އެމްއެމްއޭގެ ގަވަރުނަރު އަލީ ހާޝިމް ބަދަލުކުރަން، ވެރިކަން ހިންގާ ޕީއެންސީން އުޅެނީ ފައިސާ ދޮންނަ މެޝިނަކަށް އެ މުއައްސަސާ ހެދުމަށް ކަމަށް، ރައީސް އޮފީހުގެ ކުރީގެ މިނިސްޓަރު އަދި ދަ ޑިމޮކްރެޓްސް ޕާޓީގެ ނައިބު ރައީސް މުހައްމަދު ޝިފާޒު ވިދާޅުވެއްޖެ އެވެ.
އަލީ ހާޝިމް ގަވަރުނަރުގެ މަގާމަށް އައްޔަން ކުރީ ނިމިގެން ދިޔަ އެމްޑީޕީގެ ވެރިކަމުގަ އެވެ. މިހާރު ހިނގަމުންދާ 20 ވަނަ ރައްޔިތުންގެ މަޖިލީހުގެ ސުޕަ މެޖޯރިޓީ ޕީއެންސީއަށް ލިބުމާއެކު ގަވަރުނަރު ބަދަލުކުރުމުގެ މަސައްކަތް ވަނީ ފަށައިފަ އެވެ. ގަވަރުނަރު ބަދަލުކުރަން ރައީސުލްޖުމްހޫރިއްޔާ އަށް ލަފާ އެރުވުމަށް ރައްޔިތުންގެ މަޖިލީހަށް ހުށަހެޅި މައްސަލަ ދިރާސާކޮށް ގޮތެއް ނިންމަން މިހާރު ވަނީ މާލިއްޔަތު ކޮމިޓީއަށް ފޮނުވައިފަ އެވެ.
އަދަދު ނޫހުން ރޭ ގެނެސްދިން "އެތެރެފުށް" ޕްރޮގްރާމުގައި ޝިފާޒު ވިދާޅުވީ އަލީ ހާޝިމުގެ އިންޓެގްރިޓީއާމެދު ސުވާލެއް އުފެއްދޭނެ ޖާގައެއް ނެތް ކަމަށާއި ވެރިޔަކު ރުއްސަން ބުނަން ޖެހޭ ބަހެއް، ދޭންޖެހޭ ލަފައެއް ނުދެއްވައި އޭނާ ނުހުންނަވާނެ ކަމަށެވެ.
"ކުއްލިއަކަށް އެމްއެމްއޭ ގަވަރުނަރު ބަދަލުކުރަން އެ އުޅޭ އުޅުމަކީ އަޅުގަނޑުގެ ނަޒަރުގައި ވަރަށް ނުރައްކާތެރި ކަމެއް. ވަރަށް ނުރައްކާތެރި ކަމެއް،" ޝިފާޒު ވިދާޅުވި އެވެ.
އެކަން އެގޮތަށް ނުކުރެއްވުމަށް ރައީސުލްޖުމްހޫރިއްޔާއަށް އިލްތިމާސް ދަންނަވަންޖެހޭ ކަމަށާއި އަލީ ހާޝިމް ފަދަ ނަޒާހަތްތެރިކަން ހުރި ބޭފުޅަކު ބަދަލުކުރަންޖެހޭ ސަބަބަކަށް އޮންނާނީ ސަރުކާރުގެ ޕަޕެޓަކު އައްޔަންކޮށް، "ލާރި ދޮންނަ މެޝިނަކަށް އެމްއެމްއޭ ހެދުމަށް" ކަމަށް ޝިފާޒު ގަބޫލުކުރައްވަ އެވެ.
ކުރީގެ ބައެއް ވެރިކަންތަކުގައި އެފަދަ ކަންކަން ކުރައްވަން މަސައްކަތް ކުރައްވާފައިވާ ކަމަށާއި ނަމަވެސް، އެކަންކަން ކާމިޔާބު ނުވީ އޭރުވެސް ތިއްބެވި ގަވަރުނަރުންގެ ހުޝިޔާރު ކަމުން ކަމަށް ޝިފާޒު ވިދާޅުވި އެވެ.
ކަޅު ފައިސާ ރާއްޖެއަށް ވައްދަން މަސައްކަތް ކުރަނީ ސަރުކާރު ހިންގަން ނޭނގި، މާލީ ދަތިކަން އިންތިހާއަށް ބޮޑުވެފައި އޮތުމުން ކަމަށް ޝިފާޒު ފާހަގަ ކުރެއްވި އެވެ. އެ މަގަށް ދައުލަތް ހިނގެއްޖެ ނަމަ ރާއްޖެ ހަލާކުވެގެން ދާނެ ކަމަށް އޭނާ ވިދާޅުވި އެވެ.
"އަޅުގަނޑުމެން އެންމެންނަށް އެބަ އެނގޭ ރާއްޖޭގެ މާލީ ނިޒާމު ހިނގަމުންދާ ގޮތުގެ މައްޗަށް މި ބޭފުޅުންނަށް މެނޭޖު ނުކުރެވިގެން އެބަ އުޅޭކަން. ލިބޭ އާމްދަނީ މެނޭޖެއް ނުކުރެވޭ،" ޝިފާޒު ވިދާޅުވި އެވެ.
ފައިސާ މެނޭޖު ނުކުރެވުނީ ވެރިކަމަށް ވަޑައިގަތުމަށް ފަހު ކުރަން ނުޖެހޭ ބޮޑެތި ހަރަދުތައް ކުރުމުން ކަމަށް ޝިފާޒު ވިދާޅުވި އެވެ. މިސާލެއްގެ ގޮތުގައި އޭނާ ފާހަގަ ކުރެއްވީ ރައީސް ޑރ. މުހައްމަދު މުއިއްޒުގެ އާއިލާ މުލިއާގެ އަށް ބަދަލުވެވަޑައިގަތުމަށް ކުރެއްވި ހަރަދު ބޮޑު މަރާމާތާއި، ސަރުކާރުގެ ވެރިންގެ ބޭރު ދަތުރު ހަރަދާއި، ގެންގުޅުއްވި ހާރިޖީ ސިޔާސަތުގެ ދޯހަޅި ކަމެވެ.
