ނިޔޯން، ސްވިޒަލެންޑް (ޖޫން 29) - މި މަހު 16 ވަނަ ދުވަހު ސާބިއާއާ ދެކޮޅަށް ކުޅުނު މެޗުގައި ހަަމަނުޖެހުމަށް ހިތްވަރު ދޭ ގޮތަށް އަމަލުތައް ބަހައްޓައި ކަންތައްތަކެއް ކުރި، އިނގިރޭސި ހަ ސަޕޯޓަރަކަށް ދަނޑަށް ނުވަދެވޭ ގޮތަށް ފިޔަވަޅު އަޅައިފި އެވެ.
ޖަރުމަނުގައި މިހާރު ކުރިއަށްދާ ޔޫރޯ ފުޓްބޯޅަ މުބާރާތުގެ ސެކިއުރިޓީ ވަރުގަަދަ ކުރުމުގެ ގޮތުން، މުބާރާތުގައި ވާދަކުރާ 24 ގައުމުގެ ތެރެއިން 300 އެއްހާ ސެކިއުރިޓީ ތަޖުރިބާކާރުން ޖަރުމަނުގައި ހަރަކާތްތެރިވާނެ އެވެ. އެ ފަރާތްތަކުން މަސައްކަތްކުރާނީ އިންޓަނޭޝަނަލް ޕޮލިސް ކޯޕަރޭޝަން ސެންޓަރު (އައިޕީސީސީ)އާ އެކުގަ އެވެ. އޭގެ ތެރޭގައި، ޔޫކޭ ޕޮލިސިން ފުޓްބޯލިން ޔުނިޓް (ޔޫކޭއެފްޕީޔޫ) ވެސް ބައިވެރިވެ އެވެ.
އެ ގޮތުން، ޔުއެފާ އިން ފިޔަވަޅު އަޅާފައިވަނީ އިނގިރޭސިވިލާތަށް ނިސްބަތްވާ 21-38 އަހަރާ ދެމެދުގެ ހަ މީހުންނަށެވެ. މީގެ ތެރެއިން، ތިން މީހަކަށް ތިން އަހަރުގެ ސަސްޕެންޝަނެއް އައިއިރު، އަނެއް ތިން މީހުންނަށް އައީ ފަސް އަހަރުގެ ސަސްޕެންޝަނެކެވެ.
ޔޫކޭއެފްޕީޔޫ އިން ބުނެފައިވަނީ، ޔުއެފާ އިން މި ދީފައިވާ އަދަބު ތަންފީޒުކުރުން އޮތީ ޔޫކޭއެފްޕީޔޫއާ ހަވާލުކޮށްފައި ކަމަށެވެ. އަދި އަދަބު ދީފައިވާ މުއްދަތުގައި، އެ ސަޕޯޓަރުންނަށް އެއްވެސް ފުޓްބޯޅަ މެޗަކަށް ދަނޑަށް ނުވަދެވޭނެ އެވެ.
ސާބިއާ މެޗުގެ ކުރިން ހަމަނުޖެހުން ހިންގި އިތުރު އިނގިރޭސި ސަޕޯޓަރުންގެ މައްސަލަ، އައިޕީސީސީ އާއި ޔޫކޭއެފްޕީޔޫ އިން ގުޅިގެން އަންނަނީ ބަލަމުންނެވެ. އޭގެ ތެރޭގައި، ސްޓޭޑިއަމް ކައިރީގައި ހަމަނުޖެހުން ހިންގި މީހުންނާއި މަގުމަތީގައި މާރާމާރީ ހިންގި އިތުރު މީހުން ހިމެނެ އެވެ.
