނިންމީ ރަނގަޅަށް ކަމަށް ބުނެފަ އެވެ.
އެކަމަކު، ޖަރުމަނާއި ސްޕެއިން ކުޅުނު މެޗު އަލުން ކުޅެން، ޕެޓިޝަނެއް ފަށައި، އެ އަށް 35000 އެއްހާ ސޮއި ހަމަކޮށްފައިވާއިރު، މި މައްސަލަ އިތުރަށް ކޮންޓްރޯލް ކުރުމުގެ ގޮތުންނާ އެކު، ޔުއެފާ އިން ވަނީ ޓޭލާ އަށް މި ފަހަރުގެ މުބާރާތުގައި އިތުރު މެޗެއް ނުދޭން ނިންމައިފަ އެވެ.
