އިދިކޮޅު މައި ޕާޓީ، އެމްޑީޕީގެ ނައިބު ރައީސްގެ މަގާމަށް އެ ޕާޓީގެ ލީގަލް ޑިރެކްޓަރު ހިސާން ހުސެއިން އައްޔަންކުރަން ހުށަހަޅާފައިވާ ކަމަށް އެ ޕާޓީގެ ރައީސް އަބްދުﷲ ޝާހިދު މިއަދު ވިދާޅުވެއްޖެ އެވެ.
ޝާހިދުގެ ރަސްމީ އެކްސް އެކައުންޓުން ކުރެއްވި ޕޯސްޓެއްގައި އޭނާ ވިދާޅުވީ، ހިސާން އެ މަގާމަށް އައްޔަނު ކުރަން ގައުމީ މަޖިލީހުގެ ރުހުން އޮތްތޯ ބެލުމަށް އަސާސީ ގަވާއިދުގައިވާ ގޮތަށް ހުށަހެޅުއްވީ މިއަދު ކަމަށެވެ.
"އަލްއުސްތާޒާ ހިސާން ހުސެއިން މިޕާޓީއަށާއި، ޕާޓީގެ މެމްބަރުންނަށް ކޮށްދެއްވާފައިވާ އިހުލާސްތެރި ގިނަގުނަ ހިދުމަތްތަކަށް ބަލާއިރު، އެކަމަނާއަކީ މި މަގާމަށް އެންމެ އެކަށީގެންވާ ބޭފުޅެއް ކަމަށް އަޅުގަނޑު ދެކެން،" ޝާހިދު އިތުރަށް ލިޔުއްވާފައިވެ އެވެ.
އެ ޕާޓީގެ ލީޑަޝިޕުގައި އަންހެނުން މަދުވުމަކީ ވެސް ހިސާން ނައިބު ރައީސްގެ މަގާމަށް އައްޔަން ކުރަން ވިސްނި ސަބަބެއް ކަމަށް ވެސް ޝާހިދު ވިދާޅުވި އެވެ.
ހިސާން އަކީ ނިމިދިޔަ އެމްޑީޕީގެ ސުޕަމެޖޯރިޓީ އޮތް މަޖިލީހުގެ ތުޅާދޫ ދާއިރާގެ މެންބަރެވެ. ނަމަވެސް 20 ވަނަ މަޖިލީހަށް އޭނާ ވާދައެއް ނުކުރައްވަ އެވެ. ކުރިން އޮތް 19 ވަނަ މަޖިލީހުން ޖޭއެސްސީއަށް ކަނޑައެޅި މެންބަރުގެ ގޮތުގައި ހިސާން ވަނީ ވެއެތުވެދިޔަ ފަސް އަހަރު އެ ކޮމިޝަނުގެ މެންބަރުކަން ވެސް އަދާކުރައްވާފަ އެވެ.
އެމްޑީޕީގެ މުޒާހަރާއެއްގެ ތެރެއިން ހިސާން: އޭނާ އެމްޑީޕީގެ އިސް ސަފުގައި 17 އަހަރު ހޭދަކުރައްވާފައިވޭ - ފޮޓޯ: އެމްޑީޕީ
އެކި މަގާމުތަކުގައި ހިސާން އެމްޑީޕީއަށް މަސައްކަތް ކުރައްވާތާ މިހާރު 17 އަހަރަށްވުރެ ގިނަ ދުވަސްވެއްޖެ އެވެ.
އެމްޑީޕީގެ ތެރެއިން ފާހަގަކޮށްލެވޭ މަސައްކަތެއްގެ ގޮތުގައި ހިސާން އެންމެ ފުރަތަމަ ކުރެއްވީ، 2007 ގައި އެ ޕާޓީން އުފެއްދި ޝެޑޯ ކެބިނެޓުގެ ޝެޑޯ މިނިސްޓާ، ލޯ އެންޑް ޖަސްޓިސްގެ މަގާމެވެ. އޭގެ ފަހުން އެ ޕާޓީގެ ފުރަތަމަ ވެރިކަމުގައި ލީގަލް އެފެއާޒް ސެކްރެޓަރީކަން ވެސް ކުރެއްވި އެވެ.
އޭނާ ޕާޓީގެ ލީގަލް ޑިރެކްޓަރުގެ މަގާމު އަދާކުރައްވަން ފެށީ 2012 ވަނަ އަހަރެވެ. މިއަދާ ހަމައަށް ވޭތުވެދިޔަ 12 އަހަރެއްހާ ދުވަހު ޕާޓީއަށް ދިމާވި ގާނޫނީ ގިނަ ގޮންޖެހުންތަކުގައި ހިސާންގެ މަސައްކަތް ފާހަގަކުރެވެ އެވެ. އެގޮތުން ހާއްސަކޮށް 2012 އިން 2018 އަށް އެމްޑީޕީ އިދިކޮޅުގައި އޮތް ދުވަސްވަރު ޕާޓީގެ ގިނަ އިސްވެރިން ޖަލަށްލުމުން އަދި ސަރުކާރުން ކުރިމަތިކުރި ދައުވާތަކުގެ ދިފާއުގައި އޭނާ ވަނީ ގިނަ މަސައްކަތްތަކެއް ކުރައްވާފަ އެވެ.
އިދިކޮޅުގައި އޭރު އޮތް ޕާޓީތަކުން އެކުވެ 2016 ގައި އުފެއްދި ޝެޑޯ ކެބިނެޓުގައި ވެސް މަސައްކަތް ކުރައްވާ ހަމަ އެ އަހަރު، އޭރު އޮތް ޕީޕީއެމްގެ ސަރުކާރާއެކު ބޭއްވި އޯލް ޕާޓީ ޓޯކްސްގައި އެމްޑީޕީ ތަމްސީލުކުރެއްވީ ވެސް ހިސާން އެވެ.
