ގައުމުގެ މާލީ ހާލަތު ފޮރުވާ، 'ވާނުވާ' ގައި ބާއްވައިގެން ސަރުކާރަށް ލިބޭނެ ކުރިއެރުމެއް ނެތް ކަމަށް އިދިކޮޅު މައި ޕާޓީ, އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެ އެވެ.
އޭނާ މިހެން ވިދާޅުވެފައި މިވަނީ، ރާއްޖޭގެ މާލީ ހާލަތު ރަނގަޅު ކުރުމަށާއި ކުރިއަށް އޮތްތަނުގައި ހަރަދު ކުޑަކުރުމުގެ ގޮތުން ނިޒާމީ ބޮޑެތި ބަދަލުތަކެއް ގެންނަން ވިސްނަވާ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެފައި ވަނިކޮށެވެ.
އެގޮތުން ލާމަރުކަޒީ ނިޒާމު އިސްލާހުކޮށް، ކައުންސިލްތަކުގެ މެންބަރުންގެ އަދަދު މަދުކޮށް، ރިޔާސީ އަދި މަޖިލިސް އިންތިހާބު އެކުއެކީގައި ބޭއްވުމުގެ ވިސްނުން ގެންގުޅުއްވާ ކަމަށް ވެރިކަންކުރާ ޕީއެންސީގެ ޖަގަހަ ޖަލްސާއެއްގައި ރައީސް ރޭ ވިދާޅުވި އެވެ.
ރައްދުގައި ފައްޔާޒު ވިދާޅުވީ ނިޒާމަށް ބަދަލުތަކެއް ގެންނަން ޖެހުނު ނަމަވެސް އެކަން ކުރަން ޖެހޭނީ ރައްޔިތުންގެ މަޝްވަރާއާއެކު ކަމަށެވެ.
"ކައުންސިލްގެ އަދަދު މަދުކުރުން, މަޖިލިސް އަދަދު މަދުކުރުން, މިކަންކަން ކުރުމުގެ ކުރިން ރައްޔިތުންގެ ހިޔާލާއި މަޝްވަރާ ފުޅާ ދާއިރާއެއްގައި ހޯދަން ޖެހޭ، ނަމަވެސް ދެބޯގެރި ދުއްވުމުގެ ބަދަލުގައި މިހާރުން މިހާރަށް ކުރެވެން ހުރި ކަންކަން ކުރުން މުހިންމު،" އެކްސްގައި ކުރެއްވި ޕޯސްޓެއްގައި އޭނާ ވިދާޅުވި އެވެ.
އޭގެއިތުރުން، ގައުމުގެ މާލީ ހާލަތު ރަނގަޅު ކަމަށް ވަޒީރުން ވިދާޅުވި ނަމަވެސް ރައްޔިތުން ހިތި ބޭސް ބޯން ޖެހޭ ވާހަކަ ސަރުކާރުގެ ވެރިން ދެއްކުމުން ރައްޔިތުންނާއި އިންވެސްޓަރުން އަދި ފައިނޭންސަރުންގެ އިތުބާރު ގެއްލޭނެ ކަމަށް ވެސް މިދިޔަ ސަރުކާރުގެ އިކޮނޮމިކް މިނިސްޓަރު ވިދާޅުވި އެވެ.
މާލީ ހާލަތު ސާފުވާން ޖެހޭކަން ތަކުރާރުކުރައްވާ ފައްޔާޒު ވަނީ ވިޔަފާރިތަކާއި ކިޔަވަން ބޭރުގައި ތިބި ދަރިވަރުންނަށް ދޭން ޖެހޭ ފައިސާ ދޭނެ ގޮތެއްވެސް ސަރުކާރުން ހާމަކުރަން ޖެހޭ ކަމަށެވެ.
އިދިކޮޅުގެ ގޮތުގައި އޮތަސް އެމްޑީޕީން ރައްޔިތުންނަށް ހެވަށް ކުރާ ކަންކަން ބަލައިގަންނާނެ ކަމަށްވެސް ފައްޔާޒު ވިދާޅުވެފައިވެ އެވެ.
