ބާލިން (ޖުލައި 7) - ޔޫރޯ ފުޓްބޯޅަ މުބާރާތުގެ ސެމީ ފައިނަލުގައި އިންގްލެންޑާ ދެކޮޅަށް ކުޅޭ މެޗަކީ ވަރަށް އުނދޫވާނެ މެޗެއް ކަމަށާއި މިހާރު ހުރިހާ ފޯކަސް އެއް ހުރީ ރަނގަޅު ތައްޔާރީތަކަކާ އެކު އެ މެޗުން މޮޅުވާން ކުރަން ހުރި މަސައްކަތަށް ކަމަށް ނެދަލެންޑްސްގެ ކެޕްޓަން، ވާޖިލް ވެން ޑައިކް ބުނެފި އެވެ.
ވިހި އަހަރަށް ފަހު، ނެދަލެންޑްސް އިން ޔޫރޯ ފުޓްބޯޅަ މުބާރާތެއްގެ ސެމީ ފައިނަލަށް ދަތުރުކުރީ ރޭ ކުޅުނު ކުއާޓާ ފައިނަލް ފަހު މެޗުގައި، ފަހަތުން އަރައި 2-1 އިން ތުރުކީ ބަލިކުުރުމަށް ފަހު އެވެ.
ތުރުކީ މެޗަށް ފަހު، ނެދަލެންޑްސްގެ ތަރި ވެން ޑައިކް ބުނީ، ތުރުކީ އަތުން ހޯދުނީ އުނދަގޫ މޮޅެއް ކަމަށާއި ދެން އޮތީ ވެސް އެ ވަރުގެ ޗެލެންޖެއް ކަމަށެެެވެ.
"މި މެޗުން މޮޅުވާން ވެސް ކުރެވެން ހުރި ހުރިހާ މަސައްކަތެއް އަހަރެމެން ކުރިން. ދެން އޮތީ ރަނގަޅަށް ރިކަވާވެގެން ކުރިއަށް އޮތް އުނދަގޫ މެޗަށް ތައްޔާރުވާން. އަހަރެމެންނަށް އެނގޭ ދެން އޮތީ ވެސް އުނދަގޫ މެޗެއްކަން، އެކަމަކު، ހިތްވަރާ އެކު ކުރިއަށް ގޮސްފިނަމަ މި ޓީމަށް ނުކުރެވޭނެ ކަމެއް ނެތް، އަހަރެން މި ހުރީ ތައްޔާރަށް، ހުވަފެން ހަގީގަތަކަށް ހަދަން،" ފުރަތަމަ ފަހަރަށް ޔޫރޯއެއްގައި ކުޅޭ ވެން ޑައިކް ބުންޏެވެ.
މި ފަހަރުގެ ޔޫރޯގެ ލަނޑު ލިސްޓުގެ އެންމެ ކުރީގައި އޮތީ ނެދަލެންޑްސްގެ ކޯޑީ ގަކްޕޯ އެވެ. އޭނާ ވަނީ ހަތަރު ލަނޑު ޖަހައިފަ އެެވެ. އިނގިރޭސި ޕްރިމިއާ ލީގުގެ ލިވަޕޫލަށް ކުޅެމުން އަންނަ ގަކްޕޯ ބުނީ، އިންގްލެންޑް ޓީމުގައި ތިބީ ދަންނަ ކުޅުންތެރިން ކަމަށާއި އެކަމަކު، ގައުމީ ޓީމުގެ ލެވަލްގައި ތަފާތުވާނެ ކަން ގަބޫލުކުރަން ޖެހޭ ކަމަށެވެ.
"އަހަރެމެން އެންމެން ވެސް ގަބޫލުކުރަން ޖެހޭ، ގައުމީ ޓީމުގެ ލެވަލް ތަފާތު، މުބާރާތް ތަފާތު. ޔަގީންކަމަކީ، އިންގްލެންޑާއި ނެދަލެންޑްސް ވެސް މިހާރު އެ ދައްކާ ކުޅުމަށް ވުރެ މޮޅަށް ކުޅޭނެ،" ގަކްޕޯ ބުންޏެވެ.
ނެދަލެންޑްސްގެ ކޯޗު ރޮނާލްޑް ކޫމަން ބުނީ، ގިނަ ބަޔަކު އިންގްލެންޑްގެ އިންޑިވިޖުއަލް ހުނަރުގެ ވާހަކަ ދައްކާ ގޮތަށް ނެދަލެންޑްސްގެ ވެސް ވާހަކަ ދެއްކޭނެ ކަމަށެވެ.
ނެދަލެންޑްސް އާއި އިންގްލެންޑް ކުޅޭ ސެމީ ފައިނަލް މެޗު އޮތީ އަންނަ ބުދަ ދުވަހުގެރޭ 12 ޖަހާއިރު އެވެ.
