ދިރާގުން ރާއްޖޭގެ އީސްޕޯޓްސްއަށް އިންގިލާބީ ބަދަލެއް ގެނުވާނެ މުޅިން އާ ގޭމިން ޕްލެޓް ފޯމް "ދިރާގު ގޭމާސް ގިލްޑް" ރޭ ލޯންޗުކޮށްފި އެވެ.
އެ ޕްލެޓްފޯމަކީ ގޭމަރުންނަށް ހާއްސަ އަދި ގޭމިން ކޮމިއުނިޓީގެ ބައިވެރިވުމާއި މަޝްވަރާއާއެކު ރާއްޖޭގައި ފަރުމާކުރެވިފައިވާ ޕްލެޓްފޯމެކެވެ. އެގޮތުން ގޭމަރުން ބޭނުންވާ ފަދަ ގޮތަކަށް އުފެދިފައިވާ ތަފާތު ފީޗާތަކާއި ހިދުމަތްތައް މި ޕްލެޓްފޯމުން ލިބޭނެ އެވެ.
މި ޕްލެޓްފޯމް ލޯންޗުކޮށްދެއްވީ ސްޕޯޓްސް މިނިސްޓަރު އަބްދުالله ރަފީއު އެވެ. އަދި މި އިވެންޓްގައި އެ މިނިސްޓްރީގެ ސްޓޭޓް މިނިސްޓަރުން ކަމަށްވާ އިސްމާއިލް އާމިރު، މުހައްމަދު ރިޔާޒު އަދި އަބްދުލް ރައްޒާގު އިބްރާހިމްގެ އިތުރުން ދިރާގުގެ ސީއީއޯ އަދި އެމްޑީ އިސްމާއިލް ރަޝީދުއާއި ދިރާގުގެ އިސް ބޭފުޅުންނާއި ގޭމިން ކޮމިއުނިޓީގެ އެކި މެންބަރުން ބައިވެރިވި އެވެ.
އިސްމާއިލް ރަޝީދު ވިދާޅުވީ ދިރާގުގެ އުންމީދަކީ މި ޕްލެޓްފޯމްގެ ޒަރިއްޔާއިން ރާއްޖޭގެ އީސްޕޯޓްސް ދާއިރާގައި ހަރަކާތްތެރިވާ ޒުވާނުން ބާރުވެރިވެ ބައިނަލްއަގްވާމީ މުބާރާތްތަކުން މޮޅެތި ވަނަތަށް ހާސިލްކުރާތަން ދެކުން ކަމަށާއި އަދި ރާއްޖޭގެ އެކި ކަންކޮޅުތަކުގައިވާ ގޭމަރުންނަށް އެމީހުންގެ ހުނަރު ދައްކާލާ، މުޅިން ތަފާތު އަދި ފުރިހަމަ ތަޖުރިބާއެއް ލިބިގެން ދިއުން ކަމަށެވެ.
ރަސްމިއްޔާތުގައި މިނިސްޓަރު ރާފިއު ވިދާޅުވީ މި ޕްލެޓްފޯމުން ކުޅިވަރާއި، ވާދަވެރިކަމާއި، ހުނަރު ތަރައްގީކުރުމާ މެދު މީހުން ދެކޭ ގޮތް ބަދަލުވެގެންދާނެ ކަމަށާއި އުންމީދަކީ ދިރާގުގެ އެއްބާރުލުމާ އެކު ރާއްޖޭގެ އީސްޕޯޓްސް އެތުލީޓުން ބައިނަލްއަގުވާމީ މައިދާނުގައި ވާދަކޮށް، ގައުމަށް ފަޚުރުވެރި ވަނަތައް ގެނެސްދޭ މުސްތަގުބަލެއް ފެނުން ކަމަށެވެ.
ދިރާގުގެ އާ ގޭމިން ޕްލެޓްފޯމް "ދިރާގު ގޭމާސް ގިލްޑް" ލޯންޗުކުރުން -- ފޮޓޯ: ދިރާގު
ދިރާގު ގޭމާސް ގިލްޑްގެ ފާހަގަކޮށްލެވޭ ތަފާތު އެއް ފީޗާއަކީ ދިރާގުން ބާއްވާ އެކި އީސްޕޯޓްސް މުބާރާތްތަކަށް ފަސޭހަކަމާ އެކު ޕްލެޓްފޯމް މެދުވެރިކޮށް ރަޖިސްޓާ ކުރުމުގެ ފުރުސަތު ލިބިގެން ދިޔުމެވެ.
އެގޮތުން މި ޕްލެޓްފޯމްގެ ރަޖިސްޓްރޭޝަން ޕްރޮސެސްގެ ސަބަބުން ގޭމަރުން ބޭނުންވާ ހުރިހާ ގޭމަރުންނަށް ވެސް މުބާރާތްތަކުގައި ވާދަކޮށް އެ ފަރާތްތަކުގެ ހުނަރު ދައްކާލެވޭނެ އެވެ.
މީގެ އިތުރުން ޑީޖީޖީގައި ރަޖިސްޓާކޮށްފައިވާ ގޭމަރުންނަށް އެފަރާތްތަކުގެ ގޭމިން ތަޖުރިބާ އިތުރަށް ފުރިހަމަކުރުމަށް ހާއްސަ ފައިބާ ބްރޯޑްބޭންޑް ބޫސްޓަތާކާއި މޮބައިލް އެޑް-އޮންތައް ޕްލެޓްފޯމްގެ ތެރެއިން ނެގޭނެ އެވެ.
ޑީޖީޖީ ލޯންޗުކުރެވިގެން ދިޔައީ ދެ ދުވަހުގެ މުއްދަތަށް ކުރިއަށްގެންދާ ވޯކް-އިން ގޭމިން މުބާރާތަކާއެކު އެވެ.
އެގޮތުން ޝައުގުވެރިވާ ބައިވެރިންނަށް ޑީޖީޖީ ވެބްސައިޓް މެދުވެރިކޮށް ރަޖިސްޓްރީކޮށް، ރޮކެޓް ލީގް އަދި އީއޭއެފްސީ 24، ދެ ގޭމުގެ ތެރެއިން ބޭނުންވާ ގޭމެއްގައި ވާދަކުރެވޭނެ އެވެ. އަދި ޖެހިޖެހިގެން ތިން މެޗު ކާމިޔާބު ކުރާ ކުޅުންތެރިޔަކަށް ފައިސާގެ އިނާމެއް ލިބެގެންދާނެ އެވެ.
ދިރާގުން ބުނީ އެ ޕްލެޓްފޯމުން އެންމެން ހިމެނޭ ފަދަ އީސްޕޯޓްސް ކުޅުންތެރިންގެ ކޮމިއުނިޓީއެއް އުފެއްދުމުގެ އިތުރުން ކުޅުންތެރިން އެކަކު އަނެކަކާ ގުޅުވާލަދީ، ތަފާތު ގޭމުތައް ކުޅުމުގެ ފުރުސަތ ފަހިކޮށްދޭނެ ކަމަށެވެ.
ދިރާގުން ދަނީ ދިވެހިރާއްޖޭގެ އެކި ދާއިރާތަށް އިތުރަށް ތަރައްގީކޮށް، ރާއްޖޭގައި ދިރިއުޅޭ ރައްޔިތުންގެ މުސްތަގުބަލު މުއްސަނދިކުރުމަށް އެހީތެރިވެދޭ އިވެންޓްތަކަށާއި އިނީޝިއޭޓިވްތަކަށް އެއްބާރުލުންދެމުންނެވެ.
