ފްރޭންކްފާޓް (ޖޫން 23) - ޔޫރޯ ފުޓްބޯޅަ މުބާރާތުގައި މިރޭ ޖަރުމަނާ ދެކޮޅަށް ނުކުންނަ މެޗުން ސްވިޒަލެންޑަށް ރަނގަޅު ކުޅުމަކާ އެކު ކޮންމެ ނަތީޖާ އަކުން ވެސް ފަރުޖައްސާލުމުގެ ފުރުސަތު އެބައޮތް ކަމަށް އެ ޓީމުގެ ކޯޗު މުރާތު ޔަކިން ބުނެފި އެވެ.
ގްރޫޕް އޭގެ ކޮންމެ ޓީމެއް ދެ މެޗު ކުޅެ، މިރޭ ފަހު މެޗުތަކަށް ނުކުންނައިރު، ޖަރުމަނު އެއް ވަނައިގައި އޮތީ ހަ ޕޮއިންޓާ އެކު އެވެ. ދެ ވަނައިގައި އޮތް ސްވިޒަލެންޑަށް ހަތަރު ޕޮއިންޓް ލިބިފައިވާއިރު، ތިން ވަނައިގައި އޮތް ސްކޮޓްލެންޑަށް އެއް ޕޮއިންޓް އަދި ފުލުގައި އޮތް ހަންގޭރީ އަށް ޕޮއިންޓެއް ނުލިބެ އެވެ.
ސްކޮޓްލެންޑަށް ގްރޫޕްގެ ގަދަ ދެ ޓީމުގެ ތެރޭގައި ހިމެނިގެންނާއި ހުރިހާ ގްރޫޕެއްގެ އެންމެ ރަނގަޅު ނަތީޖާ ނެރޭ ތިން ވަނަ ޓީމުތަކުގެ ތެރޭގައި ހިމެނިގެން، ވެސް ނޮކައުޓަށް ދިއުމުގެ ފުރުސަތު އެބައޮތެވެ.
ޖަރުމަނާ ދެކޮޅަށް މިރޭ ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޔަކިން ބުނީ، އަމާޒަކީ ރަނގަޅު ޓެކްޓިކަލީ ޕާފޯމަންސެއް ދެއްކުން ކަމަށެވެ.
"ފުރަތަމަ ދެ މެޗުގައި ވެސް އަހަރެމެންނަށް ނެރެވުނީ ޕޮޒިޓިވް ރިޒަލްޓެއް. އެހެންވެ، އަހަރެމެން މި އޮތް ހިސާބުގައި މި އޮތީ. ރަނގަޅު ހާލަތެއްގައި މި އޮތީ. ހަގީގަތަކީ އަހަރެމެން މި މެޗުން މޮޅުވާން ނުޖެހޭ. ފަރުޖައްސާލެވިދާނެ ކޮންމެ ނަތީޖާ އަކުން ވެސް،" ޔަކިން ބުންޏެވެ.
ސްވިޒަލެންޑަށް ގްރޫޕްގެ ދެ ވަނަ ގެއްލުމުގެ ފުރުސަތު އޮތީ، ޖަރުމަނު އަތުން ސްވިޒަލެންޑް ބަލިވެ، ސްކޮޓްލެންޑުން ހަންގޭރީ އަތުން މޮޅުވެއްޖެނަމަ އެވެ. ޔަކިން ބުނީ އެހެން މެޗެއްގެ ސްކޯ އަށް ނުބަލައި އޭނާ ބޭނުންވަނީ ރަނގަޅު ކުުޅުމެއް ދައްކައި، ރޭވުންތަކާ އެއްގޮތަށް މެޗު ފުރިހަމަ އަށް ނިންމާލުމަށް ކަމަށެވެ.
ޖަރުމަނާ ދެކޮޅަށް އެންމެ ފަހުން ސްވިޒަލެންޑުން ކުޅުނު ތިން މެޗުން ވެސް ބަލިނުވެ އެވެ. އެއް މެޗުން މޮޅުވިއިރު، ދެ މެޗު ވަނީ އެއްވަރުވެފަ އެވެ. ބޮޑު މުބާރާތެއްގެ ގްރޫޕް ސްޓޭޖުގެ އެންމެ ފަހު މެޗުން ސްވިޒަލެންޑް ބަލިނުވާތާ މިހާރު އަށް މެޗު ވަނީ ނިމިފަ އެވެ. ސްވިޒަލެންޑް، އެންމެ ފަހުން ބޮޑު މުބާރާތެއްގެ ގްރޫޕް ސްޓޭޖުގެ ފަހު މެޗުން ބަލިވީ، 2004 ގެ ޔޫރޯގެ ގްރޫޕް ފަހު މެޗުގައި ފްރާންސް އަތުންނެވެ.
ސްވިޒަލެންޑާއި ޖަރުމަނު ކުޅޭ މެޗު ފަށާނީ މިރޭ 12 ޖަހާއިރު އެވެ.
