ހެމްބާގް (ޖޫން 22) - ޔޫރޯ ފުޓްބޯޅަ މުބާރާތެއްގައި އަލަށް ވާދަކޮށް މެޗަކުން ބަލިވުމަކީ ޖޯޖިއާ އަށް ހުރިހާ ކަމެއް ނިމުނީ އެއް ނޫން ކަމަށް އެ ޓީމުގެ ކޯޗު ވިލީ ސަންޔޯލް ބުނެފި އެވެ.
މި ފަހަރުގެ ޔޫރޯ އަކީ ބައިނަލްއަގުވާމީ ފުޓްބޯޅަ މުބާރާތެއްގައި ޖޯޖިއާގެ އަލަތު ފެނިލުމެވެ. ޖޯޖިއާ އިން ކުޅުނު ފުރަތަމަ މެޗުގައި ވަނީ ތުުރުކީ އަތުން 3-1 އިން ބަލިވެފަ އެވެ. ދެ ވަނަ މެޗުގައި މިއަދު ޗެކް ރިޕަބްލިކާ ކުޅޭއިރު، ޖޯޖިއާގެ ކޯޗު ސަންޔޯލް ދެކޭގޮތުގައި މި މުބާރާތުން އެ ޓީމަށް ހޯދޭނެ އެއްޗެހި ވަރަށް ގިނަ އެވެ.
"ފުރަތަމަ މެޗު އެ ދިޔަ ގޮތުން އަަަހަރެމެން މާޔޫސްވި، ހަގީގަތުގައި ޔޫރޯ ފުޓްބޯޅަ މުބާރާތެއްގައި ނަތީޖާއެއްގެ ސަަބަބުން ޖޯޖިއާ މާޔޫސްވުމަކީ ވެސް ކުރިއަށް އެޅި ފިޔަވަޅެއްގެ ގޮތުގައި ބެެލެވިދާނެ،" ފްރާންސްގެ ކުރީގެ ކުޅުންތެރިޔާ، ސަންޔޯލް ބުންޏެވެ.
އޭނާ ބުނީ ތުރުކީއާ ދެކޮޅަށް ޖޯޖިއާ އިން ޓީމެއްގެ ގޮތުގައި ކުރި މަސައްކަތް ބަލައިގަންނަން ޖެހޭ ކަމަށެވެ.
ހަމައެކަނި ބޭނުންވަނީ ނަތީޖާ އަށް ފޯކަސްކޮށްގެން މަސައްކަތްތަކެއް ކުރަން ނޫން ކަމަށް ވެސް ސަންޔޯލް ވަނީ ބުނެފަ އެވެ.
"ކޯޗެއް ވެސް ކުޅުންތެރިއަކު ވެސް ހުރިހާ ފަހަރަކު ނަތީޖާ އަށް ބަލައިގެން މަސައްކަތް ކުރާނެ ކަމަށް ހީކޮށްގެން ނުވާނެ. އެއީ އަބަދު ނަތީޖާ އަށް ބަލައިގެން ކުރާ މަސައްކަތުގައި މުޅިން ކަހަލަ ގޮތަކަށް މިސްޓޭކްތަކެއް ފެންނާނެ،" ސަންޔޯލް ބުންޏެވެ.
ޗެކް ރިޕަބްލިކަކީ ބައިނަލްއަގުވާމީ ތަޖުރިބާ ބޮޑު ޓީމެއް ކަމަށާއި އެ ޓީމުން ވެސް ކުޅުނު ފުރަތަމަ މެޗުން ބަލިވެފައި އޮތުމުން މި މެޗުން މޮޅުވާން ހުރިހާ ކަމެއް ކުރާނެ ކަމަށް ސަންޔޯލް ގަބޫލުކުރެ އެވެ.
"މީގެ އޮންނާނީ ކަމެއް ހައްގުވާ ވަރަށް މަސައްކަތް ކުރުން. ބައެއް ފަހަރު މެޗަކުން މޮޅުވެދާނެ ހައްގުނުވާ ވަރަށް މަސައްކަތް ކޮށްފައި އޮއްވައި ވެސް. ދެން އަނެއް ބައި ފަހަރު މޮޅެއް ހައްގުވާ ވަރަށް މަސައްކަތް ކޮށްފައި ވެސް ބަލި އެބަވޭ،" ސަންޔޯލް ބުންޏެވެ.
މިއީ ޖޯޖިއާ އާއި ޗެކް ރިޕަބްލިކް ބައްދަލުކުރާ ފުރަތަމަ މެޗެވެ. މެޗު ފަށާނީ ރާއްޖެ ގަޑިން 6 ޖަހާއިރު އެވެ.
