މިއުނިކް (ޖުލައި 7) - މި ފަހަރުގެ ޔޫރޯ ފުޓްބޯޅަ މުބާރާތުގައި ވާދަކުރާ ޓީމުތަކުގެ ތެރެއިން އެންމެ މޮޅީ ސްޕެއިން ކަމަށް އެ ޓީމާ ދެކޮޅަށް ސެމީ ފައިނަލުގައި ކުޅޭ ފްރާންސްގެ ކޯޗު ޑިޑިއޭ ޑެޝޯމްޕްސް ބުނެފި އެވެ.
ޔޫރޯގެ ޗެމްޕިއަންކަން ތިން ފަހަރު ހޯދާފައިވާ ސްޕެއިނަކީ ސެމީ ފައިނަލަށް ދަތުރުކުރި ހަތަރު ޓީމުގެ ތެރެއިން ހުރިހާ މެޗަކުން މޮޅުވެގެން ސައްތަ އިން ސައްތަ ރެކޯޑަކާ އެކު އައި ހަމައެކަނި ޓީމެވެ. އަނެއްކޮޅުން، ސްޕެއިނުން ވަނީ ކުއާޓާ ފައިނަލުގައި 2-1 އިން ޖަރުމަނު ބަލިކޮށްފަ އެވެ. ފްރާންސުން ސެމީގައި ސްޕެއިނާ ކުޅެން ފުރުސަތު ހޯދީ ކުއާޓާ ފައިނަލުގައި ޕެނަލްޓީ ޖަހައިގެން ޕޯޗުގަލް ބަލިކުރުމަށް ފަހު އެވެ.
"ޝައްކެއް ވެސް ނެތް ގޮތުގައި އެންމެ މޮޅީ އެ މީހުން (ސްޕެއިން). އަހަރެން އެ މީހުން (ސްޕެއިން)ގެ ބައެއް މެޗުތައް ބެލިން. އެ މީހުން (ސްޕެއިން) ވަރަށް ރަނގަޅަށް ހުރިހާ މެޗެއްގައި ކަންކަން އެ ކުރަނީ. ސްޕެއިނަށް މަރުހަބާ ކިއުމަކީ ހަގީގަތުގައި ކުރަން ޖެހޭ ކަމެއް،" ޕޯޗުގަލް މެޗަށް ފަހު، ޑެޝޯމްޕްސް ބުންޏެވެ.
"އަހަރެމެން އެބަޖެހޭ ރަނގަޅަށް ރިކަވާވާން، އެ މެޗަށް (ސެމީ ފައިނަލަށް)، އެހެން ނޫނީ ސްޕެއިން ބަލިކުރަން ކުޅެން ޖެހޭ ލެވަލަށް ނުޖެއްސިދާނެ. އަހަރެމެން އެންމެ ފަހު ވަގުތާ ޖެހެންދެން ފައިޓްކުރާނަން،"
ފްރާންސް އިން އޯޕަން ޕްލޭގައި ލަނޑެއް ނުޖަހައި، ސެމީ ފައިނަލަށް ދިއުމުން އަމާޒުވާ ފާޑުކިޔުމާ ބެހޭގޮތުން ޑެޝޯމްޕްސް ބުނީ، މިހާރު އެ ޓީމު އޮތް ހިސާބަކީ ކުރި މަސައްކަތުގެ ނަތީޖާ ކަމަށާއި ކުޅުންތެރިންނަށް ޝުކުރު ހައްގު ކަމަށެެވެ.
ފްރާންސުން ސްޕެއިނާ ދެކޮޅަށް ކުޅުނު 13 މެޗުން މޮޅުވެފައިވާއިރު، ހަތް މެޗުން އެއްވަރުވި އެވެ. އަދި 16 މެޗުން ވަނީ ބަލިވެފަ އެވެ. އެންމެ ފަހުން މި ދެ ޓީމު ކުޅުނީ 2021 ވަނަ އަހަރުގެ ނޭޝަންސް ލީގުގެ ފައިނަލުގަ އެވެ. އެ މެޗުން، ފްރާންސް ވަނީ 2-1 އިން މޮޅުވެފަ އެވެ.
ސްޕެއިނާއި ފްރާންސް ކުޅޭ ސެމީ ފައިނަލް އޮތީ އަންގާރަ ދުވަހުގެރޭ 12 ޖަހާއިރު އެވެ.
