މެންޗެސްޓާ (ޖުުލައި 4) - މެންޗެސްޓާ ޔުނައިޓެޑްގެ ހަރަދު ކުޑަކުރުމުގެ ގޮތުން ގެންނަ ބައެއް ބަދަލުތަކުގެ ތެރެއިން، ކްލަބުން ހިންގުމަށް ކޮންމެހެން ބޭނުންނުވާ ކަންތައްތައް ހުއްޓާލައި، 250 މުވައްޒަފުން ވަޒީފާ އިން ވަކިކުރުމަށް އެ ކްލަބުން ނިންމައިފި އެވެ.
މީގެ އިތުރުން ޔުނައިޓެޑުން ވަނީ އެ ކްލަބްގެ ކޯޗު، އެރިކް ޓެން ހާގްހެ ކޮންޓްރެކްޓް އިތުރު އެއް އަހަރަށް އާ ކޮށްފަ އެެވެ. ޓެން ހާގްގެ ކުރީގެ ކޮންޓްރެކްޓަށް އިތުރު އެއް އަހަރު ހިމެނުމަށް ފަހު، ޔުނައިޓެޑުން އޭނާއާ އެކު އެއްބަސްވުން އާ ކުރީ 2026 ވަނަ އަހަރުގެ ޖޫން މަހުގެ ނިޔަލަށެެވެ.
ޔުނައިޓެޑްގެ ހިންގުމާ އިނގިރޭސި މަހުޖަނެއް ކަމަށްވާ ޖިމް ރެޓްކްލިފްގެ އިނިއޮސްގެ ހަވާލުވި ފަހުން ކްލަބުގެ ހިންގުން ހަރުދަނާކޮށް، ހަރަދު ކުޑަކުރުމުގެ ފިޔަވަޅުތަކެއް އެޅުމަށް ވަނީ ރާވައިފަ އެވެ.
މީޑިއާ ރިޕޯޓްތަކުން ބުނާގޮތުގައި ޔުނައިޓެޑްގެ ހަރަދު ކުޑަކުރުމުގެ ގޮތުން ބައެއް މަގާމުތައް އުވާލަން ނިންމާފައިވާކަން ޔުނައިޓެޑްގެ މުވައްޒަފުންނަށް އިއްޔެ ވަނީ އަންގައިފަ އެވެ. މިއީ، ޔުނައިޓަޑްގެ މުވައްޒަފުންނަށް ލިބުނު ޝޮކެކެވެ.
ރިޕޯޓްތަކުން ބުނާ ގޮތުގައި ވަޒީފާ ގެއްލިފައިވާކަން ބައެއް މުވައްޒަފުންނަށް މިހާރު އަންގާފައިވާ ކަމަށެވެ. ޔުނައިޓެޑްގައި 1000 މުވައްޒަފުން މަސައްކަތްކުރެ އެވެ.
ޔުނައިޓެޑްގެ ވިސްނުމަކީ ހަރަދުތައް ކުޑަކޮށްގެން ސަލާމަތްވާ ފައިސާ، ކްލަބުގެ ސީނިއާ ޓީމާޢި ކްލަބުގެ ވަސީލަތްތައް ތަރައްޤީ ކުރުމަށް ބޭނުންކުރުމެވެ.
އިނިއޮސް ޔުނައިޓެޑްގެ ހިންގުމާ ހަވާލުވި ފަހުން، ހަރަދު ކުޑަކުރުމަށް ވަނީ ބައެއް ފިޔަވަޅުތައް އަޅައިފަ އެވެ. އެ ގޮތުން، އެފްއޭ ކަޕްގެ ފައިނަލަށް ޔުނައިޓެޑްގެ މުވައްޒަފުންނަށް ކުރިން ދަތުރުގެ އިންތިޒާމްތައް ހަމަޖައްސައިދިން ނަމަވެސް، މި އަަހަރުގެ އެފްއޭ ކަޕަށް އެކަން ވަނީ ހުއްޓާލައިފަ އެވެ.
