މިދިޔަ އަހަރު އޭޕްރީލް 7، ގައި މަރާލާފައި އޮއްވާ ފެނުނު، ނ. މަނަދޫ، އަންނާރުމާގެ، ނައީމާ މޫސާގެ މަރުގެ މައްސަލާގައި ހެކި ރައްކާތެރިކުރުމުގެ އަމުރެއް ނެރެދޭން ކްރިމިނަލް ކޯޓުން ނިންމައިފި އެވެ.
އެ މައްސަލާގައި ދައުވާ އުފުލާފައި ވަނީ ފެހިވިލާގެ، ނ. މަނަދޫ، އަހުޒަމް އަބްދުލްޝަކޫރާއި, ވިނަރެސް، ނ. މަނަދޫ، ހުސައިން ފަވާޒުގެ އިތުރުން ފިނިފެންމާގެ، ނ. މަނަދޫ، އަބްދުލްވާހިދު ރިފާސް އަށެވެ. އެ ތިން މީހުންގެ އަޑުއެހުން ކްރިމިނަލް ކޯޓުގައި ކުރިއަށް ގެންދަނީ ވަކި ވަކިންނެވެ.
މިއަދު ބޭއްވި ތިން އަޑުއެހުމުގައި ވެސް ނިންމީ ދައުލަތުން އެދުނު ހެކި ރައްކާތެރި ކުރުމުގެ އަމުރު ނެރެ ދިނުމަށެވެ. ދައުލަތުން އެދުނީ ބައެއް ހެކިތައް އެއްކޮށް ސިއްރުކޮށްދިނުމަށާއި, ބައެއް ހެކިތަކުގެ ވަކި މިންވަރެއް ސިއްރު ކޮށްދިނުމަށެވެ.
އެއްކޮށް ސިއްރުކުރަން އެދުނު ހެކިތަކުގެ ތެރޭގައި ސިއްރު ހެކިންގެ ބަޔާންތައް ހިމެނޭއިރު ވަކި މިންވަރެއް ސިއްރުކޮށްދޭން އެދުނު ހެކިތަކުގެ ތެރޭގައި ނައީމާގެ މަރުގެ މައްސަލާގައި ނަގާފައިވާ ފޮޓޯތައް ހިމެނެ އެވެ.
މި މައްސަލާގައި ދައުވާއަށް ޖަވާބުދާރީވުން ކުރިއަށް ގެންދަން ނިންމާފައި ވަނީ ދެން ބާއްވާ އަޑުއެހުމެއްގަ އެވެ.
ކްރިމިނަލް ކޯޓުގެ ހާލަތު ހުރި ގޮތުން ކޮންމެ ދުވަހަކު ޝަރީއަތްތައް ނުބޭއްވޭތީ, މި މައްސަލާގައި ދެން ޝަރީއަތް ބޭއްވޭނެ ތާރީހެއް ފަހުން ކަނޑައަޅުއްވާނެ ކަމަށް ގާޒީ އަލީ އާދަމް ވިދާޅުވި އެވެ.
މި މައްސަލާގައި ދައުވާ އުފުލާފައިވާ ހުސެއިން ފަވާޒުގެ ފަރާތުން މިއަދުގެ އަޑުއެހުމުގައި ވަނީ, އޭނާއަށް ލިބެންޖެހޭ ސިއްހީ ހިދުމަތްތައް ލިބުމުގައި ލަސްކަން ފާހަގަކޮށް, ބޭސްފަރުވާގެ ކަންކަން ކުރިއަށްވުރެ ފުރިހަމައަށް ހަމަޖައްސައިދޭން އެދިފަ އެވެ. އަދި މައްސަލައިގެ ދިފާއު ބިނާ ކުރުމަށް ވަކީލާއި މުވައްކިލާ ދެމެދު އެކަށީގެންވާ މިންވަރަށް ވާހަކަދެއްކޭނީ އޭނާއަށް ބޭނުންވާ ނަފްސާނީ ފަރުވާ ލިބޭނެ ގޮތް ހަމަޖެހުމުން ކަމަށްވާތީ އެކަން ހަމަޖައްސައި ދިނުމަށް ދިފައީ ވަކީލު އަހުމަދު ޔާމީން އެދިވަޑައިގެންނެވި އެވެ.
އެ ފުރުސަތު ދިނުމަށްފަހު މައްސަލައިގެ ޝަރީއަތްތައް, ކޯޓުން ކަނޑައަޅާ ތާރީހެެއްގައި ކުރިއަށް ގެންދިއުމަށް ވަނީ ނިންމާފަ އެވެ.
މައްސަލައިގެ ފަސްފަހަތް؛
ނައީމާ، 62، މަރާލާފައި އޮއްވާ ފެނުނީ އޭޕްރީލް 7، 2023 ގެ ރޭގަނޑު އިރާކޮޅެވެ. އޭނާގެ ހަށިގަނޑުގެ އެކި ތަންތަނަށް ވަޅި ހަޅާފައި ހުއްޓެވެ. އަދި މުޅި ކޮޓަރިތެރެ އޮތީ ލެއިން ތަތްތެޅިފަ އެވެ.
މަރުގެ ތަހުގީގަށް ފުލުހުންގެ ގިނަ އަދަދެއްގެ ފޮރެންސިކް އެކްސްޓާޕުން އެ ރަށުގައި ހަރަކާތްތެރިވި އެވެ. އަދި އެ ރަށުގެ ގިނަ ބައެއްގެ ޑީއެންއޭ ސާމްޕަލް ވެސް ނެގި އެވެ.
އެ މައްސަލައިގައި މީހަކު ހައްޔަރުނުކުރެވި، ގިނަ ދުވަސްތަކެއް ވެފައި އޮއްވައި، އަހުޒަމް ހައްޔަރުކުރީ މަސްތުވާތަކެތީގެ މައްސަލައެއްގަ އެވެ. ބަންދުގައި ގޮޅީގައި ހުއްޓައި، އޭނާ މަރުގެ މައްސަލައިގައި ތަހުގީގަށް އެއްބަސްވެ މައުލޫމާތު ދީފައިވެ އެވެ. ފަވާޒާއި ރިފާސް ހައްޔަރުކުރީ އޭނާގެ ފަރާތުން ލިބުނު މައުލޫމާތުގެ އަލީގަ އެވެ.
ދައުލަތް ތަމްސީލް ކުރާ ޕްރޮސެކިއުޓަ ޖެނެރަލްގެ އޮފީހުން ބުނި ގޮތުގައި ނައީމާ މަރާލީ އޭޕްރީލް 6، ގެ ދަންވަރު ވަގުތު ނިދާފައި އޮއްވަ އެވެ.
ނައީމާ މަރުވި އިރު އޭނާގެ ތިން ދަރިން ދުނިޔޭގައި އެބަ ތިއްބެވެ. ދެ ކައިވެންޏެއް ކުރިިއިރު، ކައިވެނިކުރި ދެ މީހުން ވެސް މިހާރު ދުނިޔޭގައި ނެތެވެ.
