މިއުނިކް (ޖުލައި 5) - ޔޫރޯ ފުޓްބޯޅަ މުބާރާތުގެ ގަދަ 16 ބުރުގައި ލަނޑު ޖެހުމަށް ފަހު އުފާފާޅުކުރިއިރު އަމަލުކޮށްފައިވާ ގޮތުން އިނގިރޭސި މިޑްފީލްޑަރު، ޖޫޑް ބެލިންހަމް އެއް މެޗަށް ސަސްޕެންޑްކުރިއިރު، ތުރުކީގެ ޑިފެންޑަރު، މެރިހް ޑެމިރާލް ދެ މެޗަށް ސަސްޕެންޑް ކުރަން ޔުއެފާ އިން ނިންމައިފި އެވެ.
ސްލޮވާކިއާ އިން ލީޑުގައި އޮއްވައި، އިންގްލެންޑް މެޗުން ބަލިވެ، މުބާރާތުން ކަޓައިގެންދާން މިނިޓަކަށް ވުރެ ކުޑަ ވަގުތުކޮޅެއް އޮއްވައި، ބެލިންހަމް އެ ޓީމަށް އެއްވަރުކޮށްދިނީ މެޗުގެ އިތުރު ވަގުތުގެ ފަހު މިނިޓްގައި އެކްރަބެޓިކް ކިކް އަކުން ޖެހި ގޯލަކުންނެވެ. މިއީ މި ފަހަރުގެ މުބާރާތުގެ އެންމެ މޮޅު އެއް ގޯލެވެ. އެ ގޯލަށް ފަހު، ބެލިންހަމް، 21، އުފާފާޅުކުރިއިރު، ސްލޮވާކިއާ ބެންޗަށް އިޝާރާތްކޮށް ބޭއަދަބީ ގޮތަކަށް އަމަލުކޮށްފައިވާތީ، ޔުއެފާ އިން މައްސަލަ ބަލައި ފިޔަވަޅު އެޅީ އެވެ.
އެ ގޮތުން، ޔުއެފާ އިން މިއަދު ނިންމީ ބެލިންހަމް، 30،000 ޔޫރޯ އިން ޖޫރިމަނާކުރުމަށް ފަހު، އެއް މެޗަށް ސަސްޕެންޑްކުރާށެެވެ. އެކަމަކު، މި ސަސްޕެންޝަނަށް އަަމަލުކުރަން ފަށާނީ، އެއް އަހަރު ފަހުންނެވެ. އަދި ޔުއެފާ އިން ވަނީ ސްލޮވާކިއާ މެޗުގައި އިނގިރޭސި ސަޕޯޓަރުން އަލިފާން ބޯޅަ އުކައިފައިވާތީވެ، 11،000 ޔޫރޯ އިން އިނގިރޭސި އެފްއޭ ޖޫރިމަނާކޮށްފަ އެވެ.
ޑެމިރާލް ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އޭއެފްޕީ
ބެލިންހަމް، އަށް މި މުބާރާުތުގައި ސަސްޕެންޝަނެއް ނާންނާތީވެ، މާދަމާރޭ ކުއާޓާ ފައިނަލުގައި އިންގްލެންޑާއި ސްވިޒަލެންޑް ބައްދަލުކުރާ މެޗުގައި ކުޅެވޭނެ އެވެ.
އޮސްޓްރިއާ އަތުން ތުރުކީ މޮޅުވި މެޗުގައި އެ ޓީމުގެ ދެ ގޯލު ވެސް ޖެހީ ޑެމިރާލް، 26، އެވެ. އެ ގޮތުން ލަނޑު ޖެހުމަށް ފަހު، ޑެމިރާލް ދެ އަތުން އިޝާރާތްކޮށްފައިވަނީ ސިޔާސީ ކަމަކަށް ހިތްވަރުލިބޭ ގޮތަށެވެ. އަދި އެއީ، އެކްސްޓްރީމިސްޓް ގްރޫޕެއް ކަމަށްވާ ގްރޭ ވުލްވްސްގެ ވުލްފް ސެލިއުޓާ އެއްގޮތްވާ އިޝާރާތެކެެވެ.
މިއީ، ފްރާންސް އާއި އޮސްޓްރިއާގައި މަނާ އިޝާރާތެއް ކަަމަށްވާއިރު، ޑެމިރާލް އޮތީ މާކުރިން ވެސް މި މެޗުގައި ލަނޑެއް ޖެހިއްޖެނަމަ އެކަން ކުރާ ގޮތަށް ރާވައިފަ އެވެ.
އެހެންވެ، އެ ކަމަށް ބަލައިފައި ޔުއެފާ އިން ނިންމީ ޑެމިރާލް ދެ މެޗަށް ސަސްޕެންޑް ކުރުމަށެވެ. މިއާ އެކު ޑެމިރާލް އަށް ވަނީ މާދަމާރޭ ތުރުކީން ނެދަލެންޑްސްއާ ދެކޮޅަށް ކުޅުމުގެ ފުރުސަތު ގެއްލިފަ އެވެ.
މިއާ އެކު، ތުރުކީގެ ފުޓްބޯޅަ ފެޑެރޭޝަނުން ވަނީ ޑެމިރާލްގެ ސަސްޕެންޝަން އެޕީލްކުރަން ނިންމައިފަ އެވެ.
