އިންޑިއާގެ ތަމިލްނާޑޫ ސްޓޭޓުގައި ތަގައްޔަރުވެފައިވާ ބަނގުރާ ބުއި 54 މީހުން މަރުވެ، ގިނަ ބަޔަކަށް ހޮސްޕިޓަލުގައި އެޑްމިޓުކޮށްގެން ފަރުވާ ދޭން ފަށައިފި އެވެ.
މިދިޔަ ބުދަ ދުވަހުން ފެށިގެން ތައައްޔަރުވެފައިވާ ބަނގުރާ ބޮއެގެން ހާލުދެރަވި 200 އެއްހާ މިހުން ހޮސްޕިޓަލުތަކަށް ގެންގޮސްފައިވާއިރު، 100 މީހުންނަށް މިހާރު ވެސް އަންނަނީ ފަރުވާ ދެމުންނެވެ.
މި ބަނގުރާ ބޮއެގެން މަރުވި މީހުންގެ ތެރޭގައި ހިމެނެނީ 48 ފިރިހެނުންނާއި ހަ އަންހެނުންނެވެ. އެމީހުން މަރުވީ ހޮޑުލައި، ބަނޑުގައި ރިއްސުމުގެ އިތުރުން ބޭރަށް ހިންގައިގެން ފަރުވާ ދެމުން ދަނިކޮށެވެ.
ރިޕޯޓްތައް ބުނާ ގޮތުން ތަގައްޔަރުވެފައިވާ ބަނގުރާ ވިއްކަމުން ދިޔައީ ގަވާއިދާ ހިލާފަށެވެ. އަދި އެ ބަނގުރަލަށް ހުރީ ބާރުގަދަ ކެމިކަލެއް ކަމަށްވާ "މެތަނަލް" ބޭނުން ކޮށްފަ އެވެ.
މެތަނަލްގެ ކުޑަ މިންވަރެއް ބޭނުންކޮށްފައި ހުންނަ އުފެއްދުންތަކުން ލޯ އަނދިރިވެ، ލިވާއަށް ބޮޑެތި ގެއްލުންތައްވުމުގެ އިތުރުން ފުރާނައަށް ނުރައްކާވެ އެވެ.
މި މައްސަލައާ ގުޅިގެން މިހާތަނަށް ހަތް މީހުން ހައްޔަރުކޮށް، ތައައްޔަރުވެފައިވާ ކަމަށް ތުހުމަތު ކުރެވޭ 200 ލީޓަރުގެ ބަނގުރާ ވަނީ އަތުލައިގަނެފަ އެވެ.
ތަމިލްނާޑޫގައި މިދިޔަ އަހަރު ވެސް ތަގައްޔަރުވެފައިވާ ބަނގުރާ ބޮއެގެން ގިނަ ބަޔަކު މަރުވި އެވެ. އަދި 2020 ގައި އެ ސްޓޭޓުގައި ތައައްޔަރުވެފައިވާ ބަނގުރާ ބުއި 120 މީހުން ވަނީ މަރުވެފަ އެވެ.
