ޑަސެލްޑޯފް (ޖުލައި 1) - ޔޫރޯ ފުޓްބޯޅަ މުބާރާތުގެ ގަދަ 16 ޓީމުގެ ބުރުގައި މިރޭ ފްރާންސާ ދެކޮޅަށް ކުޅޭ މެޗުން ބެލްޖިއަމް މޮޅުވާނެ ކަމަށް ގަބޫލުކުރާނެ މީހުން މަދުވާނެކަން އެ ޓީމުގެ ކޯޗު ޑޮމެނިކޯ ޓެޑެސްކޯ އަށް އެނގޭ ކަމަށް ބުނެފި އެވެ.
ބެލްޖިއަމް އިން ގްރޫޕް ސްޓޭޖުގައި ކުޅުނު ތިން މެޗުގެ ތެރެއިން އެއް މެޗުން މޮޅުވިއިރު، އެއް މެޗުން ބަލި އަދި އެއްވަރުވެފައިވެ އެވެ. ބެލްޖިއަމް އަށް ރަނގަޅު ކުޅުމެއް ނުދެއްކޭތީ އެ ޓީމުގެ ސަޕޯޓަރުންގެ ނުރުހުން ކޯޗު، ޓެޑެސްކޯ އާއި ޓީމުގެ ކުޅުންތެރިންނަށް ވަނީ އަމާޒުވެފަ އެވެ.
ޓެޑެސްކޯ ބުނީ ސަޕޯޓަރުންގެ އަމިއްލަ ޝުއޫރުތައް ފާޅުކުރަން ފުުރުސަތު އޮންނާނެ ކަމަށާއި އެކަމަކު، މީގެ ހަގީގަތް ވެސް ގަބޫލުކުރަން ޖެހޭ ކަމަށެވެ.
"އަަހަންނަށް އެނގޭ މި މެޗަށް (ފްރާންސް މެޗަށް) ނުކުންނައިރު، ބެލްޖިއަމް މޮޅުވާނެ ކަމަށް ގަބޫލުކުރާނެ މީހުން މަދުކަން. އެކަމަކު، ވިސްނަން ޖެހޭ ކަންކަން އެބަހުރި. އަހަރެމެންނާ އެއްވަރަށް ގްރޫޕް ސްޓޭޖުގައި ގޯލު ޖަހަން ފުރުސަތު ތަނަވަސްކުރި ޓީމެއް ނެތް. ހަމަ އެ ގޮތަށް ފްރާންސް ވެސް ގިނަ ފުރުސަތު ހޯދި މިންވަރު، މި އުޅެނީ ގޯލު ނުޖެހިގެން،" ޓެޑެސްކޯ ބުންޏެވެ.
ޒުވާން ކޯޗު، ޓެޑެސްކޯ ބުނީ، ބެލްޖިއަމް ޓީމާ މެދު އުންމީދުތައް އަބަދުވެސް މަތިވާނެކަން އެނގޭ ކަމަށާއި އެ ޓީމާ ހަވާލުވެ ހުންނަ ކޯޗަށް ނަތީޖާ ނުނެރެވޭނަމަ އަންނާނެ ޗެލެންޖްތައް ވެސް ބޮޑުވާނެ ކަމަށެވެ.
"ހަވާލުވެ މި ހުރި ޒިންމާއާ މެދު އަހަރެން އަބަދުވެސް ވިސްނަން،" ޓެޑެސްކޯ ބުންޏެވެ.
މިއީ ބެލްޖިއަމާއި ފްރާންސް ބައްދަލުކުރާ 76 ވަނަ މެޗެވެ. ބައިނަލްއަގުވާމީ މުބާރާތެއްގައި މިހާތަނަށް ފްރާންސާއި ބެލްޖިއަމް ބައްދަލުކުރި ހަތަރު މެޗުން ވެސް ފްރާންސް މޮޅުވި އެވެ. ޔޫރޯގައި ފްރާންސާއި ބެލްޖިއަމާ ކުޅުނު ހަމައެކަނި ފަހަރަކީ މީގެ 40 އަހަރު ކުރިން، 1984 ވަނަ އަހަރުގެ ޔޫރޯގެ ގްރޫޕް ސްޓޭޖުގަ އެވެ. އެ މެޗުން ފްރާންސް ވަނީ 5-0 އިން މޮޅުވެފަ އެވެ.
މި ދެ ޓީމު މިރޭ ބައްދަލުކުރާ މެޗު ފަށާނީ 9 ޖަހާއިރު އެވެ.
