ޑޯޓްމަންޑް (ޖޫން 27) - ޕެނަލްޓީ ގަވާއިދުގައި ބުނާގޮތުން ގޯލްކީޕަރުންނަށް އޮތް އުނދަގޫތަކަށް ނިސްބަތްކޮށް، އެ ގަވާއިދަށް ފްރާންސްގެ ގައުމީ ފުޓްބޯޅަ ޓީމުގެ އެއް ވަނަ ގޯލްކީޕަރު، މައިކް މައިންނޯން ޖޯކު ޖަހައިފި އެވެ.
ޔޫރޯ ފުޓްބޯޅަ މުބާރާތުގައި ފްރާންސް އިން ގްރޫޕް ސްޓޭޖުގައި ކުޅުނު ފަހު މެޗުގައި، ޕޮލެންޑާ ވަނީ 1-1 އިން އެއްވަރުވެފަ އެވެ. ފްރާންސް އިން ލީޑުނަގައިފައި އޮއްވައި، ޕޮލެންޑުން އެއްވަރުކުރީ ރޮބަޓް ލެވަންޑޯސްކީ ޖެހި ޕެނަލްޓީންނެވެ. ލެވަންޑޯސްކީ، މި ޕެނަލްޓީ ކާމިޔާބުކުރީ ދެ ވަަނަ ފަހަރަށް ފޮނުވާލަން ލިބުނު ފުރުސަތުގަ އެވެ. ފުރަތަމަ ފަހަރު ޖެހި ޕެނަލްޓީ، ކީޕަރު މައިންނޯން މަތަކުރި އެވެ. އެކަަމަކު، އަލުން އެ ޕެނަލްޓީ ޖަހަން ދިނީ، އެ ބޯޅަ ހުއްޓުވަން، މައިންނޯން މާ ކުރިން ކުރިއަށް ޖެހި ހުރި ކަމަށް ބަލައިފަ އެވެ.
އެ މެޗަށް ފަހު، އިންސްޓަގްރާމްގައި ކުރި ޕޯސްޓެއް މެދުވެރިކޮށް، މައިންނޯން، 28، ވަނީ، ޕެނަލްޓީގައި ކީޕަރުންނަށް އޮންނަ ގޮންޖެހުންތައް ހިމަނައި، ގަވާއިދަށް ޖޯކު ޖަހައިފަ އެވެ.
އެ ގޮތުން، މައިންނޯން ބުނެފައިވަނީ، އެޓޭކަރު ޕެނަލްޓީ ޖަހަން ދުއްވައިގަތް ފަހުން، 87 ވަނަ ފެއިންޓް ހަދާފައިވާ ކަމަށެވެ.
"އައިފެބް އިން 2026 ވަނަ އަހަރު ހަދާނެ ގަވާއިދެއް، ގޯލްކީޕަރުން ހުންނަން ޖެހޭނީ ޕެނަލްޓީ ޖަހާއިރު އަނެއް ފަރާތަށް އެނބުރިގެން. އެހެން ހުއްޓައި، ބޯޅަ މަތަކުރެވިއްޖިއްޔާ، ނުސީދާ ޖެހުމެއް ލިބޭނެ،" އޭސީ މިލާނަށް ކުޅެމުން އަންނަ މައިންނޯން، ގަވާއިދަށް ޖޯކު ޖަހަމުން ބުންޏެވެ.
ލެވަންޑޯސްކީ ފޮނުވާލި ފުރަތަމަ ޕެނަލްޓީ.
މައިންނޯން، ދެން ހިމެނީ 2023 ވަނަ އަހަރު އައިފެބް އިން ހެދި ގަވާއިދެއްގައި، ބުނެފައިވަނީ، އެޓޭކަރު ޕެނަލްޓީ ޖަހަން އައުމުން، އޭނާ އަށް އުނދަގޫވާ ގޮތަށް ގޯލްކީޕަރުންގެ ހަރަކާތްތައް ނުބެހެއްޓޭނެ ކަމަށެވެ. މިސާލަކަށް ގޯލުގެ ދަނޑިޔާއި ހުރަސް ދަނޑީގައި އަތްލުން ހިމެނެ އެވެ.
އަދި ޕެނަލްޓީ ފޮނުވާލާއިރު، ގޯލްކީޕަރުގެ އެއް ފައި، ގޯލުގެ ރޮނގުމަތީގައި ނޫނީ ރޮނގަށް ވުރެ ފަހަތުގައި ބަހައްޓަން ލާޒިމެވެ. އެހެން ނޫންނަމަ އަލުން ޖަހަން ދޭނެ އެވެ. ލެވަންޑޯސްކީ ފޮނުވާލި ފުރަތަމަ ޕެނަލްޓީގައި، މައިންނޯން އަށް ދިމާވީ މި ހާލަތެވެ. އަލުން ޖަަހަން ދިނީ އެކަމާ ހުރެ އެވެ.
ގަވާއިދު ބުނާގޮތުން، ދުއްވައިގަތުމަށް ފަހު، ޕެނަލްޓީ ޖަހާ ކުޅުންތެރިޔާ އަށް، ބޯޅަ ޖެހުމަށް ފެއިންޓެއް ނުހެދޭނެ އެވެ. އެކަމަކު، ދުވުމުގައި މަޑުކަމެއް ގެނެސް، ފެއިންޓެއް ހެދޭ ގޮތަށް އޮވެ އެވެ. އޭގެ ފައިދާ އެޓޭކަރުން ނަގާތީ، ކީޕަރުންގެ ޝަކުވާ ބޮޑެވެ.
ގިނަ އަހަރުތަކެއް ވަންދެން ފްރާންސްގެ ގޯލު ބެލެހެއްޓި، ހޫގޯ ލޮރީސް، 2022 ވަނަ އަހަރުގެ ފީފާ ވޯލްޑް ކަޕަށް ފަހު ރިޓަޔާކުރިއިރު، އެ ފަހުން އެ ޓީމުގެ އެއް ވަނަ ކީޕަރުގެ މަގާމު ލިބުނީ މައިންނޯން އަށެވެ. މައިންނޯން، ފްރާންސާ އެކު، ފުރަތަމަ ކީޕަރެއްގެ ގޮތުގައި މި ކުޅެނީ ބޮޑު ފުރަތަމަ މުބާރާތުގަ އެވެ. ފްރާންސަށް އޭނާ ވަނީ 19 މެޗު ކުޅެދީފަ އެވެ.
މުބާރާތުގެ ގަދަ 16 ބުރުގައި ފްރާންސް ކުޅޭނީ ބެލްޖިއަމްއާ އެވެ.
