ގެލްސެންކާޗެން (ޖޫން 27) - ޔޫރޯ ފުޓްބޯޅަ މުބާރާތުގައި މުޅިން އަލަށް ވާދަކުރި ޖޯޖިއާ އިން 2-0 ޕޯޗުގަލް ބަލިކޮށް، މުބާރާތުގެ ދެ ވަނަ ބުުރުން ފުރުސަތު ހޯދައިފި އެވެ.
މި މެޗުގެ ވަރަށް ކުރީކޮޅު ޖޯޖިއާ އިން ވަނީ ގޯލު ޖަހައި ލީޑު ނަގައިފަ އެވެ. މެޗުގެ ދެ ވަނަ މިނެޓުގައި ޖޯޖިއާ އަށް މި ގޯލު ޖަހާދިނީ ކްވިޗާ ކްރަވަޝްކޭލިލާ އެވެ. ޕޯޗުގަލްގެ ޑިފެންސް ފަހަތަށް އައި ބޯޅައެއް ހިފައިގެން އޭރިއާތެރެއަށް ވަދެ، ކްރަވަޝްކޭލިއާ ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ.
އޭގެ ފަހުން، ޕޯޗުގަލުން ވަނީ މެޗުގެ ކޮންޓްރޯލް ނަގައި ޖޯޖިއާގެ ހާފަށް ބާރުބޮޑުކޮށް ގިނަ ހަމަލާތަކެއް އުފައްދައިފަ އެވެ. އެ ގޮތުން، މެޗުގެ 16 ވަނަ މިނެޓުގައި ޕޯޗުގަލް އަށް އޭރިއާ ބޭރުން ލިބުނު ހިލޭ ޖެހުމެއް ކްރިސްޓިއާނޯ ރޮނާލްޑޯ ފޮނުވާލި ނަމަވެސް ޖޯޖިއާގެ ކީޕަރު ޖޯޖީ މަމަޑާޝްވިލީ ވަނީ ހުށިޔާރުކަމާއެކު ދިފާއު ކޮށްފަ އެވެ.
ވަރުގަދަ ޑިފެންސެއް ކުރަމުން އައި ޖޯޖިއާގެ ގޯލަށް ޕޯޗުގަލް އަށް މި ހާފުގައި މާ ގިނަ ހަމަލާ އެއް އުފެއްދިފައިނުވާއިރު، ފުރަތަމަ ހާފުގެ ފަހުކޮޅު ރޮނާލްޑޯ އާއި, ޖާއޯ ފީލިކްސް ވަނީ ނުރައްކާތެރި ހަމަލާ އެއް އުފައްދައިފަ އެވެ. ރޮނާލްޑޯގެ ޖޯޒީގައި ހިފެހެއްޓުމުން ޕެނަލްޓީ ނުދޭތީ އޭނާ އެޕީލްކުރުމުން ރެފްރީ ވަނީ ރީނދޫ ކާޑު ދައްކައިފަ އެވެ.
މިރޭގެ މެޗުގެ ތެރެއިން ރޮނާލްޑޯ ހިތްހަަމަނުޖެހުން ފާޅުކުރަނީ.
މެޗުގެ ދެ ވަނަ ހާފު ފަށައިގެން ވެސް ޕޯޗުގަލުން މެޗު ކޮންޓްރޯލް ކޮށްގެން ކުޅުނެވެ. އެކަމަކު، މެޗުގެ 57 ވަނަ މިނެޓުގައި ޖޯޖިއާގެ ޖޯޖެސް މިކައުޓްޒޭ ވަނީ ލިބުނު ޕެނަލްޓީ އަކުން އެ ޓީމަށް ލީޑު ފުޅާކޮށްދީފަ އެވެ. ގްރޫޕް ސްޓޭޖުގެ ތިން މެޗުގައި ވެސް ލަނޑު ޖެހި މިކައުޓްޒޭ އަކީ މި ފަހަރުގެ ޔޫރޯގެ ޓޮޕް ސްކޯރާ އެވެ.
މިއީ ޕޯޗުގަލްގެ އެންޓޯނިއޯ ސިލްވާ ޖޯޖިއާގެ ކުޅުންތެރިއަކަށް ކުރި ފައުލަކާއި ގުޅިގެން ވީޑިއޯ އެސިސްޓެންޓް ރެފްރީ (ވީއޭއާރް) ބެލުމަށްފަހު ރެފުރީ ދިން ޕެނަލްޓީ އެކެވެ.
މެޗުގެ ފަހު ވަގުތުކޮޅު ޕޯޗުގަލުން ވަނީ ފުލުފުލުގައި ޖޯޖިއާގެ ގޯލަށް ހަމަލާ ފޮނުވާލައިފަ އެވެ. އެކަމަކު ޕޯޗުގަލުން ފޮނުވާލި ހަމަލާތަކުގެ ހުރަހަކަށްވީ ޖޯޖިއާގެ ކީޕަރު މަމަޑާޝްވިލީ އެވެ.
ގްރޫޕް އެފްގެ އެއް ވަނަ ޓީމުގެ ގޮތުގައި ޕޯޗުގަލުން ދެ ވަނަ ބުރަށް ދަތުރުކުރީ ކުޅުނު ތިން މެޗުން ހަ ޕޮއިންޓް ހޯދައިގެންނެވެ. އަދި ދެ ވަނަ ޓީމުގެ ގޮތުގައި ތުރުކީ އަނެއް ބުރަށް ދިޔައީ، މިރޭ 2-1 އިން ޗެކް ރިޕަބްލިކް ބަލިކޮށް ހަ ޕޮއިންޓް ހޯދައިގެންނެވެ. ތިން ވަނަ ޓީމުގެ ގޮތުގައި ޖޯޖިއާ ދެ ވަނަ ބުރުން ޖާގަ ހޯދީ ތިން މެޗުން ހަތަރު ޕޮއިންޓް ހޯދައިގެންނެވެ.
ގަދަ 16 ބުރުގެ މެޗުތައް:
ސްވިޒަލެންޑް - އިޓަލީ
ޖަރުމަނު - ޑެންމާކް
އިންގްލެންޑް - ސްލޮވާކިއާ
ސްޕެއިން - ޖޯޖިއާ
ފްރާންސް - ބެލްޖިއަމް
ޕޯޗުގަލް - ސްލޮވީނިއާ
ރުމޭނިއާ - ނެދަލެންޑްސް
އޮސްޓްރިއާ - ތުރުކީ
