އެމެރިކާގެ ޓެކްސަސްގައި ފަލަސްތީނުގެ ތިން އަހަރުގެ ތުއްތު އަންހެން ކުއްޖަކު މަރާލަން އުޅުނު އަންހެނަކަށް ދައުވާކޮށްފި އެވެ.
އެމެރިކަން އިސްލާމިކް ރިލޭޝަންސް ޓެކްސަސްއިން ބުނީ މެއި 19، ގައި ހިނގި މި ހާދިސާގައި އެލިޒަބެތު ވޮލްފް، 42، ނަމަކަށް ކިޔާ އަންހެނަކު ތުއްތު ކުއްޖާ މަރާލަން އުޅުނީ އާއިލާއާއެކު އުޅެނިކޮށް، ސްވިމިން ޕޫލަކަށް ގަންބާލައިގެންނެވެ.
ނަމަވެސް އެ ކުއްޖާގެ މަންމަ ވަނީ ސްވިމިން ޕޫލަށް ފުންމާލައި، އެ ތުއްތު ކުއްޖާ ސަލާމަތް ކޮށްފައި ކަމަށް އެ ކައުންސިލުން ބުނެ އެވެ.
"އެ ތުއްތު ކުއްޖާ ޕޫލަށް ދިޔައީ އޭނާގެ މަންމައާއި ހަ އަހަރުގެ ބޭބެއާއެކު. ކުއްލިއަކަށް އަންހެނަކު އެތަނަށް އައިސް ބުރުގާ އަޅައިގެން ހުރި ތުއްތު ކުއްޖާގެ މަންމައާ ދިމާލަށް އެއްޗެހި ގޮވުމަށްފަހު ޕޫލަށް ފުންމާލައި ކުއްޖާ ގަންބާލަން އުޅުނު. ނަމަވެސް ކުއްޖާގެ މަންމަ ވަނީ އެ ކުއްޖާ ސަލާމަތްކޮށްފައި،" ސިވިލް ރައިޓްސް ގްރޫޕުން ބުންޏެވެ.
ހާދިސާ ހިނގިތާ މާ ގިނައިރުތަކެއް ނުވަނީސް ފުލުހުން އެ ތަނަށް ގޮސް ވޮލްފް ވަނީ ހައްޔަރު ކޮށްފަ އެވެ.
ތުއްތު ކުއްޖާގެ މަންމަ ބުނީ އޭނާއަކީ ފަލަސްތީނަށް ނިސްބަތްވިޔަސް މިހާރު އެމެރިކާ މީހެއް ކަމަށާއި ނަމަވެސް މިހާރު އެމެރިކާގައި ވެސް އޭނާގެ އާއިލާއަށް ރައްކާތެރިކަން އޮތްކަމާމެދު ސުވާލު އުފެދޭ ކަމަށެވެ.
"ދަރިފުޅަށް ވަނީ ވަރަށް ބޮޑަށް އަސަރުކޮށްފައި. ކޮޓަރީގެ ދޮރު ހުޅުވިޔަސް ކުއްޖާ ހީކުރަނީ އެ އަންހެން މީހާ އެ ކުއްޖާ ގަންބާލަން އަންނަ ކަމަށް،" ކުއްޖާގެ މަންމަ ބުންޏެވެ.
މިކަމާ ގުޅިގެން ޓެކްސަސް ހައުސް އޮފް ރިޕްރެޒެންޓޭޓިވްސްގެ މެންބަރު ވިދާޅުވީ އެ ހާދިސާއާ ގުޅިގެން ކަންބޮޑުވާ ކަމަށާއި އެއްވެސް ނަސްލަކާ ދެކޮޅަށް ޓެކްސަސްގައި ނޫޅެވޭނެ ކަމަށެވެ.
އިޒްރޭލުން ގާޒާގައި ހިންގަމުންދާ ގަތުލްއާންމުގައި މިހާތަނަށް 37،000 އަށްވުރެ ގިނަ މީހުން ވަނީ މަރުވެފަ އެވެ. އޭގެ ތެރޭގައި ގިނައީ އަންހެނުންނާއި ކުޑަކުދިންނެވެ.
