އުރީދޫ މޯލްޑިވްސްގެ ދައުވަތަކަށް މަޝްހޫރު ގިނަ ކްލަބްތަކަށް ކުޅެފައިވާ އޮގަސްޓީން އަޒުކާ "ޖޭ ޖޭ" އޮކޯޗާއާ އެކު ރާއްޖޭގެ ލެޖެންޑުން މާޒިޔާ ސްޕޯޓްސް އެންޑް ރެކްރިއޭޝަން ކްލަބާ ދެކޮޅަށް މެޗެއް ކުޅެފި އެވެ.
އުރީދޫގެ ޕްރީމިއަމް ޕާޓްނަރު ޕީއެސްޖީއާ އޮތް ޕާޓްނާޝިޕްގެ ދަށުން ރާއްޖެ އައި އޮކޯޗާ ހިމެނުނު ލެޖެންޑުންގެ ޓީމުގައި ރާއްޖޭގެ އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ވެސް ހިމެނުނެވެ.
ފޯރިގަދަ ކުޅުމެއް ފެނިގެންދިޔަ މި މެޗު ނިމުނީ 5-7 ގެ ނަތީޖާއަކުން މާޒިޔާ މޮޅުވެގެންނެވެ. މެޗުގެ މޮޅު ކުޅުންތެރިޔަކަށް ހޮވިފައި ވަނީ ލެޖެންޑުން ޓީމުގައި ހިމެނުނު އަލީ އަޝްފާގު އެވެ.
ލެޖެންޑުންގެ ޓީމުގައި ރާއްޖޭގެ ކުރީގެ ގައުމީ ޓީމު ކެޕްޓަން މުހައްމަދު ކަލީމްގެ އިތުރުން ނައިބް ރައީސް ހުސެއިން މުހައްމަދު ލަތީފް (ސެމްބެ)، ސްޕޯޓްސް މިނިސްޓަރު އަބްދުﷲ ރާފިއު (ރާއްޕެ) އަދި އުރީދޫގެ ސީއީއޯގެ ހާލިދު އަލް ހަމާދީ ހިމެނުނެވެ.
އެ ޓީމުގެ ކޯޗަކީ ގައުމީ ފުޓްބޯޅަ ޓީމުގެ ކޯޗު އަލީ ސުޒޭން އެވެ.
އޮކޯޗާއާއެކު ރާއްޖޭގެ ލެޖެންޑުން ފުޓްސަލް މެޗެއް ކުޅުން -- ފޮޓޯ: އަތޫފް އާތިފް / އަދަދު
އުރީދޫ މޯލްޑިވްސްގެ އެކްޓިން ޗީފް ކޮމާޝަލް އޮފިސަރު (ސީސީއޯ) ހުސެއިން ނިޔާޒް ވިދާޅުވީ އުރީދޫއިން ކުރިއަށް ގެންދިޔަ މި ހަރަކާތަކީ ވަރަށް ކާމިޔާބު ހަރަކާތެއް ކަމަށެވެ. އަދި މި ހަރަކާތުން ގިނަ ބަޔަކަށް އުފާވެރިކަން ގެނެސް ދެވުމުގެ އިތުރުން ޔޫރަޕުގައި ރާއްޖެ އިސްތިހާރު ވެސް ކުރެވުނު ކަމަށް ވެސް ނިޔާޒް ދެކިލައްވަ އެވެ.
ލެޖެންޑުންގެ ޓީމުގެ ކޯޗު ސުޒޭން ބުނީ މިފަދަ ހަރަކާތެއް އުރީދޫގެ ފަރާތުން ބޭއްވުމުން ފުޓުބޯޅަ މިއޮތް ހާލަތުން ކޮންމެވެސް ވަރެއްގެ ދިރުމެއް ގެނެސްފި ކަމަށެވެ. އަދި މިފަދަ ހަރަކާތްތައް ގިނަގިނައިން ބާއްވަން ޖެހޭ ކަމަށް ސުޒޭން ގަބޫލުކުރެ އެވެ.
އޮކޯޗާ ޕީއެސްޖީ އެކަޑަމީ ކޯޗިން ކްލިނިކާ އެކު ކުޑަކުދިންނަށް ހާއްސަކޮށްގެން ހަރަކާތެއް ވެސް ވަނީ ހިންގާފަ އެވެ. އެ ހަރަކާތުގައި އެކަޑަމީތަކުގެ ކުދިން ބައިވެރިވި އެވެ.
އޮކޯޗާއާ އެކު އުރީދޫއިން ވަނީ ގިނަ ހަރަކާތްތައް ހިންގައިފަ އެވެ. އެގޮތުން އުރީދޫ ފަން ރަން ލާމު އެޑިޝަންގައި ވެސް އޭނާ ވަނީ ބައިވެރިވެފަ އެވެ. އެ މަންޒަރުތައް ޕީއެސްޖީގެ އޮފިޝަލް ސޯޝަލް މީޑިއާ ހެންޑަލްތަކުން ދެއްކި އެވެ.
