ގެލްސެންކާޗެން، ޖަރުމަނު (ޖުލައި 3) - ޔޫރޯ ފުޓްބޯޅަ މުބާރާތުގެ ގަދަ 16 ޓީމު ވާދަކުރާ ބުރުގައި ސްލޮވާކިއާ ކޮޅަށް ފަހު ވަގުތު ލަނޑު ޖެހުމަށް ފަހު، އިންގްލެންޑްގެ މިޑްފީލްޑަރު، ޖޫޑް ބެލިންހަމް އުފާފާޅުކުރިއިރު، ބޭއަދަބީ ގޮތަކަށް އަމަލުކޮށްފައިވާތީ ޔުއެފާ އިން އެ މައްސަލަ ބަލަން ފަށައިފި އެވެ.
ސްލޮވާކިއާ އިން ލީޑުގައި އޮއްވައި، އިންގްލެންޑް މެޗުން ބަލިވެ، މުބާރާތުން ކަޓައިގެންދާން މިނިޓަކަށް ވުރެ ކުޑަ ވަގުތުކޮޅެއް އޮއްވައި، ބެލިންހަމް އެ ޓީމަށް އެއްވަރުކޮށްދިނީ މެޗުގެ އިތުރު ވަގުތުގެ ފަހު މިނިޓްގައި އެކްރަބެޓިކް ކިކް އަކުން ޖެހި ގޯލަކުންނެވެ. މިއީ މި ފަހަރުގެ މުބާރާތުގެ އެންމެ މޮޅު އެއް ގޯލެވެ.
އެ ގޯލަށް ފަހު، ބެލިންހަމް، 21، އުފާފާޅުކުރިއިރު، ސްލޮވާކިއާ ބެންޗަށް އިޝާރާތްކޮށް ބޭއަދަބީ ގޮތަކަށް އަމަލުކޮށްފައިވާތީ، އެކަން ޔުއެފާގެ ސަމާލުކަމަށް އައިސް، މައްސަލަ ވަނީ ބަލަން ފަށައިފަ އެވެ. އެ އަށް ޖަވާބުދާރީވުމުގެ ގޮތުން، ބެލިންހަމް ބުނީ، އެ އުފާފާޅުކުރުން އަމާޒުކުރީ، އޭނާގެ ގާތް ރަހުމަތްތެރިންނަށް ކަމަށެވެ.
ޔުއެފާ އިން މި މައްސަލަ ބެލުމަށް ފަހު، ބެލިންހަމް ކުށެއް ކުރިކަމަށް ސާބިތުވެއްޖެނަމަ، ސަސްޕެންޝަނެއް ނޫނީ ޖޫރިމަނާއެއް އައުން އެކަށީގެންވެ އެވެ. އަދި މައްސަލައިގައި ބެލިންހަމްގެ މައްސަލަ ފާހަަގަކުރެވޭ މިންވަރަށް ބަލައިފައި، ސާބިތުވާނަމަ، ސަސްޕެންޝަނަކާއި ޖޫރިމަނާއެއް އެކުގައި އައުމުގެ ފުރުސަތު ވެސް އެބައޮތެެވެ.
އިންގްލެންޑުން ޔޫރޯގެ ކުއާޓާ ފައިނަލްގައި ސްވިޒަލެންޑާ ކުޅޭ މެޗުގެ ކުރިން ބެލިންހަމްގެ މައްސަލަ ނިންމާނެ ކަމަށް ރިޕޯޓްތައް ބުނެ އެވެ.
ރެއާލް މެޑްރިޑަށް މި ސީޒަނުގައި ތަފާތު މޮޅު ކުޅުމެއް ދެއްކި، ބެލިންހަމް ވަނީ މި ފަހަރު ޔޫރޯ ފުޓްބޯޅަ މުބާރާތުގައި، ދެ ގޯލު ޖަހައިފަ އެވެ.
