ޑޯޓްމަންޑް (ޖޫން 22) - ޖޯޖިއާ މެޗުގައި ތަފާތު މޮޅު ކުޅުމެއް ދެއްކި ތުރުކީގެ ޒުވާން މިޑްފިލްޑަރު އާޑާ ގުލާ، މިރޭ ޕޯޗުގަލާ ދެކޮލަށް ކުޅޭ މެޗުގެ ފުރަތަމަ އެގާރައިން ނުފެނިދާނެ ކަމަށް އެ ޓީމުގެ ކޯޗު ވިންޗެންޒޯ މޮންޓެލާ ބުނެފި އެވެ.
ތުރުކީ އިން މި ފަހަރުގެ ޔޫރޯ ފުޓްބޯޅަ މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި ޖޯޖިއާގެ މައްޗަށް 3-1 ގެ ނަތީޖާ އަކުން ވަނީ ކުރި ހޯދައިފަ އެވެ.
އެ މެޗުގައި ތުރުކީ އިން ޖެހި ދެ ވަނަ ގޯލު އެ ޓީމަށް ކާމިޔާބު ކޮށްދިނީ ގުލާ އެވެ. އޭރިއާ ބޭރުން ގުލާ ޖެހި ހިތްގައިމު ގޯލާ އެކު, އޭނާ ވެގެންދިޔައީ ޔޫރޯ އެއްގައި ގޯލު ޖެހި އެންމެ ހަގު ކުޅުންތެރިޔާ އަށެވެ. މި ރެކޯޑް ކުރިން އޮތީ ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އަތުގަ އެވެ. އޭނާ ރެކޯޑު ހެދީ 2004 ވަނަ އަހަރު ކުރިއަށްދިޔަ މުބާރާތުގައި ގޯލު ޖަހައިގެންނެވެ. އޭރު ރޮނާލްޑޯގެ އުމުރަކީ 19 އަހަރެވެ.
ޖޯޖިއާ ކޮޅަށް ލަނޑު ޖެހިއިރު، ގުލާގެ އުމުރަކީ ވެސް 19 އަހަރެވެ. މީގެ އިތުރުން ގުލާ ވަނީ މި ސީޒަނުގައި އޭނާ ކުޅެން އެރި ހަތް މެޗުން ހަތް ގޯލު ކާމިޔާބު ކޮށްފަ އެވެ. އަދި އޭނާ އަކީ ރެއާލުން ވިއްކާ ކުޅުންތެރިއެއް ނޫން ކަމަށް ރެއާލްގެ ކޯޗު ކާލޯ އެންޗެލޮޓީ ވެސް ވަނީ ބުނެފަ އެވެ.
"ގުލާ ފިޒިކަލީ މި މެޗަށް ފިޓެއް ނޫން. އެކަމަކު ގުލާ ފުރަތަމަ އެގާރައިގައި ހިމަނާނެތޯ ނުވަތަ ނޫންތޯ ނިންމާނީ ފަހު ވަގުތު. އަހަރެން ބޭނުން ގުލާ އަށް ފުރުސަތު ދޭން" މޮންޓޭލާ ބުންޏެވެ.
މޮންޓޭލާ ބުނީ ތުރުކީގެ ބަލި ފަޔަކީ ފޯވާޑް ލައިން ކަމަށެވެ. އެކަމަކު، ޑިފެންސް އަދި މިޑްފީލްޑް ލައިން އިން ކުރާ މަސައްކަތާ އެކު, މެޗުތަކުން މޮޅުވެވޭނެ ކަމަށް މޮންޓޭލާ ދެކެ އެވެ.
"ޕޯޗުގަލް މެޗަށް އަހަރެމެން މި ނުކުންނަނީ ބަލިނުވާން އަޒުމް ކަނޑައަޅައިގެން. އަހަރެން އަށް އެނގޭ ޕޯޗުގަލްގެ ކޮލެޓީ. އެއީ މި ފަހަރުގެ ފޭވަރިޓުންގެ ތެރޭގައި ހިމެނޭ ޓީމެއް" މޮންޓޭލާ ބުންޏެވެ.
މީގެ ކުރިން ތުރުކީން ވަނީ ޕޯޗުގަލްއާ ދެކޮޅަށް ނުވަ މެޗު ކުޅެފަ އެވެ. ތުރުކީ އަށް މޮޅުވެވުނީ ދެ މެޗެވެ. ޕޯޗުގަލް އިން ވަނީ ހަތް މެޗުން ތުރުކީ ބަލިކޮށްފަ އެވެ. އެންމެ ފަހުން މި ދެ ޓީމު ކުޅުނީ ފީފާ ވޯލްޑް ކަޕް ކޮލިފައިން ޕްލޭއޮފްގައި 2022 ވަނަ އަހަރު އެވެ. އެ މެޗުން ޕޯޗުގަލް މޮޅުވީ 3-1 އިންނެވެ.
މިރޭ މި ދެ ޓީމު ބައްދަލުކުރާ މެޗު ފަށާނީ 9 ޖަހާއިރު އެވެ.
